Kulonga 37

Kupangwa kwabbokesi lyacizuminano

(Kulonga 25.10-22)

1Lino Bezaleli wakapanga bbokesi lyacizuminano amapulanga aamulombe. Bulamfu bwalyo bwakali tukokola tobilo acisela, bwamba bwakali kakokola komwe acisela, bulamfu bwakuya mujulu bwakali kakokola komwe acisela. 2Wakalizilulula angolida mukati aanze, keengwe kangolida kulizingulusya lyoonse. 3Alimwi wakapanga tuninga tone twangolida twakuliyumwida akutunamatika kumaulu aalyo one, tuninga tobilo kulubazu lomwe-lomwe. 4Wakacita tukulisyo twamulombe akutuzilulula angolida. 5Tukulisyo ootu wakatusekka mutuninga kubbazu limwi alimwi lyabbokesi, tukabe twakuliyumwida. 6Kumane Bezaleli wakapanga civunisyo cangolida iini-ini cilampa tukokola tobilo acisela, abwamba bwakakokola komwe acisela. 7Kumamanino aacivunisyo wakabikka zikozyanyo zyobilo zyabakelibu bobilo bangolida yoondedwe ansando. 8Umwi aumwi kulubazu lumwi. Wakababumba cakuti bakalinamatide kucivunisyo. 9Nkabela mababa aa Bakelibu aaba aleelede kunooyoobabamukide kabavumbilide civunisyo, balo lwabo bakalangene, meso aaumwi aumwi wabo akaduname acivunisyo.

Kupangwa kwatebule

(Kulonga 25.23-30)

10Lino wakapanga tebule amapulanga aamulombe. Lyakali kulampa tukokola tobilo, bwamba bwakali kakokola komwe, abulamfu buya mujulu bwakali kakokola komwe acisela. 11Wakalizilulula angolida iini-ini, akweenga keengwe kangolida kalizingulukide. 12Alimwi wakalizingulusya amubalo uuli mbuli bwaasa bwajanza, nkabela wakeenga amubalo ooyo keengwe kangolida. 13Wakapanga tuninga tone twangolida twakuliyumwida, wakatunamatika muziswi zyone, oomo mukkede maulu. 14Tuninga twakuliyumwida tebule tuleelede kubikkwa munsi aamubalo, naakamana wakasekka tukulisyo twakuliyumwida mulintuto. 15Tukulisyo ooto twakali twamulombe twakazilulwidwe angolida. 16Azyalo zibelesyo eezi zyaatebule wakazibumba angolida iini-ini, mitiba, nkomeki alimwi azyakubikkila tununkilizyo, tunongo ankomeki zimwi zyakutuuzizya zyakunywa.

Kupanga cikkalilo calambe

(Kulonga 25.31-40)

17Wakapanga cikkalilo calambe cangolida iini-ini. Tako amusemo waco zyakali zyangolida yoondedwe ansando. Alimwi malanga-langa amaluba-luba aaco aakucibotya, kubikkilizya azisyuukila amatu aaco akalijisini acikkalilo cini. 18Cakalijisi mitabi iili cisambomwe, kumabazu aaco, yotatwe kubbazu limwi alimwi. 19Omwe-omwe wamitabi eeyo iili cisambomwe wakajisi malanga-langa amaluba-luba aakubotya otatwe aali mbuli aaalumondi, kaajisi azisyuukila amatu. 20Musemo waco cikkalilo calambe wakajisi nkomeki zyone zili mbuli maluba-luba aaalumondi zijisi malanga-langa amaluba-luba aakubotya. 21Kwakali cisyuukila comwe, munsi lyaimwi yobilo mitabi iikkede aamwi. 22Zisyuukila alimwi amitabi yakalijisini aamwi acikkalilo calambe, cinooli cintu buyo angolida yoondedwe ansando. 23Wakapanga malambe aaco aali ciloba, lumano ankaye zyaco zyakali zyangolida iini-ini. 24Wakabelesya ngolida iilema talenta lyomwe mukupanga cikkalilo calambe azibelesyo zyaco zyoonse.

Cipaililo catununkilizyo

(Kulonga 30.1-5)

25Wakayaka cipaililo cakutentela tununkilizyo amapulanga aamulombe, cakaleelene mubulamfu mumabazu aaco oonse one. Mubulamfu cakali kulampa kakokola komwe, amwalo mubwamba cakali kulampa kakokola komwe bulamfu bwabwaanda kuya mujulu bwakali tukokola tobilo. Meja aaco akalijisini aamwi acinyina. 26Mpocili atala wakacizilulula angolida, wakazilulula oonse mabazu aaco one, mane a meja oonse angolida iini-ini. Alimwi wakacizingulusya amoombe wangolida. 27Wakapanga tuninga tobilo twangolida twakuciyumwida. Wakatunamatika munsi lyamoombe kumabazu aayo obilo kutegwa kakusyomekwa tukulisyo twakuliyumwida. 28Wakabamba tukulisyo twamulombe ooto ntwaakazilulula angolida.

Mafuta aakunana aasalala

(Kulonga 30.22-38)

29Kumane wakapanga mafuta aasalala aakunana atununkilizyo tubotu mbubonya mbuli mbobacita basikupanga tununkilizyo.

Currently Selected:

Kulonga 37: Tonga96

Highlight

Compare

Copy