Kulonga 31
31
Babelesi babamba tente lya Mwami Leza
(Kulonga 35.30—36.1)
1Lino Mwami Leza wakati kuli Mozesi, 2“Ndasala Bezaleli mwana wa Uli, mwanaa Hula, wamusyobo wa Juda. 3Ndamuzuzya a Muuya wa Leza kutegwa abe amaanu abuuya, busongo, alimwi aluzibo mumilimo yoonse yamaanza, 4kuti akonzye kucita zintu zyeebeka akuzibumba angolida, nsiliva alimwi amukuba, 5kubeza mabwe meebesi, aakusyomaika kubeza zisamu, akucita milimo imwi yeebeka mibotu. 6Nkabela ndasala sikumugwasya Oholiyabu mwana wa Ahisamaki, wamusyobo wa Dani. Kuli bamwi boonse bantu basikubamba ndapa busongo bunji kutegwa bakakonzye kuyoocita zyoonse nzendakulailila. 7Babambe tente lyakuswaanganina, abbokesi lijisi mabwe aaciibalusyo, acivunisyo calyo, alimwi azintu zyoonse zyamutente, 8tebule azibelesyo zyaco zyoonse, cikkalilo calambe cangolida iini-ini, azibelesyo zyaco zyoonse, cipaililo cakutentela tununkilizyo, 9acipaililo cazipaizyo zitentwa, azibelesyo zyaco zyoonse, mitiba yakusambila atako lyawo, 10azisani zyeebesi zisalala zyamupaizi Aloni abana bakwe zyobabelesya mumilimo yabo, 11mafuta aakunana, alimwi atununkilizyo tununkilila kabotu twamubusena busalalisya. Nkabela mukucita zintu eezi zyoonse baleelede kuti bakazicite mbubonya mbuli mbundakulailila.”
Sabata buzuba bwakulyookezya
12Lino Mwami Leza wakati kuli Mozesi, 13“Ubaambile Baisilayeli kuti, ‘Muleelede kububamba buzuba bwa Sabata, nkaambo buzuba oobu mbwacitondezyo akati kangu andinywe alimwi abalunyungu lwanu, kutondezya kuti mebo nde Mwami Leza ndakamucita nywebo kuba bantu bangu. 14Aboobo muleelede kububamba buzuba bwa Sabata, nkaambo bulasalala kulindinywe. Kufumbwa muntu uutabubambi akubusalazya uleelede kujaigwa. Muntu woonse uubeleka mulimo mubuzuba bwa Sabata uyoogwisigwa akati kabantu bokwabo. 15Muleelede kubeleka milimo yanu kwamazuba aali cisambomwe, pele buzuba bwaciloba mbuzuba bwakulyookezya, bulasalala ku Mwami Leza. Kufumbwa uucita mulimo mubuzuba oobo uyoojaigwa. 16Baisilayeli baleelede kububamba buzuba bwaciloba, mumazyalani oonse aayooboola akububamba kuti bukabe cizuminano citamani. 17Mbwacitondezyo citamani akati kangu a Baisilayeli, nkaambo kakuti mebo nde Mwami Leza, ndakalenga julu anyika mumazuba aali cisambomwe, nkabela mubuzuba bwaciloba ndakaleka kubeleka, ndakalyookezya.’”
18Lino Mwami Leza naakamanizya kwaambaula kuli Mozesi acilundu ca Sinai, wakamupa zilembelo zyamabwe obilo aaciibalusyo, mabwe aakalembedwe amunwe wini wa Mwami Leza.
Currently Selected:
Kulonga 31: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
