Eksodusi 24
24
1Nungungulu aku ka Mosi: Kanziha ka Jehova, wena na Aroni, na Nadabi, na Abihu, ni masingalakati ya ka Israeli ya 70, mu ta khizama na ma ha hi kule.
2Ku ta tshinela Mosi yece mahlweni ka Jehova; a vanwani va nga tshineli; ni vanhu va nga kanzihi zinwe naye.
3Zinghaho Mosi i loya byela a vanhu tontlhe timhaka ta Jehova, ni zileletelo zontlhe. Zonake a vanhu va lo hlamula hi gezu ginwe, vaku: A timhaka tontlhe leti ti wulilweko hi Jehova, hi ta ti maha.
4Mosi i lo tsala timhaka tontlhe ta Jehova, zonake i lo vinzuka ni mixo a aka a alati lahasi ka xitsunga, a yimisa a 12 wa timhinga ta maribye, a ku ringanisa a 12 wa tixaka ta ka Israeli.
5Zonake i lo ruma a majaha ya ka Israeli a ku nyikela a munyikelo wa kuhiswa, ni muphahlelo wa ku khesa Jehova hi tikuzi.
6Mosi i lo hungula wunwani nkhata a chela lomu mingelweni, a wunwani a nwatsekela alatini.
7I lo teka ni bhuku ga xivumelwano a gi gonza mahlweni ka vanhu; zonake a vanhu vaku: Zontlhe lezi Jehova a wulileko hi ta zi ingisa, hi zi maha.
8Zinghaho Mosi i lo teka a nkhata a nwatsekela vanhu ha wona, aku: Lowu hi nkhata wa xivumelwano lexi Jehova a mahileko zinwe na nwina hi tontlhe leti timhaka. Mat. 26:28; 1 Kor. 11:25; Maheb. 9:19; 1 Ped. 1:2
9Zonake Mosi, na Aroni; na Nadabi, na Abihu, ni 70 wa masingalakati ya ka Israeli, va lo kanziha va ya wona Nungungulu wa ka Israeli.
10Lahasi ka mikonzo yakwe ku wa hi ni xilo xo fanana ni ribye gi vatlilweko ga safira; xi wa ngangamela khwatsi i: tilo.
11Yena a nga tlakusangi a canja gakwe hehla ka tinjinga ta va ka Israeli; kanilezi va lo wona Nungungulu, zonake vaga, vanwa.
12Zonake Jehova aku ka Mosi: Kanziha uta leno xitsungeni u ta yima kona; nzi ta ku nyika a timbila ta maribye laya ma nga ni milayo ni zileletelo za mina lezi nzi zi tsalileko, kasi u va gonzisa zona.
13Mosi i lo suka zinwe na Joxua, a nanza gakwe; zonake Mosi i lo kanziha xitsungeni xa Nungungulu.
14Aku ka masingalakati: Yimani kwalaha, hi ta wuya hi ta mu kuma. Mu ta sala na Aroni na Hure; loye a ta ngava ni timhaka i ta ti neha ka vona.
15Mosi i lo kanziha xitsungeni; zonake a refu gi lo fenengeta xitsunga.
16A kungangamela ka Jehova ku lo tshama xitsungeni xa Sinai, ni refu gi lo xi fenengeta ntlhanu wa masiku ni ginwe; hi siku ga wuntlhanu ni mambiri i lo vitana Mosi na hi lomu refini.
17Zonake a kungangamela ka Jehova le hehla ka xitsunga ku lo woneka mahlweni ka vanana va ka Israeli kota nzilo wu vavamelako.
18Mosi i lo enghena refini, a kanziha xitsungeni a ya tshama kona 40 wa masiku ni 40 wa wusiku.
Currently Selected:
Eksodusi 24: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
