ILOOWALI 29
29
Tei Yako leidungga mola ode bele lei Laban
1Tei Yako lopo tolonga mola lo nonao̒lio wau lonao̒ ode lipu to ambahu tiimuru lo Kanaa̒n. 2Debolo iloontongalio mao̒ ali tuwau tohuta udatahu wau luasi, wau totiliilio hiluu̒uta tolo himbala lobatade wau himba u biasaalio hepeelumolio teto. Ali boito tau̒tau̒be botu leidaa̒. 3Wonu ngoa̒amila himbala lobatade wau himba malei wimoa̒a totambati boito, mongo diiti mopolilideo̒ botu boito ode tiliilio, tulusi batade wau himba boito peelumolio mao̒. Lapatao̒ uito mongo diiti muli molau̒beo̒ tohuta udatahu wau luasi ali boito.
4Lapatao̒ malohintu mao̒ tei Yako tomongo diiti tawoluo teto, “Wuu sahabati, lonto utoonu mai timongoli botie?”
“Lonto Haran,” tametao̒ limongolio.
5Tei Yako luli lohintu mao̒, “Wolo otaawa limongoli tei Labani walae̒e Nahor?”
“Otaawa,” tametao̒ limongolio.
6“Woloolo mola owowoluwoalio?” luli yilintu mao̒ lei Yako.
“Piopiohe wambao̒,” tametao̒ limongolio. “Bilohilo, uito walai̒o taabua tai̒lunte Raheli. Tio lonao̒ mai lodelo himbala lobatade wau himba liyamolio.”
7Ualei Yako, “Dulahu donggolo wau diipo leidungga mai wakutuulio batade wau himba potuwotolo ode delomo lantunga. Yilongola bibii-natangiyalo boito diila peelumo mao̒ limongoli, tulusi muli hulia mao̒ limongoli mongaa huo̒yoto?”
8Tametao̒ limongolio, “Amiaatia bolo moo̒ peelu mao̒ hihii-mbawaalo boito wonu ngoa̒amila himbala lohimba malei wimoa̒a tewe wau botu poheu̒to maililideo̒.”
9Tou̒ tei Yako donggo bibiisalawa woli mongolio, ti Rahel malonao̒ mai wolo himbala batade wau himbalio. 10Tou̒ tei Yako loo̒onto mao̒ oli Rahel pee̒-pee̒enta wolo himbalalio boito, malonao̒ mota tei Yako ode ali boito, tulusi lopolilideo̒ botu poheu̒tio ode tili wau helopeelu mao̒ himbala boito. 11Lapatao̒ tio lodilo oli Rahel, wau mahilu moyongo sababu meengahu. 12Ualio mao̒ odeli Rahel, “Wau̒ walai̒ Ribka, wutati paapamu.”
Lapatao̒ matilumeteo̒ ti Rahel lohualingo ode belelio mola lohungguli mao̒ sua̒li boito toli paapalio. 13Tou̒ tei Laban loo̒dungohe habari pasali lei Yako, pou̒walaa̒lio boito, matilumeteo̒ tio mota lodunggaya wolio. Tei Laban malo ngoo̒odeo̒ olei Yako wau lodilo olio, tulusi lodelo olio tilumuwotao̒ ode delomo bele. Lapatao̒ tei Yako lohungguli mao̒ totoonulalo sua̒liilio odelei Laban, 14Ualei Laban, “Memangi otutu, yio̒ ilaato modudulo wolau̒.”
Tei Yako malo tibiluliloa̒ tobele boito ngohula mola polupolu.
Tei Yako helo kalaja tolei Laban huna moo̒tapu oli Rahel woli Lea
15Tou̒ dulahee tuwau loloi̒ya mao̒ tei Laban odelei Yako, “Diila patuti yio̒ mokalaja to olau̒ wolo diila ohunalio, bo kalana yio̒ ilaatau̒. Ngoolo mao̒ wuupa u otohilaamu?” 16Tutuulio tutu tei Laban owalao̒ mongohua duulota; tamohuhula ilunte Lea, wau tawali-yaliilio ilunte Rahel. 17Ti Lea matolio gaaga, hiambola ti Rahel owawao̒ gaaga wau olaku u gaaga.
18Tei Yako mai̒lohilao toli Rahel, sababu uito tio lolametao̒ odelei Laban, “Watia ohilaa mokalaja ngotilonggadu pitu lotaunu mola wonu ti Oomu mopoluasi mai olaatia monika woli Rahel.”
19Ualei Laban, “Lebe mopioheo̒ tio wohiu̒ mai olemu lou̒ u taawewo; oditolio poti biluloo̒lo mao̒ teea.” 20Yi malo kalaja tei Yako teto ngotilonggadu pitu lotaunu mola huna moo̒tapu oli Rahel, wau ode olio boito lopalutao̒ debo odelo ngoolo hui wambai̒o, sababu hilaalio to tadulahu boito.
21Lapatao̒ uito tei Yako loloi̒ya mao̒ odelei Laban, “Pitu lotaunu mola malo paluto; poluasiyalo mai watia monika wolo walai̒ Oomu.” 22Tulusi tei Laban malohutu potihunggu lonika wau helo loduo ngoa̒amila taa tokota boito. 23Bo tou̒ hui boito, diila ti Rahel, bo ti Lea taa dilepitio mao̒ lei Laban odelei Yako, wau tei Yako lou̒lauwa wolio. (24Tei Laban longohi mao̒ watolio taabua tai̒lunte Jilpa odeli Lea, u lowali watolio.) 25De loloombulio mola bolo ilotaawa lei Yako deu̒ taa u nilakaalio. Lapatao̒ malonao̒ mota tei Yako odelei Laban wau loloi̒ya mao̒, “Yilongola ti Oomu malo pohutu olaatia odie? Wolo watia diila helo kalaja huna moo̒tapu mao̒ oli Rahel? Yilongola ti Oomu malo himbulo olaatia?”
26Tei Laban lolametao̒, “Modudua̒ uu̒udu tewe, tawaliyali diila mowali monika meimulo woli taatalio. 27Yimaipo dilumutu pitu hui mola potihunggu lonika mopaluto, de wohiu̒ mai olemu ti Rahel olo, asali yio̒ donggo muli mohuto mokalaja pitu lotaunu mola.”
28Tei Yako akolo, wau lapatao̒ potihunggu boito lopoluto, tei Laban longohi mao̒ olio ti Rahel lowali dilelio. (29Tei Laban longohi mao̒ olo watolio taabua tai̒lunte Bilha odeli Rahel, u lowali watolio.) 30Tei Yako malo ulauwa woli Rahel olo, wau tio motolia̒ngo oli Rahel woli Lea. Lapatao̒ tio luli helo kalaja pitu lotaunu mola.
Mongo walae̒e Yako
31Tou̒ Eeya loo̒onto mao̒ deu̒ ti Lea diila boti otolia̒ngio lei Yako debo odelo ti Rahel, yi Eeya lopoluasi oli Lea mopotutu mai walao̒, bo ti Rahel debo diila loo̒tapu walao̒. 32Ti Lea maa ilombodaa̒ tulusi lopotutu mai walao̒ talolai̒ ngota. Ualio mao̒, “Eeya maloo̒onto mai osuusa lowatia, wau botia dile lowatia mamo tolia̒ngo olaatia.” Lapatao̒ iluntelio mao̒ walai̒o boito Ruben. 33Ti Lea luli ilombodaa̒ lapatao̒ lopotutu mai walao̒ talolai̒ ngota. Uali Lea, “Eeya malongohi mai ode laatia walao̒ botie poli kalana dilungohe-Lio deu̒ watia diila otolia̒ngio.” Lapatao̒ iluntelio walaio̒ boito Simeon. 34Ti Lea luli ilombodaa̒ mola poli lapatao̒ lopotutu mai walao̒ talolai̒ ngota. Ualio mao̒, “Botia dile lowatia malebe meitihuto to olaatia kalana watia malo potutu mai walao̒ mongo lolai̒ toulota.” Lapatao̒ iluntelio walai̒o boito Lewi. 35Lapatao̒ luli ilombodaa̒ mola poli ti Lea wau lotutu mai walao̒ talolai̒ ngota. Ualio mao̒, “Pee̒enta botie watia mamomuji mola Eeya.” Lapatao̒ iluntelio walao̒ boito Yehuda. Lapatao̒ uito ti Lea diilalo helo potutu mai.
Currently Selected:
ILOOWALI 29: LAIGOR
Highlight
Share
Copy
Want to have your highlights saved across all your devices? Sign up or sign in
