Mateyu 15

Chisambizgu ndi mkoka wakali

(Marko 7.1-13)

1Sono ŵanguza kwaku Yesu ŵaFarisi ndi ŵalembi ŵakutuwa ku Yerusalemu, ŵakuti, 2“Chifukwa chine ŵasambizi ŵinu ŵajumpha mdauku wa ŵara? Chifukwa kuti ŵasamba manja cha penipo ŵaturgha kurgha.” 3Kweni, wakwamuka, wangunena nawo, “Chifukwa chine imwe namwe mujumpha langulu laku Chiuta ndi mdauku winu? 4Chifukwa wangukamba Chiuta ‘Tumbika ausu ndi anyoko’; ndipo ‘Wakukambiya uheni pa wiske pamwenga nyina, kufwa wafwe.’ 5Kweni imwe mutiti, ‘Yose yo wanganene awiske pamwenga anyina, Cho mwatinge mwanduwenge imwe kwaku ine chapaskika kwaku Chiuta; kuti watumbika awiske cha.’ 6Ndipo mwapenevya mazu ghaku Chiuta chifukwa cha mdauku winu. 7Mwafuzi mwe, Yesaya wanguloske imwe umampha, wakuti,

8‘Khamu ili litinditumbika ndi milimo yawo;

kweni mtima wawo we kutari kwaku ine.

9Kweni ŵatindisopa kwaŵaka,

kusambizga nge ndi visambizgu marangu gha ŵanthu.’ ”

Vyo vinanga munthu

(Marko 7.14-23)

10Ndipo, wakujidaniya mzinda wo, wanguŵanene, “Vwani, ndi wanimo. 11Chakusere mu mlomo kuti chikazuzga munthu cha, kweni chakutuwa mu mlomo ndichu chikazuzga munthu.” 12Sono ŵasambizi ŵangumziya, ndipo ŵanguti kwaku iyo, “Kumbi muziŵa kuti ŵaFarisi, ŵanguti, ŵavwa mazu gho, ŵanguguŵiskika?” 13Kweni, wakwamuka, wanguti, “Chakupandika chose cho ŵengavi kupanda Ada wakuchanya, chizuwikenge. 14Warekeni: mbachirongozgi ŵachiburumutiya. Ndipo asani wachiburumutiya warongozga wachiburumutiya, wose ŵaŵi ŵawenge mu zenje.” 15Petro, wakwamuka, wanguti kwaku iyo, “Tifwatuliyeni ntharika yo.” 16Ndipo wanguti, “Kumbi namwe so ndasono mweche ŵambura kuwamo? 17Asi muteska kuti chose chakusere mu mlomo chiporota mu chifu, ndipo chipong'eka ku dondu? 18Kweni vyakutuwa mu mlomo vituliya mu mtima; ndipo ndivyo vikazuzga munthu. 19Chifukwa mu mtima mutuliya maghanaghanu ghaheni, zimbanda, maureŵi, mauyaya, maunkhungu, visimisimi vitesi, matuka. 20Ivi ndivyo vyakukazuzga munthu; kweni kurgha ndi manja ghambura kusamba kuti kukazuzga munthu cha.”

Chigomezgu cha munthukazi Mkanani

(Marko 7.24-30)

21Ndipo Yesu wangutuwa kweniko, ndipo wanguruta ku vigaŵa vya Turo ndi Sidoni. 22Ndipo wonani, munthukazi muKanani, wakutuwa mu mphaka zenizo, wangubongo, wakuti, “Ndifwiyeni lisungu, Ambuya, mwa Mwana waku Davidi; mwana wangu munthukazi wakoreka uheni ndi demone.” 23Kweni iyo kuti wangumwamuka mazu cha. Ndipo ŵasambizi ŵake ŵanguza kumenene kuti, “Mudikeni; pakuti wakambura pavuli pidu.” 24Kweni wakwamuka iyo wanguti, “Ndikutumikiya ku mberere zakutayika za nyumba yaku Yisraele pe.” 25Kweni munthukazi wanguza ndi kumlambiya, wakuti, “Ambuya, ndovyeni.” 26Iyo, wakwamuka, wanguti, “Kuti kuyamu cha kuto chiŵande cha ŵana ndi kupong'eŵagaru.” 27Munthukazi wanguti, “Inyadi, Ambuya, kweni ŵagaru nawo ŵaturghako marivuvu ghakumbotoka pa gome la mbuyawo.” 28Sono Yesu, wakumwamuka, wangumunene, “Wamunthukazi'we, nchikuru chivwanu chako: kuŵiye iwe uli ndimo ukhumbiya.” Ndipo wanguchizgika mwana munthukazi wake paora leniliya. 29Ndipo wakutuwa kweniko Yesu wanguza kufupi ku nyanja ya Galile; wangukwere mu phiri lo, ndipo wanguja pasi kweniko. 30Ndipo kungumziya mizinda yikuru, yakuŵa nawo pamoza ŵakuganthiya, ŵachiburumutiya, ŵambuwu, ŵakupunduka, ndi ŵanyake ŵanandi, ndipo ŵanguŵapong'a pa marundi ghake; iyo wanguŵachizga; 31viyo kuti mzinda wo unguzizwa wachiwona ŵambuwu kurongoro, ŵakupunduka kuŵa ŵanthazi, ŵakuganthiya kwenda, ndi ŵachiburumutiya kulereska: ndipo ŵangumkankhuska Chiuta waku Yisraele.

Yesu wariska ŵanthu vikwi vinayi (4,000)

(Marko 8.1-10)

32Ndipo Yesu, wakudana, ŵasambizi ŵake, wanguti, “Nde ndi lisungu ndi mzinda wo, pakuti sono watandara nane mazuŵa ghatatu, ndipo ŵalive kanthu ko ŵangargha, ndipo kuti ndikhumba kuŵawezga ŵamsara cha, vinu kokuli ŵangafwa chipoyu mu nthowa.” 33Ndipo ŵasambizi ŵanguti, “Tingatuwa navyo nunkhu mu boswa viŵande vinandi vyakugutiska mzinda ukuru waviyo?” 34Yesu wanguŵafumba, “Mwe navyo viŵande viringa?” Iwo ŵanguti, “Vinkhonde ndi viŵi, ndi tusomba tumanavi.” 35Ndipo wangulanguliya mzinda wo kuteka pasi; 36wakuto viŵande vyo vinkhonde ndi viŵi ndi somba; ndipo, wakuwonga, wangumenya, ndi wangupaska ku ŵasambizi, ndi ŵasambizi ku mizinda yo. 37Ndipo ŵangurgha wose, ndi ŵanguguta, ndipo ŵanguyora vyakujako vya marivuvu, vitete vyakuzaza vinkhonde ndi viŵi. 38Ndipo ŵakurghapo ŵenga ŵanthurumi vikwi vinayi, pade pa ŵanthukazi ndi ŵana. 39Ndipo wati wawezga mizinda yo, wangusere mungaraŵa wanguza mu mphaka za Magdala.

Currently Selected:

Mateyu 15: TongaMw

Highlight

Compare

Copy