Kulonga 19

Baisilayeli mbubakasika kucilundu ca Sinai

1Mubuzuba butaanzi bwamwezi watatu kuzwa ciindi Baisilayeli kabazwide kale mu Ijipiti bakasika kunkanda ya Sinai. 2Bakasiya busena butegwa Lefidimu akusika kunkanda ya Sinai ooko kwalo nkobakayakila zivuka munsi aacilundu. 3Walo Mozesi wakatanta mucilundu eeco kuti akaswaangane a Leza.

Lino Mwami Leza wakaita Mozesi mucilundu oomo wakati, “Mboobu mboelede kwaambila bana balunyungu lwa Jakobo, Baisilayeli kuti, 4‘Mwakabona ncendakacita ku Baijipiti, ambuli mbundakamunununa nywebo amababa aabasikwaze, aakumuleta kulindime. 5Aboobo lino, kuti mundiswiilile akubamba cizuminano cangu, mulaba bantu bangu ncobeni. Nikuba kuti nyika yoonse mbwiibede njiyangu, nywebo muyooba bantu bangu basale. 6Muyooba bantu bandibelekela mbuli bapaizi, musyobo uusalala.’ Oobu mboelede kubaambila Baisilayeli.” 7Aboobo Mozesi wakabweeda akuyooita basololi babantu boonse akubaambila zyoonse Mwami Leza nzyaakamwaambila. 8Mpoonya bantu boonse bakavwiila antoomwe kuti, “Tulacita zyoonse nzyaamba Mwami Leza.” Eelyo Mozesi wakaakwaambila Mwami Leza makani aaya.

9Lino Mwami Leza wakati kuli Mozesi, “Ndiyooboola kulinduwe mukkumbi pati lisiya kuti bantu bazoondimvwe ndanooambaula ayebo kutegwa kabakuzuminina lyoonse.” Mozesi wakaambila Leza eeco ncobakaingula bantu.

10Lino Mwami Leza wakati kuli Mozesi, “Koya kubantu, ukabaambile kuti balibambile kukomba sunu ajuunza. Baleelede kusanzya zisani zyabo 11kutegwa izona kabazoolibambilide. Nkabela mubuzuba oobo, ime nde Mwami Leza ndizooselukila acilundu ca Sinai kababwene bantu boonse. 12Uleelede kuyoobeengela munyinza bantu kuzinguluka cilundu, alimwi ukabaambile kuti, ‘Amucenjele kuti mutakatanti cilundu nikuba kuciguma pe. Kufumbwa ooyo uutikacigume, uyoojaigwa. 13Uleelede kuumwa mabwe nikuba kuyaswa amivwi kakunyina aumuguma. Eeci cilajatikizya bantu abanyama. Kwaakusibwa mweembo walwija lwamugutu, bantu bakainke kucilundu.’”

14Lino Mozesi wakaseluka kuzwa mucilundu akuunka kubantu, wakabaambila kuti balibambile kuya kukukomba. Bakasanzya zisani zyabo, 15amane Mozesi wakati kulimbabo, “Amulibambilile buzuba bwazona. Mutakooni bulo bomwe amukaintu pe.”

16Lino mucifumo-fumo cabuzuba bwatatu, kwakali kuzuma andabo acilundu, alimwi kwakali akkumbi pati lisiya mbi, akulila kupati kwamweembo walwija lwamugutu. Nkabela bantu boonse muzivuka bakali kuzyangama akuyoowa. 17Eelyo Mozesi wakasolweda bantu kuzwa azivuka kuya kukuswaangana a Leza, bakaakwiima kumbali lyacilundu. 18Nkabela cilundu ca Sinai coonse cakali kuunta busi, nkaambo Mwami Leza wakaselukila alincico muciimo camulilo. Busi bwakali kusunta musumpuululu, lino bantu boonse bakali kuzyangama kapati. 19Awalo mweembo wakali buya bulilisya. Mozesi naakaambaula, Leza wakamuvuwa mukuzuma. 20Mwami Leza wakaselukila acilundu ca Sinai, mpoonya wakaita Mozesi kuti atante acilundu, eelyo Mozesi wakainka. 21Mwami Leza wakati kuli Mozesi, “Seluka, koya ukabacenjezye bantu kuti batasotoki munyinza akuboola kuzoondilanga, nkaambo inga bunji bwabo bafwa. 22Nobaba bapaizi aabo batiboole aafwiifwi ambebo baleelede kusaanguna kulisalazya lwabo, nkaambo kuti bataciti boobo inga ndabasubula.” 23Mozesi wakati ku Mwami Leza, “Bantu tabakonzyi kutanta mucilundu ca Sinai, nkaambo wakatucenjezya kuti, ‘Amweenge munyinza munsi acilundu akuucita kuti bube busena butondwa.’” 24Mpoonya Mwami Leza wakati kuli nguwe, “Seluka ukalete Aloni. Pele bapaizi abantu buyo tabeelede kusotoka munyinza akuboola kulindime, nkaambo inga ndabasubula.” 25Mpawo Mozesi wakabweeda kubantu akuyoobaambila eezi.

Currently Selected:

Kulonga 19: Tonga96

Highlight

Compare

Copy