Markus 6

Yesus tara dapa tarima di Nazaret

(Mat. 13:53-58; Luk. 4:16-30)

1Abis itu, Yesus pulang pa Dia pe kampong Nazaret, kong Dia pe murit-murit iko pa Dia. 2Pas hari Sabat, Yesus mangajar di ruma ibada agama Yahudi. Waktu orang-orang di situ dengar Yesus pe ajaran, dorang herang skali, kong dong baku bilang bagini, “Ee, orang ini pe ajaran itu Dia tau dari mana? Bagimana Dia pande bagitu? Dia dapa kuasa dari mana sampe bisa biking mujizat-mujizat bagitu? 3Padahal Dia itu cuma tukang kayu. Dia pe mama Maria, Dia pe sudara pa Yakobus, Yoses, Yudas deng Simon. Dia pe sudara-sudara parampuang me ada sama-sama deng torang di sini, to?” Karna orang-orang di situ tau itu, dorang tara tarima pa Dia.

4 # Yoh. 4:44 Kong Yesus bilang pa dorang bagini, “Memang butul, di mana saja, orang hargai pa nabi yang jaga kase turus Tuhan Allah pe pasáng. Tapi di dia pe kampong sandiri, di dia pe keluarga sandiri, deng di dia pe ruma sandiri, dorang tara tarima pa dia.”

5Di tampa itu, Yesus tara banya biking mujizat, barang orang-orang di situ tara percaya pa Dia. Dia cuma taru Dia pe tangan pa babarapa orang saki kong dong sembu. 6aDia herang, barang dorang tara percaya.

Yesus utus Dia pe murit dua blas orang

(Mat. 10:5-15; Luk. 9:1-6)

6bAbis itu, Yesus bajalang mangajar dari kampong ka kampong. 7Yesus pangge Dia pe murit dua blas orang, kong Dia utus pa dorang pigi dua-dua orang. Dia me kase kuasa pa dorang untuk user setang-setang. 8#Luk. 10:4-11 Yesus pasáng pa dorang supaya jang bawa apa-apa di jalang. Yang dorang bole bawa cuma tongkat. Roti, tas deng doi me dong tara bole bawa. 9Bole pake sandal, tapi tara bole bawa dorang pe baju ganti. 10Kong Yesus bilang lagi pa dorang bagini, “Kalu di satu tampa ada yang so tarima pa ngoni di dorang pe ruma, tinggal suda di situ sampe ngoni kaluar dari tampa itu. 11#Mat. 10:14; Kis. 13:51 Tapi kalu orang-orang di tampa itu tara tarima deng tara dengar pa ngoni, ngoni kase tinggal pa dorang suda. Abu yang ada pa ngoni pe kaki me ngoni kase tada di situ, la kase inga dorang so sala pa Tuhan Allah.”#6:11: Orang Yahudi kalu dorang abis pigi di satu daera yang bukang dorang pe daera, dorang musti kase bersi dorang pe talapak kaki deng kase bersi dorang pe pakeang, barang dorang anggap orang bukang Yahudi deng tana yang dong injang itu kotor atau najis. Yesus suru Dia pe murit-murit biking bagitu pa orang-orang Yahudi yang tara tarima Firman Allah, mo kase tunju, dorang itu dapa anggap kotor atau najis, kong Tuhan Allah akan hukum pa dorang.

12Abis dengar itu, murit-murit pigi kase tau pa orang-orang la dorang so musti bertobat kong iko pa Tuhan. 13#Yak. 5:14 Dorang user banya setang, deng dorang goso minya pa orang-orang yang saki la orang-orang saki itu sembu.

Yohanes Pembaptis dapa bunu

(Mat. 14:1-12; Luk. 9:7-9)

14 # Mat. 16:14; Mrk. 8:28; Luk. 9:19 Di mana-mana orang bacarita tentang Yesus, barang Dia pe nama so terkenal, sampe raja Herodes me dapa dengar itu. Ada yang bilang, “Mangkali Yesus itu Yohanes Pembaptis yang dulu mati, kong so hidup ulang kaapa? Ada harus dia bole biking mujizat pe banya itu!”

15Ada laeng lagi yang bilang, “Dia itu nabi Elia!”

Turus ada lagi yang bilang, “Dia itu nabi laeng yang kase turus Tuhan Allah pe pasáng, sama deng nabi-nabi yang dulu.” 16Waktu raja Herodes dengar orang-orang bacarita itu, dia bilang bagini, “Pasti Dia itu Yohanes Pembaptis, yang kita so potong dia pe kapala. Skarang dia so hidup ulang!”

17 # Mat. 14:3-4; Luk. 3:19-20 Raja Herodes bilang bagitu, barang tempo hari dia yang suru tangka pa Yohanes, kong ika deng rante, turus kase maso di penjara. Dia biking bagitu karna masala Herodias. Dia pe carita bagini: raja Herodes ambe pa Herodias kong kase jadi dia pe bini. Padahal, Herodias so kawing deng Filipus, raja Herodes pe sudara sandiri. 18Kong Yohanes togor ulang-ulang pa raja Herodes, dia bilang bagini, “Bapa so langgar Tuhan Allah pe aturan karna bapa so ambe bapa pe ipar kong kase jadi bapa pe bini.”

19Waktu Herodias dengar bagitu, dia simpang hati pa Yohanes, kong dia biking rencana mo bunu pa Yohanes. Tapi Herodias bolong dapa slak, 20barang raja suru tentara jaga bae-bae pa Yohanes di penjara. Raja Herodes tako pa Yohanes, karna dia tau, Yohanes itu orang yang hidup butul deng hati bersi pa Tuhan Allah pe muka. Karna itu, dia tahang pa Yohanes. Biar raja pe hati tara sanang, tapi tiap kali dia dengar Yohanes bicara, dia suka dengar.

21Satu kali bagini, Herodias dapa slak mo balas dia pe hati saki pa Yohanes. Waktu itu raja Herodes ada biking dia pe pesta ulang taong, kong dia undang dia pe pejabat-pejabat, komandan-komandan deng orang-orang penting laeng di daera Galilea. 22Sementara pesta, Herodias pe ana parampuang maso kong manari. Dia manari bagus skali, sampe raja deng dia pe tamu-tamu me sanang. Kong raja pangge pa Herodias pe ana itu. Raja bilang pa dia bagini, “Ngana mo minta apa, bilang kamari pa kita, nanti kita kase!” 23Turus raja Herodes bajanji sampe basumpa pa ana parampuang itu, dia bilang, “Apa saja yang ngana minta, pasti kita kase. Biar kita pe kerajaan stenga lagi, kita kase.”

24Pe dengar raja bilang bagitu, ana parampuang itu pigi pa dia pe mama Herodias kong tanya bagini, “Mama, kita mo minta apa pa raja?”

Dia pe mama jawab, “Ngana minta Yohanes Pembaptis pe kapala.” 25Turus ana itu capat-capat bale ulang pa raja Herodes, kong dia bilang bagini, “Kita minta Yohanes Pembaptis pe kapala, taru di baki skarang!”

26Waktu raja Herodes dengar apa yang ana parampuang itu minta, dia pe hati jadi susa skali. Tapi karna dia so basumpa pa ana parampuang itu di dia pe tamu-tamu pe muka, jadi mau tara mau dia so tara bisa tolak ana itu pe mau. 27Karna itu, raja Herodes langsung parenta pa dia pe ana bua satu la pigi di penjara kong potong Yohanes pe kapala. Turus orang itu pigi potong Yohanes pe kapala. 28Turus orang itu taru Yohanes pe kapala di baki kong kase pa ana parampuang itu. Turus ana itu kase lagi pa dia pe mama. 29Bagitu Yohanes pe murit-murit dapa dengar, Herodes so potong Yohanes pe kapala, dorang datang ambe dia pe mayat kong pi kubur.

Yesus kase makang lima ribu orang

(Mat. 14:13-21; Luk. 9:10-17; Yoh. 6:1-14)

30Yesus pe murit-murit yang Dia so utus itu bale kong bakumpul sama-sama deng Dia. Turus dorang kase tau pa Yesus samua yang dorang so biking deng yang dorang so kase ajar. 31Tapi waktu itu orang yang datang deng yang pigi talalu banya, sampe Yesus deng Dia pe murit-murit so tarada kesempatan mo makang. Jadi Yesus bilang pa Dia pe murit-murit, “Mari suda torang pigi di tampa yang sunyi la torang bisa baistrahat sadiki!”

32Jadi Yesus deng Dia pe murit-murit nae di parau kong pigi di tampa yang jao dari kampong supaya dorang bole basandiri di situ. 33Tapi orang banya dapa lia dorang barangkat, deng dorang tau tampa yang Yesus deng Dia pe murit-murit mo pigi. Jadi orang-orang dari samua kampong pigi di tampa itu. Dorang bajalang kaki capat-capat, kong dorang kamuka sampe di tampa yang Yesus deng Dia pe murit-murit pigi. 34#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36 Waktu Yesus turung dari parau, Dia lia pe banya skali orang ada tunggu pa Dia di situ. Dia rasa kasiang skali pa dorang, barang dorang sama deng domba yang tara gembala untuk jaga pa dorang. Di situ, Yesus mulai mangajar pa dorang tentang banya hal.

35Waktu so mo malam, Yesus pe murit-murit datang pa Dia, kong bilang, “Guru, tampa ini jao dari kampong, deng so mo malam. 36Jadi lebe bae Guru suru pa orang banya ini pigi suda, la dorang bili makanang di kampong-kampong yang paling dekat dari sini.”

37Tapi Yesus bilang pa dorang bagini, “Ngoni yang musti kase makang pa dorang!”

Dorang jawab pa Yesus, “Ampun, orang pe banya bagini! Torang musti karja deng bulan-bulan dulu baru torang bisa dapa doi untuk bili dorang pe makanang bagitu banya!”

38Yesus bilang pa dorang, “Ngoni bawa roti ada barapa banya? Coba priksa!”

Abis priksa, dorang bilang pa Yesus, “Roti ada lima deng ikang ada dua.”

39Turus Yesus suru orang banya itu samua dudu bakelompok-kelompok di atas rumpu. 40Dorang dudu bakelompok-kelompok, ada yang saratus orang, ada yang lima pulu orang. 41Abis itu, Yesus ambe roti lima deng ikang dua itu, kong Dia mangada ka atas di langit kong bilang tarimakasi pa Tuhan Allah. Turus, Dia pela-pela roti, kong Dia kase pa murit-murit, la dorang kase bage-bage pa samua orang yang ada di situ. Bagitu lagi deng ikang dua itu, Dia kase bage-bage pa dorang samua. 42Dorang samua makang sampe kanyang. 43Pe abis makang, Yesus pe murit-murit kumpul roti deng ikang yang talebe, ada dua blas karanjang ponong. 44Yang makang roti hari itu, ada lima ribu orang laki-laki.

Yesus bajalang di atas aer

(Mat. 14:22-33; Yoh. 6:16-21)

45Abis itu, Yesus langsung suru Dia pe murit-murit nae di parau, la pigi kamuka di kampong Betsaida yang di sabla talaga. Sementara itu, Dia suru orang banya itu pulang. 46Waktu orang banya itu so pulang, Yesus nae di bukit untuk berdoa.

47Waktu so malam, Yesus pe murit-murit yang nae parau itu so di tenga-tenga talaga, tapi Yesus masi tinggal sandiri di darat. 48Yesus lia Dia pe murit-murit so tara poha bapanggayung, barang angin kancang batiop dari muka. Pe amper siang Yesus datang pa dorang, Dia bajalang di atas aer. Dia pe maksut mo lewat pa dorang, 49tapi waktu dorang lia Yesus bajalang di atas aer, dorang kira Dia itu setang kong dorang babataria 50karna dorang tako skali. Tapi Yesus langsung bilang pa dorang bagini, “Tenang, jang tako, ini Kita!”

51Turus Yesus nae pa dong pe parau, kong angin me todo. Kong dorang samua herang skali. 52Barang, biar dorang so lia Yesus kase makang orang banya, tapi dorang masi bolong mangarti sapa Dia karna dorang pe hati karas.

Yesus kase sembu banya orang saki di Genesaret

(Mat. 14:34-36)

53Bagitu Yesus deng Dia pe murit-murit sampe di sabla talaga, dorang balabu di daera Genesaret. 54Pe turung dari parau, orang banya langsung kanal itu Yesus. 55Dorang samua lari di samua tampa di daera itu, turus bawa orang-orang yang saki pa Yesus di atas dorang pe tikar, di mana saja dorang dapa dengar Dia ada. 56Di mana saja Yesus pigi, di kampong-kampong, di kota-kota, sampe di pedalaman me, dorang taru orang-orang saki di tampa rame yang Yesus mo lewat. Dorang bamohon pa Dia supaya kase ijin pa orang-orang saki la dorang pegang pa Dia, biar cuma pa Dia pe ujung juba saja. Jadi samua orang saki yang bapegang pa Dia jadi sembu.

Currently Selected:

Markus 6: PB MMU

Highlight

Copy