Eksodusi 23

1U nga dzuki u wulawula timhaka ta mawunwa; u nga hlengeli ni wa kubiha u maha kustumunyu wo hemba.

2U nga lanzeli a ntlawa lowu wu mahako kubiha; u nga hlengeli ni xidlemo hubyeni, lexi xi hambukisako a nongameto.

3U nga tsetsi a xisiwana mhakeni ya xona le hubyeni.

4Loku u tlhangana ni homu ya nala wa wena, kutani i mbongola, na yi lahlekile, u ta yi heleketa ka nwinyi wa yona.

5Loku u wona a mbongola ya loyi a ku vengako na yi tikelwa hi nzhwalo wa yona, u nga mu tsiki yece, u fanele ku mu vuna ku yi tlhatlha.

6U nga byeketi a mhaka yi lulamileko ya xisiwana xa ka nwina le hubyeni.

7Chava mawunwa. U nga dayi loyi a nga hiko na nanzu ni loyi a lulamileko, hakuva nzi nga ta yimela a munhu wo biha, nzi mu hlaya loyi a lulamileko.

8U nga amukeli a zinyikiwo, hakuva zi vala a mahlo ya lava va wonako, kambe zi byeketa a timhaka ta lava va lulamileko le hubyeni.

9U nga xanisi a muluveli; nwina ma tiva malakanyo ya muluveli, hakuva nwinawu mu wa hi valuveli le Gipite.

10Lomu ka ntlhanu wa malembe ni ginwe, wena u ta rima a simu ga wena, u tshovela a mihanzu ya gona.

11Kanilezi hi lembe ga wuntlhanu ni mambiri, u ta gi tsika gi etlela, kasi a zisiwana za tiko ga nwina zaga mihanzu ya kona, zonake lezi zi salako zi ta giwa hi zihari. U ta maha zalezo hi zivina za wena ni maoliva ya wena.

12U ta tira mitiro ya wena hi ntlhanu wa masiku ni ginwe, kanilezi u ta humula hi siku ga wuntlhanu ni mambiri; ku ta humula ni homu ya wena, ni mbongola ya wena; ni nʼwana wa khumbi ya wena ni muluveli wa wena, vonawu va ta humula.

13Mu ta hlayisa zontlhe lezi nzi mu leleteleko. Mu nga dzuki mu kumbuka a mavito ya vanwani vanungungulu; ngha ma nga zwali milonwini ya nwina.

14U ta nzi mahela mutlhangano kanharu hi lembe.

15U ta hlayisa a mutlhangano wa zibaba zi nga comelwangiko; ka masiku ya ntlhanu ni mambiri, hi hweti ya Abibi, u taga a zibaba zi nga comelwangiko khwatsi hilezi u leletelweko; hakuva hi yona a hweti leyi u nga huma ha yona le Gipite. Hikwalaho a vanhu va nga dzuki va woneka mahlweni ka mina na va nga hi na nchumu.

16U ta hlayisa ni mutlhangano wa kuhula, wu nga wa mihanzu ya ntiro wa wena wa lezi u byeleko masinwini. Va ta hlayisa ni mutlhangano wa kuhlengeletela, kugumeseni ka lembe, loku u hlengeletele a mitiro ya masimu ya wena.

17A vavanuna va ta woneka mahlweni ka Hosi Jehova kanharu hi lembe.

18U nga humesi a nkhata wa muphahlo wa mina zinwe ni zibaba zi comelweko; ni mafura ya mutlhangano wa mina ma nga sali kala manziko.

19A mihanzu yo sangula ya tiko ga wena, u ta yi neha ndlwini ya Jehova, Nungungulu wa wena.

20Languta, nza ruma a ngelosi ya mina mahlweni ka wena, kasi yi fela ku ku hlayisa lomu ndleleni, yi ku chiketa tikweni legi nzi gi longisileko. Deut. 31:3; Isa. 63:9

21Chela kota ha yona, u ingisa a gezu ga yona, u nga yi kaneti, hakuva yi nga ta timisela hi kubiha ka nwina, hakuva yona yi na ni vito ga mina.

22Kanilezi loku u ingisa a gezu ga yona, u maha zontlhe lezi nzi ta nga ku byela, nzi ta maha a nala wa valala va wena, nzi ku lwela ka lava va ku vukelako.

23Hakuva a ngelosi ya mina yi ta ku rangela mahlweni, yi ku yisa tikweni ga vaAmori, ni vaHiti, ni vaPerezi, ni vaKanani, ni vaHivi, ni vajebusi, na vona nzi ta va lovisa.

24U nga khizameli vanungungulu vabye, u nga va khozeli, u nga mahi mikhuwo yabye; kanilezi u ta va daya vontlhe, u khungumula zifananiso zabye zontlhe.

25Khozelani Jehova, Nungungulu Wa nwina, zonake i ta katekisa a zakuga za nwina, ni mati ya nwina, a susa mababyi xikari ka nwina.

26Cima ku nga tava ni wasati a ta nga wonhekelwa hi rumbu, kutani wasati wa ngonwa tikweni ga wena. Nzi ta engetela a tsengo wa masiku ya wena.

27Nzi ta rumela kuchabya ka mina mahlweni ka wena, nzi ta hangalasa a vanhu lava u ta nga chikela ka vona; nzi ta panzanya a valala va wena vontlhe.

28Nzi ta rumela a mivi yi ku rangela mahlweni, yi hlongola vaHivi, ni vaKanani, ni vaHiti mahlweni ka wena.

29Nzi nga ta va susa mahlweni ka wena hi lembe ginwe, a tiko gi nga maha xiwula, zonake a zivanza za khwati zi anza, zi mu daya.

30Nzi ta va hlongola mahlweni ka wena hi kutsongwani ni kutsongwani; kasi nza mu nyika a xikhati xa kuva mu anza, mu aka tikweni gontlhe.

31Nzi ta panza a mbhingano wa wena kusukela Bimbini go Pswhuka kala bimbini ga maFilistia, ni kusukela xiwuleni kala ku chikela congweni; hakuva nzi ta mu hlulela a vaaki va tiko lego; mu ta va hlongola mahlweni ka nwina. Gen. 15:18; 1 Tih. 4:21

32U nga mahi xivumelwano navo, ge hambu ni vanungungulu vabye.

33Vona va nga aki lomu tikweni ga wena, va nga dzuka va ku onhisa mahlweni ka mina; hakuva loku u khozela a vanungungulu vabye, zonake va tava phanya ka wena.

Currently Selected:

Eksodusi 23: TSC72

Highlight

Copy

Compare