O KEJADIAN 42
42
O Yusuf ai ria-riaka yoiki o Mesirika la ima ija o gandum
1Maöraha o Yakub woihene naga o gandum o Mesir mabereraka, ünanga wätemo aingoha-ngohakika, ”Yadodoa hongini kanima rirïdokadika? 2#Kis. 7:12 Toihenoka naga o gandum o Mesir mabereraka; nioiki dokaika deʼ ni ija o gandum hupaya ngone uha o habirokata hohi honenge.” 3Daha yoiki yangimoi o Yusuf ai ria-riaka gënanga yoija o gandum o Mesir mabereraika. 4Mä o Yakub wihigumal̄aua o Benyamin, o Yusuf ai dodoto madutu, woiki imakomoteke dede önanga, karana ünanga wohawana uha-uha idadi wobodito aingohaka gënanga.
5Karana o habirokata o Kanaan mabereraka, o Yakub ai ngoha-ngohaka imakomoteke de o nyawa mahomoa yaino imaija o gandum o Mesir mabereraino. 6Wohö huku-hukunu o gandum hagala o nyawaika o duniaka i ngodumu ganga o Yusuf, hokä o Mesir magubernur. Hababu gënanga o Yusuf ai ria-riaka yaino de yatilabukuku ai himangoka. 7Maöraha o Yusuf wämake ai ria-riaka, ünanga wänako önanga, mäünanga wohiliba hokä wänakoua. Wä dobuturungu ünanga wäleha onangika, ”Ngini okia manyawa?”
”Ngomi o Kanaan manyawa. Ngomi miaino la mimä ija o inomo,” önanga yohaluhu.
8Ngarokä o Yusuf wänako ai ria-riaka, önanga iwinakoua ünanga. 9#Kej. 37:5-10 Daha ünanga womähininga ai nanerika mangale önanga. Deʼ ünanga wätemo, ”Ngini nënanga nitotailako; ngini niböa la niatailako kiaka yabole miaberera.”
10”Kowali, Tuanga,” önanga yohaluhu. ”Ngomi, anigogilaongo Tuanga miböa duga-duga la miija o inomo. 11Ngomi nënanga o riadodoto, ahi tuanga. Ngomi o nyawa maoa, yototailakoua.” 12O Yusuf wätemo onangika, ”Ni eluku! Ngini niböa nenangino la nia tailako kiaka yabole o berera nënanga.”
13Onanga yohaluhu, ”Ngomi nënanga imi ngimoi de hinoto o riadodoto, ahi Tuanga, ngomi o ama moi aingoha-ngohaka o Kanaan mabereraka. Ngomioka womatengo wohonengoka deʼ mia dodoto makiditoko naga de tongomi mia ama.”
14”Igoungu itiai hokä ahi demo,” o Yusuf wohaluhu, ”ngini nënanga yotötailako. 15Ngohi tomau tiniuji ngini: Ngohi tokoboto de ma koano ai romanga ngini aha niamal̄aua o berera nënanga nako niadodoto makiditoko gënanga wainoua nenangino. 16Nginioka womatengo kokiani wolio wïngoho. Mahomoa aha tätumungu hiädono niademo inyata igoungu. Nako kowali, de ma koano ai romanga, ngini nanga miahaturu yotötailako!” 17De ipaha önanga yahingohama o buika o wange hange madëkana.
18O wange hangeoka o Yusuf wätemo onangika, ”Ngohi o nyawa tï modo-modongo deʼ tihigihene ma Jou Madutuika. Ngini aha tinihi halamati de o jaji moi. 19La ihinyata i goungu ngini nënanga niahininga itebini, nginioka womatëngo aha tïtumungu o bui magoronaka; mahomoa yakunu nilio deʼ niao o gandum ngini ni ija-ija iti matau madol̄a magogiria yamao yähahini. 20De ipaha gënanga ngini kokiani niwiao nia dodoto makiditoko ngohino. Genanga damä manyonyata i goungu nia demo gënanga itiai, deʼ ngini aha tinihukumua nihonenge.”
Onanga ihimoteke de magubernur ai putuhu gënanga. 21Daha önanga imaketemo moi demoika, ”Aa, ngone o öraha nanga i nä hukumu nanga howono mahasili nanga dodotika kahuruono; ünanga wogahoko o roriwo mä ngone hïfaduliua, ngarokä ngone himake ünanga wamao wohangihara. Genanga mahababu o öraha nanga ngone hamao o huha de o hangihara nënanga.”
22 #
Kej. 37:21-22
O Ruben wato, ”Koigoungua kahuruono ngohi tahetongoka nginika hupaya o ngohaka gënanga uha hïsarakianaga. Mä ngini nioluku niihene. Deʼ öraha nanga ai honenge mabalaha ngoneino.” 23O Yusuf womangarati toönanga manga demo, mä önanga yanakoua o hali gënanga, karana önanga ima ketemo de o Yusuf yapäke de manga uru madodohanga. 24O Yusuf wämal̄a önanga, de woari. Maöraha wakunokali wotemo-temo, ünanga womakilioro onangika, daha wïl̄ë o Simeon, deʼ wohuloko iwiliko ünanga ai riadodoto mata-mata manga himangoka.
O Yusuf ai ria-riaka ima kilioro o Kanaanika
25O Yusuf wohipareta hupaya ai ria-riaka manga karongo yao-ao mata-mata yonoa de o gandum deʼ manga tiwi moi-moi ihingohama mangakaronguku gënanga. Ikali hupaya önanga yahidöaka o inomo la iti manga bilaono o ngekomika. Aipareta gënanga yadiai. 26Genanga de iböto o Yusuf ai ria-riaka yögina toönanga manga keledai de o gandum önanga yo ija-ijaoka gënanga, daha genangokadau de önanga imä jobo. 27I mä idu-idu mangïoka onangoka woma tengo wahelenga ai gandum makarongo la wohi ol̄omo ai keledai. Wamake ai tiwi o gandum gënanga mal̄okuoka. 28”Tongohi ahi tiwi ihigilio,” wäböaka ai roriadodotika. ”Niamake, naga tongohi ahikarongo magoronaka!” Toönanga manga hininga idadi iruae, deʼ de manga modongo önanga imakokeleha, ”Okia ma Jou Madutu wodiai ngoneino?”
29Maöraha imahiädono o Kanaanika, önanga ihijarita manga amaika hagala moi-moi önanga yamao-maoka. Onanga yato, 30”O Mesir magubernur womitemo womïdodorohu ngomino deʼ womï tae ngomi mitötailako ai berera. 31Ngomi mihaluhu, ’Ngomi o nyawa maoa, mitotailakoua, ngomi o nyawa miahininga i riko-rikoto. 32Ngomi mata-mata imingimoi de imihinoto o riadodoto, o ama moi, deʼ womatengo wohonengoka, mamia dodoto makiditoko naga de mia ama o Kanaan mabereraka.’ 33Ma gubernur gënanga wotemo, ’Ngohi tomau tinï uji la tohiöriki boteka ngini o nyawa nia hininga i riko-rikoto: Nginioka woma tengo kiani wogö gogere; mahomoa yakunu nilio ni ao o gandum nia ngohaka de nia hekatika magogiria yamao o hahini. 34De iböto ngini nima kilioro niwi ao nia doto makiditoko, ngohi aha tohi öriki ngini yotö tailakoua, duga-duga ngini o nyawa manga hininga i riko-rikoto. Done nia riadodoto tï tumu-tumunguku gënanga aha tihi gilio nginika deʼ ngini yakunu nigogere o bereraka nënanga deʼ nia hininga ma huka nima hakunu.’ ”
35De ipaha, maorahoka önanga manga karongo madol̄a yokopoa, onanga moi-moi yamake manga tiwimangï de matiwioka; daha önanga duru yohawana, de manga ama ö. 36Daha manga ama wätemo, ”Ngini nihi hababu ahingohaka mata-mata yohihanga. O Yusuf koiwïwaka; o Simeon koiwïwaka; deʼ öraha nanga ngini aha niwi l̄ë o Benyamin ö. Goguleua ahi huha de ahi hangihara!”
37De o Ruben wïtemo ai amaika, ”Nihilapahi o Benyamin ngohino, Baba; damä aha ngohi tihigilio, nako kowali Baba yakunu nä toma ahingohaka o nauru yahinoto.”
38Mä o Yakub wätemo, ”Kowali! O Benyamin yakunua ngini niwiao; ai riaka wohonengoka deʼ öraha nanga duga-duga unangokahi wogogogere. Uha-uha ünanga wamake o bodito o dodagi magoronaka gënanga. Ngohi nënanga hiperekioka, deʼ o hininga mahuha aha ngini ni ao-ao ngohino gënanga mabaha ka ahi honenge.”
Currently Selected:
O KEJADIAN 42: TLB
Highlight
Share
Copy
Want to have your highlights saved across all your devices? Sign up or sign in
