Matye 17

Yeesu wake n'leesi bumpumu bwaandi

(Mak 9.2-13; Lik 9.28-36)

1Bilumbu bi samunu byavyooci, Yeesu kuboongë Pyeelë, Zaakë i Za, nkoombë Zaakë. Naandi wusë bënatë ku mpeengë, ku yilu nguungë moongo. 2Naandi wusë citukë fë meeso maawu. Ciinyi cyaandi kungalëmë buke muunyi, n'vwaatwaandi kumanikë mpeembi buke cyeseesë#17.2 2 Py 1.16-18.. 3Kususukulabu bilaanzi bi tatu bisë monë Moyiizë i Eli bëlëtubunaangë yimunë Yeesu. 4Pyeelë wusë kukaambë Yeesu : « A Fumu, liboti besiinu mu kukalilë afaafë. Ningë wulizolisi, yake n'tulikë afa binzwananë bi tatu, cimweekë cyaaku, cimweekë ci Moyiizë i cimweekë ci Eli. » 5Naandi wucini n'tubë, livweeti lim'manikë lisë bëfukë, i mu livweeti mbeembu yisë kuwukunë : « Naandyaawu, Mwanaami wu mëdilë. Mu naandi, mwa yatuulë luzolo lwaami looso. N'yuwulwaanu#17.5 3.17.! » 6Bunë bilaanzi bëyuwu mbeembu be yooyo, bisë kudikë mbuunzu fë n'toto i boomë bunenë kubëkotilë. 7Yeesu kwabëbelëmi, naandi wusë bësiimbë i kutubë : « Manaanu n'telë, lubaanu yi boomë ko! » 8Bavumbuli ntalu, baawu bësye be monë wun'ka ko kanuku wo naveekë Yeesu vwiili. 9Fanë bëlënengëmukë moongo, Yeesu wusë bëvaanë lutumu alu : « Lukaambyaanu ke wun'viipë ko cyeendë-meeso aci tee yi fanë Mwaanë muutu kun'vulumukë mu nkoongë bëfwa. »

10Bilaanzi bisë kufulë Yeesu : « Cibilë-mbici miloonji n'kaakë bën'tubilaangë ti, Eli wufwenikini kutekë kwiisë#17.10 Mal 3.23.? » 11Naandi wusë bëvutililë : « Licyelikë, Eli wufwenikini kwiisë mu kululikë makë mooso. 12Miinu yilukaambë : Eli wumwekwiisë, baatu bësye n'zaabaangë ko kasi bëvaangë mu naandi manë bëzolë. Mati bo bumweekë, Mwaanë muutu wum'monë mëcyeenji-mëndoongë ke baawu. » 13Mu bwaawu, bilaanzi bisë bakulë ti naandi wulëtubilë mu Za-Batiisë.

Yeesu wabelusi mwaanë ke yi ncyeenzu nzyeetë

(Mak 9.14-29; Lik 9.37-43a)

14Bunë batuuci fanë fabë nkoongë, libakëlë lisë belëmë fëke Yeesu, wusë fukumë fë ntwaalaandi i wusë tubë : 15« A Fumu, fwiilë mwanaami cyaali. Naandi ncyeenzu nzyeetë#17.15 4.24. yike yaandi. Mpaapë vyaasi, mooti yam'batikini naandi kubwangaangë ku mbaasu, kaambofo, kuyifwangaangë mu masi. 16Miinu yin'natë ke bilaanzi byaaku, kasi baawu bësye podi ko kum'belusi. » 17Yeesu wusë losukë : « A mboongu yikaambu lufyaatu i yi waalë mëvadë-mëbi! Tee ntaangu mbici miinu yifwenikini kukalilë yiinwee? Miinu yifwenikini kuciimbë moonyi tee ntaangu mbicye? Natinaanu mwaanë! » 18Yeesu kubaminë ciluunzi cibi, i cyaawu cisë basikë i mu zoolë beenë mwaanë kubelukë. 19Foofë, bilaanzi kubelëmë fëke Yeesu ku nteku i bisë n'yufulë : « Cibilë-mbici beeso twakaambu kubasilë ciluunzi cibye? » 20Yeesu kubëvutulilë : « Cibilë ciminu ciinu cicyeeci. Licyelikë yilukaambë ningë ciminu ciinu cike buke lungeenzë lu mutalëdë#17.20 wutolë dedë mweekë lungeenzë lu mutalëdë: lungeenzë lu mutalëdë lulë monikaangë dedë mweekë lungeenzë luvyokili buciici. 13.32., beeno nkanë lulëkaambë moongo owo : “Botukë afa, weendë kuna.” Waawu nkanë wulëbotukë. Cin'velë ko cilëvaangë nkakinyi ke beeno. 21Kasi ciluunzi ci mpilë oyo cim'basikilaangë, kanuku mu n'saambu vwiili i mu n'sweelë. »

Yeesu wazabikini lufwa i luvulumuku lwaandi

(Mak 9.30-32; Lik 9.43-45)

22Cilumbu cin'viipë, bilaanzi abu babë fë cimweekë ku Ngalilee, Yeesu wusë bëkaambë : « Mwaanë muutu wabelëmë kuvakulu mu myooko baatu, 23baawu mba bëkun'voondë, kasi fë cilumbu cin'tatu, naandi wun'vulumukë. » Mu bwaawu bilaanzi bisë ba mu cyuundë cinenë.

Lufutulu lu mpaku yi n'zo-Nzaambi

24Bunë Yeesu i bilaanzi byaandi batuuci ku Kapelënawuumë, binoongë mpaku yi n'zo-Nzaambi bisë belëmë Pyeelë i bisë n'yufulë : « Fumwiinu, mpaku yi n'zo-Nzaambi naandi wuyifutee, voo moniko#17.24 Lub 30.11-16.? » – 25« Mweenë-ngete, buvutulë Pyeelë, naandi wuyifutë. » Fanë Pyeelë kulëkotilë ku n'zo, Yeesu kubulë ntetë mbeembu i wusë tubë : « Njeeyi bunë wum'balilë, a Simu? Nani wufwenikini kufutë mpaku kaambofo tumaandu ke sifumu si#17.25 basë bë si yaawu: basë Bë cifuumbë cyaawu. bë buloongo be buubu? Bëbakisi n'toto voo beeni? » 26« Beeni », bëvutulilë Pyeelë. « Mu cibilë ocyo, bën'vutulilë Yeesu, bëbakisi n'toto bësye fwanëkënë ko kufutë. 27Vandi, beeso tusye zolë ko kubëfwiisi sonyi. Cibilë ocyo, boongë nzolu, ye lakë yaawu mu liyaangë li masi, yivoli, mbisi n'tetë wum'bakë, zibulë munwaandi i njeeyi wum'monë mwaawu cinkongulu ci mboongo cibe fwaanë mu kufutë mpakwaami i yaaku. Boongë cyaawu i wufutë mpakwiitu. »

Currently Selected:

Matye 17: NTVIL

Highlight

Copy