Omochakano 49

Yakobo ogosesenia abana baye

1Erio Yakobo akarangeria abamura baye, akabateebia: “Sangererekana aa ase ’nde, mbateebie amang’ana arabanyore ase amatuko agochi‐gocha.

2“Inchuo montegerere, inwe abana ba Yakobo; montegerere inche Israeli iso.

3“Rubeni, aye nomwana one omotangi,

aye nokobua kwane, na ogotongora gwe chinguru chiane.

Noetanetie abamino ase okobua,

nobaetanetie ase chinguru.

4Aye nkwaberete buna amaache;

korende togoetania abande,

ekiagera nkwarinete borere bwa iso, okabosaria, ase igo okarenta obosooku.

5“Simioni na Lawi naba ng’ina omo,

ebirwanero biabo nebi’obotindi.

6Omoyo one tosoa ase obobisi bwabo,

gose enkoro yane tesanga ase omosangererekano obo;

naki ase endamwamu yabo mbaitete abanto,

na ase obomwenu bwabo bakanacha chinteng’e chie chintang’ana.

7Endamwamu yabo eragererigwe, ekiagera nigo yareenge entindi,

na ekeririanda kiabo, ekiagera tikiareenge namaabera.

Nimbaatanane ase abana ba Yakobo,

nimbasiarere ase abana ba Israeli.

8“Aye Yuda, abamino inabagotogie;

okoboko kwao inakobwate ebigoti biababisa bao;

abamura ba iso ng’a batugame bosio bwao na amasikani.

9 # Omob 24:9; Okom 5:5 Yuda, aye nendo ensae.

Omwana one, gokorwa gotwara, nigo oratiire,

na korara, na gotimoka buna endo,

buna endo eaberi, ning’o orabe noboremu kogotura?

10Enyimbo y’obogaambi tekorua o Yuda,

gose omobeeki amachiiko ase ororeeria rwaye,

goika achiche oyo orabogorie obogaambi,

oyo abanto b’ebisaku bionsi baraigwere.

11Nigo arasibe etigere yaye ase omote bw’omosabibu,

na emori y’etigere yaye ase chinsagia chi’omosabibu omuya.

Nigo arasibie egetambaa kiaye akwambara nedivai,

ne chianga chiaye n’amaache amonyinga y’amasabibu

12Amaiso aye nigo arabe amabariri ase okonywa edivai,

na amaino aye abe amarabu ase okonywa amabeere.#49:12 okonywa amabeere: engencho yaye, nigo babwate obotenenku bw’endagera

13“Sabuloni nigo aramenye ase enyancha mbarabare,

agwo ase chimeeri chigotenenigwa,

orobebe rwaye rosinyane norw’Abasidoni.

14“Isakaru netigere ere ne chinguru, ekorara obweri bwe chitugo.

15Akarora ng’a aase agotimokera naagiya,

na ense eria nero ekomogwenera.

Ase igo, agekumba abogorie egurube,

akerua kogenderera nemeremo emekong’u.

16“Dani nagambere abanto baye,

buna egesaku ekemo ki’Abaisraeli.

17Dani nabe eng’iti ekweriba inchera,

ring’ere ase oboeto,

rikoroma egetingiro ki’ebarasi,

goika oyoyeriinete agwe masogota.

18Aye Omonene, ninganyete ogotooreka kwao nogosemeria!

19“Gadi namigwe nemeganda y’abauri,

korende nere nabamige korwa magega.

20“Aseri natware endagera y’obonoru,

narue endagera engiya eragwenere abarwoti.

21“Nafutali nengabi esiboire ekominyoka mono,

nigo ekobiara chimanwa chingiya.

22“Yusufu nomote omorere okwama ang’e nensoko;

chinsagia chiaye nigo chikoranda enyasi igoro.

23Abaruti emegwe bakomoimokera ase okomogwera n’bororo,

bakomoruta emegwe na komoorosia,

24korende obota bwaye tibogosukigwa.

Amaboko aye nigo are ne chinguru, naende namaango,

goetera ase amaboko ’Omonyene Chinguru o Yakobo,

oyore Omorisia na Egetare gia Israeli.

25Nyasae o iso, nere oragokonye,

Nyasae Omobui, nere oragosesenie

nogosesenigwa gokorwa igoro,

na ogosesenigwa gokorwa chindiba inse,

na ogosesenigwa gokorwa inda na ase chimbeere.

26Ogosesenigwa gwa iso nkore ne chinguru

ngoetanetie okw’ebitunwa bia kare,

na obonene bw’ebigoro bia kare na kare.

Ogosesenigwa okwo kobe egutwa ase omotwe o Yusufu,

igoro y’egiototeri ki’oyore omogambi ase egati y’abamwabo.

27“Benjamini n’eseese y’orosana ekoria mono,

engaki ya mambia yaria ebi’obotwari bwaye,

na engaki ya mogoroba bwatanana ebiasakoire.”

28Ebi nabio ebisaku bia Israeli ikomi na bibere; naya naro ise abateebetie ekero are kobasesenia na koa kera oyomo ogosesenigwa kwaye.

Ogokwa kwa Yakobo

29Erio Israeli akabachiika, akabora: “Inche nkoirwa inde gosangererekana amo nabaanto baane. Montindeke ase chisokoro chiane chiatindegetwe ase rikuruma ri’oboremo bware bw’Efuroni Omohiti, 30#Omoch 23:3-20rikuruma eri rire ase oboremo agwo Makipela, moocha ya Mamure, ase ense ya Kaanani. Oboremo boria Aburaamu agorete korwa ase Efuroni Omohiti bobe aase ogotindeka. 31#Omoch 25:9,10; Omoch 35:29Agwo nao Aburaamu atindegetwe ase Sara mokaye ensemo; agwo nao Isaka na Rebeka mokaye batindegetwe, na agwo inche omonyene natindegete Lea. 32Oboremo obwo amo ne rikuruma riria nigo biagoretwe korwa ase Abahiti.” 33#Ogok 7:15Ekero Yakobo akoorete gochiika abamura baye amang’ana aya, akaimokia amagoro aye, akayabeeka borere igoro; erio agakwa, erio agasangererekana amo nabaanto baye.

Currently Selected:

Omochakano 49: EKGE

Highlight

Copy