Kulonga 15
15
Lwiimbo lwa Mozesi
1Lino Mozesi a Baisilayeli bakaimba lwiimbo oolu ku Mwami Leza:
“Ndilamwiimbila Mwami Leza nkaambo wazunda akulemekwa.
Mabbiza autantide waziwaala mulwizi.
2Mwami Leza ninguzu zyangu
alimwi ngonguwe ngwetiimbile, ngonguwe wandifutula.
Ngo Leza wangu nkaako ndilamutembaula,
Leza wataata, ndiyoomusumpula mulwiimbo.
3Mwami Leza ngusilumamba,
ncali ngo Mwami Leza zina lyakwe.
4Wakasowela nkalaki abasilumamba ba Falo mulwizi,
basilutwe bakwe bakanyikila mu Lwizi Lusalala.
5Lwizi lulamfu lwakabamena, bakambombomena mbuli bbwe.
6Nguzu zyajanza lyako lyalulyo, O Mwami Leza, zilagambya,
zilabatyoloola basinkondonyoko muzibeela-zibeela.
7Mukuzunda kwako kwanguzu ulabamaninizya basinkondonyoko,
bukali bwako bulavutuka mbuli mulilo, bulabaumpa mbuli kuti mbwizu.
8Wakafula, eelyo muuya wako wakacita maanzi kuti alundane aamwi
maanzi aakunka akaima nji mbuli bwaanda,
lwizi mpolwiinda kulampa lwakayuma nta.
9Sinkondoma wakati, ‘Ndiyoobatandaanya ndikabajate,
ndiyooaba buvubi bwabo, akutola eezyo nzeyanda.
Ndiyoogwisya panga lyangu, ndiyoobanyonyoona ajanza langu.’
10Pele wakafula muuya wako, lwizi lwakabamena,
bakabbila mbuli lubulo kunsi amaanzi anguzu.
11Akati kabaabo bategwa baleza,
nguni uuli mbuli nduwe O Mwami Leza?
Nguni uuli mbuli nduwe,
uugambya, mulemu, uusalala?
Nguni uuli mbuli nduwe, uucita zigambya.
Uuyoosya mumilimo mipati?
12Wakatandabika janza lyako lyalulyo,
mpoonya nyika yakabamena.
13Muluyando lwako lutamani wakasolwedela baabo mbookavuna,
anguzu zyako wakabasindikila kuŋanda yako iisalala.
14Misyobo yakamvwa, yakatuntuma mukuyoowa.
Kuyoowa kupati kwabajata Bafilisiti.
15Bami ba Baedomu baliyoowede.
Basinguzu baku Mowabu bakatalika kutuntuma,
boonse bakkala mu Kenani batyompwa.
16Balayoowa, lyabaleka kapati,
akaambo kabupati bwanguzu zyako,
baima buyo zingiti mbuli bbwe,
mane bantu bako, O Mwami Leza, bainde.
Mane bantu bako mbookanununa bainde.
17Uyoobeeta akubabikka acilundu cako,
busena oobo mbookabamba ŋanda yako, O Mwami Leza.
Eeci ncikombelo, O Mwami Leza, yebo lwako ncookaliyakila.
18Mwami Leza unooli ngomuleli walyoonse alyoonse.”
Lwiimbo lwa Miliyamu
19Lino mabbiza aa Falo, ankalaki zyakwe, abasimabbiza bakwe zyakanjila mulwizi, nkabela Mwami Leza wakaaboozya maanzi aalwizi akuzivumba. Pele Baisilayeli bakazubuka lwizi anyika njumu.
20Aawo Miliyamu, musinsimi mukaintu, mucizi wa Aloni, wakabweza nsakalala, mpoonya bakaintunyina bakamutobela kabaya bulizya nsakalala akuzyana. 21Miliyamu wakaimba kaimbo aaka,
“Atwiimbile Mwami Leza nkaambo wazunda, walemekwa, bbiza autantide waziwaalila mulwizi.”
Zyamaanzi aalula
22Lino Mozesi wakaambila Baisilayeli kuti balibambile kweenda kuti basiye Lwizi Lusalala, mpawo bakaya munkanda ya Syuu. Bakeenda mazuba otatwe munkanda, pele taakwe nibakajana maanzi. 23Eelyo bakasika ku Malaa, pele maanzi akali kulula cakuti tiibakali kukonzya kwaanywa. Ncenciceeco ncikwakategwa Malaa. 24Nkabela bantu bakatongookela Mozesi akumubuzya kuti, “Ino tunywe nzi?” 25Mozesi wakakomba ku Mwami Leza, mpoonya Mwami Leza wakamutondezya cisamu, wakacibikka mumaanzi, aawo maanzi akaleka kulula.
Lino ooko Mwami Leza wakabapa mulawo mupati amalailile, alimwi ooko nkukonya wakabasunka. 26Wakati, “Kuti naa mundiswiilile ncobeni nde Leza wanu, akucita eeco ncetimwaambile kuti cililuzi, akutobela malailile aangu akubamba nzendimwaambila mumilawo yangu, inga nsikamusubuli amalwazi aayo ngindakaleta ku Ijipiti. Ndime Mwami Leza uumuponya.”
27Lino kuzwa aawo bakaakusika kubusena butegwa Elimu, kwakali tusensa tuli kkumi atubili, alimwi atukunka tuli makumi aali ciloba. Ooko bakalyookezya akuyaka zivuka kumbali amaanzi.
Currently Selected:
Kulonga 15: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
