Kulonga 39

Zisani zyabapaizi

(Kulonga 28.1-14)

1Lino zisani zibotu zyabulemu zyabapaizi bakazisuma kuzwa kumilembo yacijulu-julu ayacisombo, abutonje busalala pyu, nzibakali kusama bapaizi banooli mumilimo yabo mubusena busalala mutente lya Leza. Aloni bakamusumina zisani zyakwe mbubonya mbuli Mwami Leza mbwaakalailila Mozesi.

2Bakaluka kabaki kabupaizi atutali twangolida amasani aamusyobo wacijulu-julu, cisombo alimwi abutonje busalala pyu ayatutali toosedwe kabotu. 3Bakoonda ngolida mutupapali, bamane biitendulula tutali kuti tulukwe mumilembo yacijulu-julu, ayacisombo alimwi aisalala pyu amundeketela kunyembaula kabotu-kabotu. 4Bakaluka mikosi yakabaki yobilo yaaciwezo akwiisumina kumabazu aako obilo, yakukaanzya kusama. 5Lutambo lusumidwe mbubonya oobo lunoojisini ankako, kutegwa kaluli lomwe ankako. Lwakali lwamilembo yangolida, yacijulu-julu ayacisombo aisalala pyu alimwi atutali twandeketela toosedwe kabotu, mbubonya mbuli Mwami Leza mbwaakalailila Mozesi. 6Mabwe aamakwalala acibize wakaabikka azikkalilo zyangolida, wakasimba mazina aabana balombe Baisilayeli mulinguwo. 7Bakaabikka amikosi yakabaki kabupaizi, kuti abe ciibalusyo cabana balombe Baisilayeli, mbubonya mbuli Mwami Leza mbwaakalailila Mozesi zya kabaki kaacamba.

Kulukwa kwakabaki kaacamba

(Kulonga 28.15-30)

8Kumane bakaluka kabaki kaacamba kakusinsimya, kakalukidwe kabotu mbubonya mbuli kabaki kabupaizi. Bakakaluka atutali twangolida, atwacijulu-julu atwacisombo atwabutonje busalala pyu atutali twandeketela toosedwe kabotu. 9Bakakaluka kuti kakeelene mumabazu aako oonse one alimwi kakaimpwa kobilo, kakali kulampa bwaasa bwajanza lyomwe, amwalo mubwamba kakali bwaasa bomwe. 10Bakabikka mizila yone yamabwe meebesi alinkako. Mumuzila wakusaanguna bakabikka bbwe lyadowa-lowa, limwi lyacisuku, limwi lyacisila. 11Mumuzila wabili bakabikka bbwe lyamweemvwe, limwi lyacijulu-julu, alimwi lituba buu. 12Mumuzila watatu bakabikka bbwe lyacikambwe, limwi lyamakwalala aazingulukide, alimwi lyacisombo. 13Mumuzila wane bakabikka bbwe lyanyanzabili, limwi lyamakwalala acibize, alimwi lyantuntulwa. Akasekkedwe mututali twangolida. 14Kwakali mabwe meebesi aali kkumi aabili, aakasimbidwe mazina aabana balombe Baisilayeli. Mazina aaya ngakwiiminina misyobo iili kkumi aibili ya Baisilayeli. 15Kabaki kaacamba wakakacitila tuwenge twangolida toosedwe mbuli lutambo. 16Bakapanga zikkalilo zyangolida zyobilo atuninga tobilo twangolida, akutunamatika kuziswi zyakabaki kaatala. 17Nkabela wakaanga tuwenge twangolida kutuninga tobilo kuziswi zyakabaki kaatala, 18akwaanga mpela zimwi zyatuwenge kuzikkazikilo zyobilo eezyo. Munzila eeyi bakatwaangilila kumbele kumikosi yaaciwezo yakabaki kubupaizi. 19Bakapanga tuninga tobilo twangolida akutwaangilila kuziswi zyobilo zyaansi zyakabaki kabupaizi. 20Tuninga tobilo twangolida, bakatuswaanganya atutambo twakabaki kabupaizi, mpokagumanina alutambo lulukidwe kabotu. 21Tuninga ooto twakabaki kaacamba bakatwaangilila kuli twakabaki kabupaizi, alutambo lwacijulu-julu kutegwa kabaki kaacamba kakagumene atala lyalutambo kakatatebunuki pe, mbubonya mbuli Mwami Leza mbwaakalailila Mozesi.

Zisani zimwi zyabapaizi

(Kulonga 28.31-43)

22Lino jansi eelyo lisamwa atala akabaki kabupaizi bakalisumya abutonje bwacijulu-julu bwalo. 23Nkabela mpolili akati kwakasiigwa nsingo yakunjilila mutwe. Eeyi nsingo yakajisi amoombe uusumidwe kabotu kuti kaitazapuki. 24Lino kumoombe walyo wakunsi bakasuminizya amicelo yamapomegileneti aacijulu-julu, cisombo alimwi abutonje busalala pyu atutali twandeketela toosedwe kabotu, kuuzinguluka woonse. 25Bakapanga abulangu-langu bwangolida iini-ini akati kamicelo yamapomegileneti kuzinguluka moombe woonse. 26Aboobo bulangu-langu oobu amapomegileneti akazinguluka moombe woonse wajansi lyakusama ciindi Aloni nali mumulimo wabupaizi, mbubonya mbuli Mwami Leza mbwaakalailila Mozesi.

27Zisani zya Aloni abana bakwe bakazisuma andeketela, 28misini azingundu zyabo zyakali zyandeketela. Alimwi tubbudula twabo twakali twandeketela yoosedwe kabotu. 29Misini yakali yatutali twandeketela toosedwe kabotu, twamusyobo wacijulu-julu atwacisombo alimwi atusalala pyu, yakacekaulwa, mbubonya mbuli Mwami Leza mbwaakalailila Mozesi. 30Alimwi bakacita mpande yabulemu yangolida citondezyo cakulipa kumulimo wa Mwami Leza, bakalemba mbubonya zigantyo akalembedwe kuti, “Ulipedwe ku Mwami Leza.” 31Bakayaangilila kucingundu akatambo kacijulu-julu, mbubonya mbuli Mwami Leza mbwaakailila Mozesi.

Kumanizya mulimo

(Kulonga 35.10-19)

32Nkaako mulimo woonse watente lyakuswaanganina wakamana. Baisilayeli bakacita zintu zyoonse mbubonya mbuli Mwami Leza mbwaakalailila Mozesi. 33Bakaleta kuli Mozesi tente eelyo, azibelesyo zyalyo zyoonse, ngobyoobyo zyalyo azicinda zyalo, azipinzyo zyalyo, asani lyalyo, aziimino, 34acakuvumbilizya cazikutu zyakasukwa kabotu, amulembo wacisitilizyo, 35abbokesi lijisi mabwe aaciibalusyo, tukulisyo twalyo, acivunisyo calyo, 36atebule azibelesyo zyalyo zyoonse, acinkwa cituulwa ku Mwami Leza, 37cikkazikilo calambe cangolida iini-ini, amalambe aaco, azibelesyo zyaco, amingwimba, 38cipaililo cangolida, mafuta aakunana, tununkilizyo tubotu, acisitilizyo caamulyango watente, 39cipaililo camukuba ambaula yaco atukulisyo twaco, azibelesyo zyaco zyoonse, amutiba wakusambila atako lyawo, 40masani aakusitilizya, bbuwa amisemo yalyo alimwi aziimino zyalyo, sani lyakusitilizya kumulyango wabbuwa, anembe zyalyo, azyakubelesya mumulimo watente lya Leza, tente lyakuswaanganina, 41azisani zibotu zyamumulimo wabupaizi mubusena busalala, zisani zisalala zya mupaizi Aloni, abana bakwe nobacita mulimo wabo wabupaizi. 42Mbombuboobu Baisilayeli mbubakamanizya mulimo mbuli Mwami Leza mbwaakalailila Mozesi. 43Mpawo Mozesi wakazilanga-langa zintu zyoonse nzyobakacita mbubonya mbuli Mwami Leza mbwaakalailila. Nkaako Mozesi wakabeleka.

Currently Selected:

Kulonga 39: Tonga96

Highlight

Compare

Copy