Markə 7
7
Tar nɛ̂n-ji-bbeje
1 Parijinyɛje, kə̂ marə njê-gərəje-Ndu kə̂ inje Jerujalɛm ddeeje mbɔnje naan rɔ Jeju tə̂. 2Daaje a, marə njê-njaje goe tə̂ usaje nɛ̂n kə jide yərəw baa. N̂-tokoje jide ang.
3Mba, Parijinyɛje kə kəsə Jiipije tɔyn aw ngəmje nɛ̂n-ji-bbeje lə kadedeje. N̂-tokoje jide kə majɛ̂ bba dusaje nɛ̂n nɛ̂n. 4Bbo dinje natâ n̂-təlje kə̂y a, n̂-tokoje rɔde mba kɔru nɛ̂n nɛ̂n-yərəw rɔde tə̂ kə ddang bba dusaje nɛ̂n. Daw ngəmje marə nɛ̂n-ji-bbeje lə kadedeje nya tokə lə: Gusu toko əngoje, joje kə kaje.
5Yeenn bba, Parijinyɛje kə njê-gərəje-Ndu dujuje Jeju nan: «Mba ddi bba njê-njaje goi tə̂ aw ddaje nɛ̂n kə turu nduje lə kajejedede ang, a daw dusaje nɛ̂n kə jide yərəw wa?» 6Jeju ilade tə̂ nan: «See njê-ngəmje, Ejayi ila mbər dɔse tə̂ kə dɔgɔlɛ̂. N̂-pa nan:
‹Lubba pa nan: Dəwje nəənn aw waləmje tade tə̂ baa,
a məde to dang səm.
7Polo kə̂ daw polomje
to nɛ̂n kâra ang,
mba nɛ̂nje kə̂ daw tɔjuje
toje to nduje kə̂ inje ta dəwje tə̂ baa.› »
8Jeju pa bbay nan: «Inyaje Nduje lə Lubba a, nduje kə̂ inje ta dəwje tə̂ â aw bbəəlje.» 9N̂-təl n̂-pa bbay nan: «Ə-mbətəje Nduje lə Lubba tɔkɔrɔ njaa, a nɛ̂n-ji-bbeje lə kaseseje â aw ngəmje. 10Mba Mɔyijə pa nan: ‹Ə-wal bɔije kə kɔinje.› N̂-pa tɔ nan: ‹Dəw kə̂ nanɛn kə bɔɛ̂je wase kɔɛ̂nje a, maji karə n̂-tɔlɛ̂.› 11A sese, ə-paje nan: ‹Dəw kə̂ pa arə bɔɛ̂je wase kɔɛ̂nje nan: Nɛ̂n kə̂ mâ kasə ta kumain nɛ̂n le m-ngəm dang mba Lubba›, 12sese arəje ddəw dəw le karə ɔku nɛ̂n le bɔɛ̂je wase kɔɛ̂nje le. 13Baann â aw tujuje nɛ̂n tar lə Lubba ddəw nɛ̂n-ji-bbeje tə̂ kə̂ aw tɔjuje. Aw ddaje marə nɛ̂nje nya tokə baann tɔ.»
Nɛ̂n kə̂ aw dda bba dəw aw ddee to nɛ̂n-yərəw
14Goe tə̂ a, Jeju bbar dəwje kə̂ banya le ngaâ pa arəde nan: «Əsese tɔyn, ooje tar ləm kə majɛ̂ ta ə-gərəje kandɛ̂. 15Marə nɛ̂n kə̂ in ddaka aw andə rɔ dəw tə̂ kə̂ a dda karə n̂-ddee to nɛ̂n-yərəw goto. Nɛ̂n kə̂ in rɔ dəw tə̂ aw tee kə ddaka â a kasə dda karə dəw ddee to nɛ̂n-yərəw.» 16Dəw kə̂ mbia to ta koo nɛ̂n tar a, maji karə oo tar nəənn.
17Kar kə̂ Jeju inya dəwje kə̂ banya le ddəw əw ngaâ aw andə mə kəy tə̂ a, njê-njaje goe tə̂ dujeje gəl gusu-tar nəənn le. 18Nilade tə̂ nan: «Sese kara ə-gərəje nɛ̂n ang tɔ wa? Marə nɛ̂n kə̂ a kin ddaka kandə mə dəw tə̂ kə̂ a kasə dda karə dəw ddee to nɛ̂n-yərəw goto le, ə-gərəje ang wa? 19Mba nɛ̂n le andə bbəngəre tə̂ ang. Nɛ̂n le aw məɛ̂ tə̂ ngaâ tee məɛ̂ tə̂ kə ddang.» Ddəw tar tə̂ nəənn, Jeju tɔju to dəw a kasə kusa nɛ̂n tɔyn.
20N̂-pa bbay nan: «Nɛ̂n kə̂ in mə dəw tə̂ tee ddaka â aw ddɛɛ̂ arə n̂-ddee to nɛ̂n-yərəw. 21Mba kəjəje kə̂ maji ang aw inje bbəngərə dəw tə̂ nu bba aw kə dəw le arə dda kaya, bboko, tɔl dəw, 22dda lo-to-majang, dda bbo nɛ̂n-kinga, məɛ̂ aw maji ang. Naw nula dəwje naan tə̂, naw dda nɛ̂n kə̂ to kə dɔgɔlɛ̂ ang, naw nunda mə kə dəw, naw nanɛn kə dəw, noo rɔɛ̂ bo ngaâ naw dda nɛ̂n-mbə. 23Nɛ̂nje tɔyn kə̂ maji ang nəənn le inje bbəngərə dəw tə̂ bba aw dda arə dəw ddee to nɛ̂n-yərəw.»
Mə-kunn lə dɛnɛ̂n kə̂ to Jiipi ang
24Jeju ɔtu lo tə̂ənn aw nangə tə̂ kə̂ Tir. Nandə mə marə kəy tə̂, n̂-ndiki karə dəw gərə to nee lo tə̂ənn ang, a dəwje gɔɔnje gərəje. 25Marə dɛnɛ̂n kə̂ ndil kə̂ maji ang isi mə ngonnɛ̂ tə̂ oo tarɛ̂ ngaâ ddee kə tɔkɛ̂ oso nɔn gɔlɛ̂ tə̂. 26Dɛnɛ̂n le to Gɛrɛkə, duje Penisi, nangə tə̂ kə̂ Siri. N̂-duju Jeju karə tubba ndil kə̂ maji ang le mə ngonnɛ̂ tə̂ le. 27Jeju pa arɛ̂ nan: «Inya arə ngannje usaje nɛ̂n məde ndann bba. Mba to maji ta kunn nɛ̂n-kusa lə ngannje kila karə bisije ang.» 28Dɛnɛ̂n le ilɛ̂ tə̂ nan: «Ye njaann, Əbbə-dəwje. A bisije aw usaje buru nɛ̂n-kusaje lə ngannje kə̂ aw gaynje kɔ tabələ tə̂ kə majɛ̂.» 29Yeenn ngaâ Jeju pa arɛ̂ nan: «Mba tar ləi nəənn le, ə-təl aw kə̂y ləi, ndil kə̂ maji ang le tee mə ngonni tə̂ kə ddang mban.» 30Dɛnɛ̂n le təl kə̂y a, inga ngonnɛ̂ le dɔ tuwa tə̂. A ndil kə̂ maji ang le inyɛ̂ mban.
Jeju aji nje-mbi-kutu arə pa tar
31Jeju ɔtu nangə tə̂ kə̂ Tir nday dɔ nangə kə̂ tɔkə bbeje kə̂ dɔku toje tə̂ ngaâ aw ər kə dangə tə̂ kə̂ Galile kə ddəw kə̂ Sidɔn. 32Dəwje ddeeje kə marə dəw kə̂ mbia utu kə̂ pa tar pin rɔɛ̂ tə̂. N̂-ddaje rɔde to ndoo rɔ Jeju tə̂ karə ila jia dɔɛ̂ tə̂. 33Yeenn ngaâ Jeju aw kə dingaw le ddəw əw kə dəwje kə̂ banya le, n̂-tula ngann jia mbia tə̂ joo kəm ngaâ n̂-dda maann tɛɛ̂ nɔru nɛ̂n ndɔɛ̂n. 34Goe tə̂ a, nunn kəmɛ̂ kə darâ, nila kəwn, n̂-pa nan: «Epata.#7:34 Kandə tar le nan: «Ə-təəyn rɔi.»»
35Njangə baa njaa a, mbi dingaw le təəyn ngaâ ndɔɛ̂n tutu ngaâ nunn kutu pa tar kə majɛ̂. 36Jeju ndəjə dəwje le karə paje tarɛ̂ arə dəw ang. A kə ndɔ tɔyn kə̂ naw ndəjəde le, daw dilaje mbər nɛ̂nje kə̂ naw dda le kə kete kete. 37Tar le dum dɔ dəwje kə̂ banya le ngaâ paje nan: «Nɛ̂nje tɔyn kə̂ n̂-dda to nɛ̂nje kə̂ maji nya. N̂-dda narə njê-mbi-kutuje ooje tar ngaâ njê kə̂ ndɔnde tɔ kara paje tar tɔ.»
Currently Selected:
Markə 7: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
