O KEJADIAN 48
48
O Yakub wahi barakati o Efraim deĘĽ o Manasye
1O öraha muruono naga ipahaika iwihiabari o Yusufika ai ama wopanyake duru kahähiri. Ho ünanga woiki de aingohaka yahinoto, enagënanga o Manasye deʼ o Efraim iwïlega o Yakub. 2Maöraha o Yakub woihene o Yusuf woböa, ünanga wödodoomuino ai kuata, daha wogogeruku ai ngidu-ngiduoka. 3#Kej. 28:13-14 O Yakub wïtemo o Yusufika, ”Ma Jou Madutu Wo Kokuaha womahimatokoka Ai diri ngohino o Lus madaeraka, o Kanaan matonakoka, deʼ wohihi barakatioka ngohi.” 4Unanga wohi temo ngohino, ”Ngohi aha tonihi döaka ngonaika o ngohaka de o danongo manga ngöe, hupaya anidifauku yodadi o hoana de o berera mangöe; ngohi aha tohidöaka o berera nënanga aningohaka de ani danongika hokä toönanga madutu kahi ado-adonika.”
5O Yakub wohigila-gila, ”Yusuf, aningohaka yahinoto o Efraim deʼ o Manasye imakokil̄au o Mesir mabereraka nënanga i hira de ngohi tomahi ädono nenanginodau, tadiai ahingohaka, hokä o Ruben deʼ o Simeon. 6Nako ngona namakeoli o ngohaka, önanga aha tädiaiua hokä ahingohaka duga-duga itotiai aningohaka; o puhaka mangale önanga aha önanga yatarima o Efraim deʼ o Manasyeino. 7#Kej. 35:16-19 Ngohi tadiai o hali gënanga mangale o ngo Rahel ngoni ayo. Ahi dodagi magoronaka toma kilioro o Mesopotamia de taino, ngoni ayo mohonenge o Kanaan matonakoka, i kurutikaua de o Efrata, deʼ ngohi ahihininga duru i huha. Ngohi tomi lungunu dokengoka o Efrataika mangekomo madatekoka.” (Oraha nanga o Efrata yanako hokä o Betlehem.)
8Maöraha o Yakub wämake o Yusuf ai ngoha-ngohaka gënanga, ünanga woleha, ”O nagona o ngoha-ngohaka nënanga?”
9O Yusuf wohaluhu, ”Nënanga tongohi ahingoha-ngohaka ma Jou Madutu wohihidöaka ngohino nenangokadau, o Mesir mabereraka.” O Yakub wïtemo, ”Nahitigi-tigino ngohino hupaya tahi barakati.” 10O Yakub womahimakeokaua de madiai karana iwi pereki oka deʼ ai lako i gawaka. O Yusuf wahi tigi-tigika aingoha-ngohaka gënanga o Yakubika, deʼ ünanga wäkololoinoli önanga wä ame. 11Daha o Yakub wïtemo o Yusufika, ”Mata-mata ahihininga koyödagiua aha homa makeoli dede ngona, ma o öraha nanga ma Jou Madutu i goungu wohihi gumal̄a tämakeö aningoha-ngohaka.” 12De ipaha o Yusuf wäl̄ë önanga o Yakub ai daparionoka, daha ünanga mahirete watilabukuku wohuba ai ama ai himangoka.
13-14Genanga de iböto o Yusuf wahi gogere aingohaka yahinoto imahi tigi-tigika o Yakubika, o Efraim madodoto makiditoko gënanga ai higiloka deʼ o Manasye woria-riaka ai nirakoka. Mä o Yakub wohiwelekino ai giama deʼ wakelenga ai giama maniraka o Efraim ai häeke mal̄okuoka, hode ai giama mahigili wakelenga o Manasye ai häeke mal̄okuoka. 15Genanga de i böto wihibarakati o Yusuf, wato,
”Ma Jou Madutu, ünanga ma Jou, o Abraham deʼ o Ishak iwi huba-huba,
Unanga ngohi wohi tuda hiädono o öraha nanga;
16Unanga o malaekat ngohi wohihi lapahioka hagala o boditoino.
Tanu ma Jou Madutu gënanga wahibarakati o ngoha-ngohaka nënanga.
Tanu kai gila-gila ahi romanga iwango de o Abraham deĘĽ o Ishak manga romanga
mangale karana o ngoha-ngohaka nënanga!
Tanu önanga de manga ngohaka de manga danongo,
deʼ yowöe manga difauku o duniaka.”
17O Yusuf wosanangiua maöraha wamake ai ama wakelenga ai giama maniraka o Efraim ai häeke mal̄okuku; daha wasö ai ama ai giama la watururu o Efraim ai häeke mal̄okuoka de o Manasye ai häeke mal̄okuika. 18Wïtemo ai Ama ika, ”Uha hoko gënanga Baba. Nënanga o ngohaka woria-riaka; nakelenga Baba ani giama maniraka ai häeke mal̄okuku.”
19Mä ai ama watila, wotemo, ”Ngohi tohiöriki, ahingohaka, ngohi tohiöriki. O Manasye aha ai kuaha i lamoko deʼ ai difauku ma aha yodadi o hoana de o berera ma ago-agomo. De ai dodoto ai difauku ahai iholoi iamoko mangakuaho de yodadi o hoana de o berera ma ago-agomo.”
20 #
Ibr. 11:21
Daha wahibarakatioli ai ngoha-ngohaka o wange gënanga, wato, ”O Israel manyawa aha yahetongo niaromanga nako önanga yahi barakati o nyawa. Onanga aha yotemo, ’Tanu ma Jou Madutu woni diai ngona hokä o Efraim deʼ o Manasye.’ ” De hoko gënanga o Yakub wïtotihira o Efraim ngaro de o Manasye.
21Daha o Yakub wïtemo o Yusufika, ”Hokä ngona namake, ahi ajali i tigioka, mama Jou Madutu aha winïriwo ngini deʼ winï ao ngini nilio niaete de niatohora manga bereraika. 22Ka ngonaika, deʼ aniriadodotikaua, ngohi tonihi döaka o Sikhem, o daera i boburere gënanga taora-oraino o Amori manyawaka de tongohi ahioworo deʼ ahitoimi.”
Currently Selected:
O KEJADIAN 48: TLB
Highlight
Share
Copy
Want to have your highlights saved across all your devices? Sign up or sign in
