Kulonga 27

Cipaililo

(Kulonga 38.1-7)

1“Cipaililo mukaciyake amapulanga aamulombe. Kacinooyoojisi mabazu one aajisi bulamfu bweelene bulampa tukokola tosanwe, abwamba buli tukokola tosanwe, bulamfu bwamujulu kabuli tukokola totatwe. 2Mutuswi twaco tone ukabikke meja anooimvwi. Kaajisilizi kucipaililo, eelyo coonse cikazilululwe amukuba. 3Alimwi ukafule zibelesyo zyacipaililo zyamukuba zyakuyolela twe, alimwi ukapange amafocolo, mbede, ngobyoobyo, ankaye zyamulilo. Zyoonse zibelesyo zyacipaililo zikapangwe amukuba. 4Alimwi cipaililo mukacipangile mbaula yamasuwa atubulo tupatangene twamukuba. Nkabela muzyooko zyamasuwa aambaula eeyo, ukabikke tuninga tone twamukuba twakuyumwida. 5Masuwa ambaula eeyo ukaabikke kunsi lyamubalo wacipaililo kuti kuusika akati-kati kacipaililo nkociya mujulu. 6Wamana ukacite tukulisyo twamulombe ukatuzilulule amukuba. 7Tukulisyo ootu ntwakusekka muninga zyacipaililo kumabazu aaco obilo mocinooyumwidwa. 8Cipaililo ukacipange amapulanga mumabali kakutakwe cintu muli ncico. Ukacipange mbuli mbookatondezegwa acilundu.”

Kubambwa kwabbuwa lyatente

(Kulonga 38.9-20)

9“Wamana ukayake bbuwa lyatente. Kulubazu lwakumusanza masani aakusitilizya aandeketela akasumwe kuzwa kumasani mateteete mabotu aalampa tukokola tuli mwaanda lubazu lomwe, 10kaajisini kumisemo yamukuba iili makumi obilo iijisi ziimino zyamukuba zili makumi obilo, ukabikke kumisemo yamukuba iijisi ngobyoobyo atusako twansiliva. 11Mbubonya oobo kulubazu lwakunyika kuyooba masani aakusitilizya aalampa tukokola tuli mwaanda, aajatene amisemo yamukuba iili makumi obilo aziimino zyamukuba zili makumi obilo, kakuli ngobyoobyo atusako twansiliva. 12Bwamba bwabbuwa kulubazu lwakumbo linoojisi masani aakusitilizya aalampa tukokola tuli makumi osanwe amisemo iili kkumi iijisi ziimino zili kkumi. 13Kulubazu lwakujwe kumanjililo, bbuwa kalijisi bwamba bulampa tukokola tuli makumi osanwe. 14Eelyo kulubazu lumwi lwamulyango kukabe masani aakusitilizya aalampa tukokola tuli kkumi atusanu, kakuli misemo aziimino zyotatwe. 15Kulubazu lumwi kukabe masani aakusitilizya aalampa tukokola tuli kkumi atusanu kumbali aakumulyango aakajisi misemo yotatwe aziimino zyotatwe. 16Lino mulyango walyo ukabe asani lyakusitilizya lilampa tukokola tuli makumi obilo twamusyobo wacijulu-julu, wacisombo, abutonje busalala pyu asani liteteete lisumidwe kabotu cakweebeka. Isani eelyo kalisuminidwe kumisemo yone alimwi lyakali cekawidwe. 17Lino misemo yoonse yabbuwa iyooswaanganyizigwa atusako twansiliva, ngobyoobyo kazili zyansiliva, ziimino kazili zyamukuba. 18Bbuwa lileelede kulampa tukokola tuli mwaanda, bwamba bukabe tukokola tuli makumi osanwe, abulamfu bwakuya mujulu buli tukokola tosanwe. Masani aakusitilizya akasumwe kuzwa kusani lyandeketela, ziimino kazili zyamukuba. 19Lino zibelesyo zyoonse zyakubelesya mutente, anembe zya bbuwa, zyoonse buyo kufumbwa zibelesegwa mumilimo noiba buti, zileelede kuti kazili zyamukuba.”

Kubamba lambe

(Bapaizi 24.1-4)

20“Ubalailile Baisilayeli kuti kabakuletela mungwimba mubotu waoliva, ukabikke mulambe kutegwa lambe kaliyaka lyoonse buyo kalitazimini. 21Aloni abana bakwe balombe balibikke lambe eeli mutente oomo Leza mwaswaanganina abantu bakwe, anze lyamasani aacisitilizyo kumbele lyabbokesi lyacizuminano. Nkonkuko ooko kumbele lya Mwami Leza lambe kalinooyaka kuzwida kumangolezya mane cifumo-fumo. Malailile aaya aleelede kuyoobambwa a Baisilayeli alimwi abana balunyungu lwabo lyoonse buyo mane kukabe kutamani.

Currently Selected:

Kulonga 27: Tonga96

Highlight

Compare

Copy