Kulonga 9
9
Baijipiti mbubakafwidwa banyama babo
1Lino Mwami Leza wakati kuli Mozesi, “Koya kuli Falo, ukamwaambile kuti, ‘Mboobu mbwaamba Mwami Leza wa Bahibulu, Baleke bantu bangu bainke bakandikombe. 2Kuti naa kocikaka alimwi kubaleka kuti bainke, naa kocibasinkilila, 3uyoobona janza lya Mwami Leza liyoowida abanyama bako, aamabbiza aako, aambongolo, nkamela, ŋombe, mbelele ampongo. 4Ndiyooandaanya banyama ba Baisilayeli aba Baijipiti, nkabela taakwe aomwe munyama wa Baisilayeli uuyoofwa pe. 5Mwami Leza wati juunza mabala nayoocicita eeci.’”
6Nibwakaca Mwami Leza wakacita mbubonya mbuli mbwaakaambide. Nkaako banyama boonse ba Baijipiti bakafwa doo, pele takwe naba omwe munyama wa Baisilayeli wakafwa. 7Falo naakabuzya cakacitika, wakaambilwa kuti taakwe naba omwe munyama wa Baisilayeli wakafwa. Nikuba boobo Falo wakacili sicinguni, taakabaleka kuti bainke.
Baijipiti mbubakapenzegwa azyuute
8Lino Mwami Leza wakaambila Mozesi a Aloni kuti, “Amuyole twe kuzwa muwondo maanza kaazula, wamana Mozesi alilundumune mujulu kumbele lya Falo. 9Liyooululuka mbuli kasuko atala aa nyika yoonse ya Ijipiti, nkabela koonse-koonse liyoocita kuti bantu abanyama babe azyuute ziyooba zilonda.” 10Aboobo bakabweza twe kuzwa muwondo akuyooima kumbele lya Falo. Mozesi wakalilundumuna mujulu, nkabela lyakacitya zyuute zyakaba zilonda kubantu akubanyama. 11Basimabibo tiibakali kukonzya kuzundana a Mozesi, nkaambo abalo bakali azyuute mubili woonse mbubonya mbuli Baijipitinyina. 12Nikuba boobo Mwami Leza wakacitya kuti Falo kacili sicinguni, aboobo wakakaka kuswiilila ba Mozesi a Aloni, mbuli Leza mbwaakaambilide Mozesi.
Baijipiti mbubakawidwa civulamabwe
13Lino Mwami Leza wakaambila Mozesi kuti, “Kacicili cifumo-fumo, ukainke kumbele lya Falo ukati kulinguwe, Mwami Leza wa Bahibulu ulati, ‘Baleke bantu bangu bainke kutegwa bakandikombe. 14Lino ndilatumina zisubulo zyangu zyoonse kulinduwe, antoomwe akuli balupati-pati bako, akubantu bako, notikazibe kuti taakwe uuli mbuli ndime munyika yoonse. 15Kuti nindakakuuma yebo ajanza lyangu abantu bako abulwazi, nikwalikunga nyoonse mwakamaninina supu. 16Pele ndakamuleka caali kuti kamucipona-pona kutegwa ndimutondezye nguzu zyangu, ndendilyo mpuwo yangu niitimwaike munyika yoonse. 17Nikuba boobo ucilisumpula bantu bangu tobaleki kuti bainke. 18Swiilila ndiyoocita kuti juunza mabala ciindi cino nciconya kukawe civulamabwe cipati citanabwenwe mu Ijipiti muno kuzwida kumatalikilo aanyika. 19Lino kolailila kuti banyama banu boonse azintu zyoonse nzimujisi zili anze zinjizigwe, nkaambo civulamabwe ciyoowida bantu boonse abanyama batikasiigwe buyo anze kabatakwabilidwe, eelyo boonse bayoofwa.’” 20Bamwi balupati-pati ba Falo bakayoowa makani aaya aakaamba Mwami Leza nkabela bakanjizya bazike abanyama babo kuti babavune. 21Nikuba boobo bamwi bakaunduluzya eezyo zyakaambwa a Mwami Leza, nkaako bakasiya bazike abanyama babo anze.
22Lino Mwami Leza wakati kuli Mozesi, “Tambika janza lyako kujulu, nkabela civulamabwe cilawa koonse-koonse munyika ya Ijipiti. Cilawida bantu abanyama alimwi aazisyango zyoonse zyamumyuunda.” 23Aboobo Mozesi wakatambika musako wakwe kujulu, mpoonya Mwami Leza wakatuma civulamabwe eelyo kwakali mabbalu-bbalu andabo zyakaanda nyika ya Ijipiti. Mbombuboobu Mwami Leza mbwaakacita kuti civulamabwe ciwe anyika ya Ijipiti. 24Kwakali civulamabwe cipati, andabo zyakali kumweka cakwiilingana mujulu aansi. Cakali ncecivulamabwe ciindilila kubija, taakwe nicakabwenwe cili boobo kuzwida Ijipiti niyaakabanyika. 25Munyika yoonse ya Ijipiti civulamabwe cakanyonyoona zyoonse zyakali anze, bantu alimwi abanyama boonse. Cakanyonyoona zisyango zyoonse mumyuunda, akutyoloola misamu yoonse yamusokwe. 26Mulikke mucisi ca Gosyeni oomo mwakali kukkala Baisilayeli, mucatakawa civulamabwe.
27Lino Falo wakatumina Mozesi a Aloni akubaambila kuti, “Ciindi cino ndabisya ncobeni. Mwami Leza uliluzi. Pele mebo abantu bangu tulilubizizye. 28Amukombe ku Mwami Leza zyatusubula ndabo, amabbalu-bbalu acivulamabwe. Ndasyomezya kuti ndilamuleka muunke, tamuceelede kuti kamucikkede pe.”
29Eelyo Mozesi wakati kuli Falo, “Ndazwa buyo mumunzi, ndiyootandabika maanza aangu mukukomba Mwami Leza. Mabbalu-bbalu alaleka, alimwi takuciyoobi limbi civulamabwe cili boobo, kuti mukazibe kuti nyika nja Mwami Leza. 30Pele ndilizi kuti yebo ababelesi bako tamunamuyoowa Mwami Leza pe.”
31Lino butonje amaila amwi zyakanyonyooka, nkaambo maila aayo akatubide kale, abwalo butonje bwakali kufulula. 32Pele maila amwi taakanyonyoonwa pe, nkaambo taakanabizwa.
33Lino Mozesi wakasiya Falo, wakazwa mumunzi. Wakatandabika maanza aakwe wakomba Mwami Leza, eelyo mabbalu-bbalu acivulamabwe zyakamana, ayalo mvula yakaleka. 34Mpawo Falo naakabona kuti mvula, acivulamabwe, alimwi amabbalu-bbalu zyaleka, wakabisizya Mwami Leza alimwi. Nkabela walo mwini abalupati-pati bakwe bakacili basicinguni. 35Nkaako taakwe naakabaleka Baisilayeli kuunka, mbubonya mbuli Mwami Leza mbwaakaambilide Mozesi.
Currently Selected:
Kulonga 9: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
