1 ŴaKorinte 2
2
Uthenga waku Kristu wakupayikika
1Ndipo ine, mwa ŵabali, ndichiza kwinu, kuti ndinguziya kumutauliyani uthenga waku Chiuta mu mphekuru pamwenga mu zeru waka cha. 2Chifukwa kuti ndingupima kuziŵapo mukati mwinu kanthu so kanyake cha, kweni Yesu Kristu pe, ndi iyo wakupayikika. 3Ndipo ine ndinguŵa kwinu mu unthomboru, mu chopu, ndi mu chitenthe chikuru. 4Mazu ghangu ndi chitaula changu kuti vinguŵa mu mazu ghakuwoja gha zeru waka cha, kweni mu karongoledu ka Mzimu ndi ka nthazi: 5alinga kuti chivwanu chinu chireke kukho mu zeru ya ŵanthu kweni mu nthazi yaku Chiuta.
Zeru zaku Chiuta
6Nakweni nako zeru tirongoro mu ŵakukhoma: ndipo kuti ndi zeru ya mgonezi uno cha, chingana nja wachirongozgi ŵamgonezi uno cha, wo ŵakutemeke ku wayurika: 7kweni tirongoro zeru yakubisika yaku Chiuta, yeniyo yenga yindaŵepo migonezi, Chiuta wanguteme limu ku unkhankhu widu. 8Zeru yeniyo wengavi kuyiziŵa nanga njumoza wa ŵakuwusa ŵa mgonezi uwu: chifukwa asani ŵanguyiziŵa, mphanyi ŵengavi kuŵapayika Ambuya ŵa unkhankhu. 9Kweni nge ndimo kwalembeke,
“Vyenivyo jiso lengavi kuviwona,
ndi gutu lengavi kuvivwa mu mtima wa munthu vyengavi kubukamo,
vyose vyo Chiuta waŵarongosole wo mbakumwanja.”
10Kweni Chiuta wavivumbuliya kwaku ifwe mu Mzimu. Pakuti Mzimu yo wapenjapenja vinthu vyose, wapenja ndi vyandimba vyaku Chiuta. 11Chifukwa mu ŵanthu njani ŵaziŵa vya munthu, kweni mzimu wa munthu, wa mwake? Viyo so vyaku Chiuta kuti yumoza waviziŵa cha, kweni Mzimu waku Chiuta ndiyo. 12Kweni kuti taronde ifwe, mzimu wa charu cha, kweni Mzimu wakutuliya kwaku Chiuta, mwakuti tiziŵe vyo vyapaskika kwawanangwa ndi Chiuta kwaku ifwe. 13Vyenivyo so tirongoro, mu mazu ghakusambizgika ndi zeru ya unthu cha, kweni mwaku gho ghasambizgika ndi Mzimu; pakung'anamuwa uneneska wa vya Mzimu kwaku wo ŵakuronde mzimu.
14Kweni munthu wambura mzimu kuti wangaronde vyawanangwa vya Mzimu waku Chiuta cha chifukwa kwaku iyo vye kupusa; ndipo kuti waziŵa kuviteska cha, pakuti viteruzgika ndi mzimu. 15Kweni yo wendi mzimu wateruzga vinthu vyose, iyo mweneko kuti wateruzgika ndi munthu yumoza cha. 16“Chifukwa njani wafikapo pa chinjeru cha Mbuya, kuti wamrunguchizgenge?” Kweni ifwe te nacho chinjeru chaku Kristu.
Currently Selected:
1 ŴaKorinte 2: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi