Márcos 16

Jesús nijiápo iji datoringai rĩ

(Matéo 28:1-10; Lúcas 24:1-12; Juan 20:1-10)

1Mu chise dire puyai uté quigade ga María Magdaléna, Jacóbo ore daté María, jé aja Salomé udaji ore doi cucha otate unéningo ujetiga ore tibágui Jesús ode ga qué ore changuñérama Jesús aoi gai to. 2Mu qué durasepise uje quene guedé tocade iji domíngoi uje chequedíe ore chise Jesús ode. 3Enga ore catecã́ri ñane aja Jesús ode yui enga ore chojningame ñane:

–Chimo jóroque re gosirase ujetiga tṍra cucarané cuchabé ome yoque tiji Jesús ode piagoi.–

4Mu jĩrique ore chajire mu que ore chimo cucarané cuchabe casé uje ore suru Jesús ode gai ome diríca. Uje e íjnoque uaté jogadi. 5Jecute jĩrique ore chacája ducode jogadi mu ore taji ome mu ore chimo jnacari tiji. Ga uté cháji ode ãrachua. Mu uté iguidedie chisípise jnumone. Enga póroropisi rĩ. Ga jogadi tu uje chajuque udire ore agutedie jnese. 6Mu jnacari tuté chojningame ore:

–Ca uacagutéraque cho jora ome yu. Uacacuei tuté Jesús, nazarétgose uje ore chujé diríca, ga ore chajo aja curesei diríca, e nijiápo que rĩ. Enga que dépoji de gotique rĩ. Qué beyoi ga ajicho jogadi casé to gojni uje ore chicháji diríca.–

7Mu jé u uje chojningame chequedíe ore:

–Boyo jne, enga angoñome Jesús acadigode, Pédro ore enga oyósi tome ore jne: "Uacacadisṍri casé a bajagája uacaquei jne iji Galiléa. Mu a eso ta to gajneri enga a amóño to iji ta. Chamáñaje uruode quigode jé upúsu diríca gu."–

8Mu jé u uje chequedíe udire ore jno ga ore chayopis ome ducódedie jogadi uté. Uje ore tãrarapise gu ome dasadodéringane. Mu que ore catecã́ri deyátique ayoré gotique ome damone ucode cucha. Uje ore todópisa gu.

Jesús chiqueta raja María Magdaléna

(Juan 20:11-18)

9E chise direjnímei iji dire bajai tuté uje i tu domíngoi uje Jesús ecápo rĩ iji datoringai. Ga udojo quigade ga chiquetápise raja chequéraque uje i tu María Magdaléna, enga bajé uaté uje Jesús chiqueta raja. Uaté jé u uje Jesús chijócãre Satanás utocaitígo iji, uje gare ore iji ti yijmanuñai nanique. 10Enga chequé tuaté jĩrique jno ujetiga chingome Jesús acadigode uje Jesús e ecápo rĩ. Enga chequé uaté chise dabaguiédode mu ore chopise dáyugu raque enga qué ore popise iji dejode. 11Mu ore chudute chequé uaté ojñane uje Jesús e ecápo rĩ uje pañapísiji Jesús uje chimo, mu ore chotigasipise.

Jesús chiquetápo raja dacadique gáreode ore rĩ

(Lúcas 24:13-35)

12Mu udojo quigade ga jé u uje chiqueta raja dacadique gáreode ore iji ore isoráneraque uje qué ore déji dajetique. Mu Jesús chécãripise dadode ome udore ore, ga a ca chopo Jesús gotique rĩ. Jecute que ore chiraja uté míraque. 13Mu uje ore chirajapise uje ore acadisṍri u ga jé u uje ore chayóji dajorane ore yui ujetiga ore chingome ore to. Mu jé isocai tu chequé ojñane ome ore, uje ore chotigasipise udore ore to.

Jesús iroqué erueminórone u udojo ome ore jnese

(Matéo 28:16-20; Lúcas 24:36-49; Juan 20:19-23)

14Jecute udojo quigade ga Jesús chise dacadigode uje ore chojmára iji yirídai ga qué ore chácariji datigai gai. Mu Jesús catecã́ri dacadigode ore ga jĩrique uruode dosója udore ore. Uje guiyade detépicho iji ore u uje que panguretigai déji ore ome uru cásodicáite ome ore. Upo rĩ uje ore chotigasipise dajorane ojñane ome uté uje ore pañapísiji uté múñi uje ecápo rĩ. 15Enga jé jogadi u uje chojningame ore:

–Boyo jne ga angoño yujnomei tome óriji erámone údode jnese jne, ujetiga ore chise dáringáringo piquetacho jnese to jne. 16Mu diga uté gosi ujetiga changureta yu, ga dimane jne ujetiga óraño uté gosi aja yodi, ga uté gosi úringai piquetaque jogadi tu. Mu uñéngo ujetiga ore chetaque uacojñáringo ome yu, ga ore gajnei tu pujuyaquédatéi jne. 17Mu yanguresórone udore a ore oidé tu yujopié jne aja tijode ujetiga pangurenipise ore ome datatagode yurúo udojo. Ujetiga ore chijna yi tome Satanás utocaidode, enga a jé cachodi tu jne ujetiga ore doi guesi tiji dasagode ayoré udore ore. Mu udore a ca puru quedéjnaringo piragápo ome udore ore jne rĩ, ujetiga jĩrique ore chiraja. 18Jé isocai tu ome ujetiga uñeque chisarase ugárique iji gaté mu a ca cuchárique chósi ti uté gosi jne. Ujetiga gosi chójirase cucha otate puyátique mu a ca pésu cuchárique ome uté uñeque jne. Mu que gusu udore gotique. Jé jõrai tu ujetiga udore ore doi ga ore chicha dajmainie aja ejnaretade gáyode, enga a jogadi u jne ujetiga jĩrique Dupade chiqueta ore.

Jesús jnome gatajnoquei

(Lúcas 24:50-53)

19Uje Jesús chejna daruode udore guesi ome ore ga jé u uje Dupade jno údi aja gaté. Mu uté quítequiguíji Dupade ãrachua ga cháji iji dirode udojo. 20Mu acadigode ore doi Jesús uruode quigode ga ore jnome erámone ujetiga ore chacate ayoréode ore iji, ujetiga ore chise dáringáringo piquetacho iji erámone údode jnese. Mu ore agutíyamáni jé upúsu Jesús uje ore cho dangarádejnai iji uté nanique. Enga tẽrápisa dajopié ome udore ore gu ujetiga ore pésu dapesútedatérigo iji ayorébui ore ujade, ujetiga diga ore chisípise dáringárique pangurecho ome datatagode Dupade urúo. Amén. Qui jé upúsu.

Currently Selected:

Márcos 16: Ayore

Highlight

Copy