Matye 18
18
Wuvyokili bukuluutu ku Lwaangu lu mëyilu
(Mak 9.33-37; Lik 9.46-48)
1Foofë, bilaanzi kubelëmë Yeesu i bisë n'yufulë : « Nani wuvyokilili bukuluutu ku Lwaangu lu mëyilu? » 2Yeesu wusë telë mwa cimwamwanë, wusë n'tuulë fë kati ku meeyaawu, 3i wusë tubë : « Licyelikë yilukaambë : ningë lusye vilukë ko mu kuba buke bibabanë, beeno lusë n'kotë ko ku Lwaangu lu mëyilu. 4Wunë wuvyokilili bukuluutu ku Lwaangu lu mëyilu, naandi bëfwaanë kukulukë i kuba dedë mweekë mwaanë awu. 5Wunë wun'tambulë mwaanë be wuuwu mu cibilë cyaami, miinu kun'tambulë. »
Lubikunu lunjiinji
(Mak 9.42-48; Lik 17.1-2)
6« Wunë wun'vangisi kubwitëmë mu lisumu wumweekë mu bibabanë abi, bata maanë mu miinu, mëyoolë mu naandi bën'kaangë limanyi linenë mu cimenu i kun'siinzi mu liwingë li m'bu. 7Lusifu mu buloongo mu makë mooso mën'vangisi baatu kusumukë! Maawu mën'vangënë mu ntiinu, kasi lusifu ke muutu wun'vaangë lyaawu! 8Ningë kooko kwaaku kaambofo kuulu kwaaku bikuvangisi kubwitëmë mu lisumu, cyelë byaawu i bibumi cinaanu yi njeeyi, kasi liboti mu njeeyi mu kukotë mu luziingu lucyelikë yimunë kooko ku mweekë, kaambofo kuulu ku mweekë i kuluundë myooko yi wali i maalu më mwaali i kulaku ku buluunji bu mbaasu. 9Ningë lyeesu lyaaku likuvangisi kubwitëmë mu lisumu, tumunë lyaawu i libumi cinaanu yi njeeyi. Liboti mu njeeyi kukotë mu luziingu lucyelikë yimunë lyeesu limweekë i kusweekë meeso më mwaali i kulaku ku buluunji bu mbaasu. »
Sasafë yi limemë lizimbilë i limonikë
(Lik 15.3-7)
10« Luleenjyaanu wun'viipë mu nkoongë bibabanë abi ko, yilusisimini, licyelikë, kunë mëyilu, siyaanzi syaawu sikalilë yosuku ntaangu fë ntwaalë Tataami ku mëyilu. 11Cibilë Mwaanë muutu wuyisilë mu kuvuuci banë bënyambëkënë#18.11 Lik 19.10.. »
12« Buni lum'balilë? Mooti wun'viipë wukeeli yi nkamë mëmemë i limweekë lin'zimbilë, naandi wusë m'biikë livwa li mëkumë-vwa li mëmemë ku yilu moongo mu ke toombi lyo lyazimbilë? 13Naandi bunë kulimonë i lusisimini, wun'vyookë kumonë sinyeenzi mu lyaawu ayi livwa li mëkumë-vwa li mëmemë mësyaalë ku yilu moongo. 14Bo bumweekë, Tatiinu wuke ku mëyilu wusye zolë ko ti wun'viipë mu bibabanë abi kuzimbilë. »
Ningë mwaanë nguli wum'bëlë
15« Ningë mwanaaku nguli ke yi lyaambu mu njeeyi, yendë wan'zakini, mbuunzu yi mbuunzu i n'zabikini mëbi maandi. Ningë wube kuyuwulu, oboobo, wavuuci mwanaaku nguli. » 16Kasi ningë wube maangë kukuyuwulu, boongë muutu mweekë kaambofo bwaali, bwiinji bo bun'tubilë linë lisonëmë : « Yosuku mbesi yin'tubulu fë meeso mëmbaanji wali, kaambofo tatu#18.16 Det 19.15.. » 17Kasi ningë bëmaangë kubëyuwulu, yalulë lyaawu ku Cingangë. Ningë bëmaangë kuwulu Cingangë, n'cituli muutu wukaambu kuta lyaanë kaambofo cinoongë mpaku.
18« Licyelikë yilukaambë, lyosuku lun'kaangë fë n'toto, likangëmë ku yilu. Lyosuku lun'kutulu fë n'toto, lin'kutukë ku yilu#18.18 16.19; Za 20.23.. »
19« Licyelikë yivaandi yilukaambë, ningë bwaali bë bëkuwusënë fë n'toto, lyosuku lyaambu bën'loombë, Tataami wuke ku mëyilu wubëvaanë. 20Cibilë, fanë bwaali kaambofo bëtatu bën'kukumë fë cimweekë mu lizinë lyaami, miinu yike fë meeyaawu. »
Sasafë yi cisasi cim'maangë kulenvukilë
21Mu lyaawu Pyeelë wusë belëmë Yeesu i kun'yufulë : « A Fumu, vyaasi kwa yifwenikini kulenvukilë mwanaami nguli mooti naandi be bëlë mu miinu? Tee fë saambwali li vyaasye? » – 22« Moniko, bun'vutulilë Yeesu, yisë kukaambë ko ti tee saambwali li vyaasi, kasi tee saambwali li mëkuumi saambwali li vyaasi#18.22 saambwali li mëkuumi saambwali li vyaasi: kaambofo saambwali li mëkuumi li vyaasi.. 23Mati mu cibilë ci lyaliili, Lwaangu lu mëyilu: fwiifu yi n'tinu wuboongë lukanyu mu kuviisi businë bwaandi yimunë bisasi byaandi. 24Fo kwatooni kutaangë, bisë n'twalilë wun'viipë wulën'defaangë mpaapë simboongo si binkongulu. 25Muutu be woowo wusye ba yi mëkanë ko mëkufutilë n'kanwaandi. Mu lyaawu, fumwaandi wusë vandikë n'swa mu kun'sumbisi dedë mweekë n'doongo, bësumbisi yivaandi n'kasyaandi, baanë baandi i byosuku kubakë, bwiinji kufutë n'kanwaandi. 26Cisasi wusë fukumë fë meeso më fumwaandi mu kum'bondililë : “Vungë moonyi mu miinu, yi faanë yimaninë kufutë n'kanwaami!” 27Cyaali kukotilë fumu i wusë n'kaambë kuleembu kufutë n'kanu i wusë m'biikë kuyendë. 28Cisasi kubasikë i wusë kudyengënë wun'viipë wulësalaangë yaandi, awu wulën'defaangë mwa m'pooko-mboongo. Naandi kum'bwiilë i wusë n'fyetë fë cinkongulu i wusë tubë : “Futë byaami byooso binë wukun'defë.” 29Mbasyaandi kubwa mu maalu maandi bwendi ke m'bondililaangë mu bikumë abi : “Vungë moonyi mu miinu, kasi mba yikufutë!” 30Kasi naandi wusye vitikë ko, tiilyoko kun'vangisi kulaku mu buloko yi faanë kun'futilë n'kanwaandi. 31Bunë bisasi bimesi bamoni mo mëvyookë, baawu kunyotëkënë i bisë ke kaambë makë mooso ke fumwaawu. 32Mu bwaawu, fumu wusë vekilë cisasi beenë i wusë n'kaambë : “A ciseelu ci bubaalu! Yibe kubotulë n'kanwaaku cibilë njeeyi wakum'bondililë mu kulivaangë. 33Nkanë njeeyi yivaaku wufwenikini kufwiilë mbasyaaku cyaali, bo miinu yibe kufwiilë cyaali.” 34Mu likaanzi lyaandi, fumu wusë kosi cisasi beenë mu buloko mu kun'nwiikë-ndoongë yi fanë kum'maninë kufutë n'kanwaandi. »
35Bwaawu yivaandi : « Tataami wuke ku mëyilu, wun'silë mu beeno ningë lusye n'lenvukilë ko mwanaaku nguli yi n'timë wooso#18.35 6.15.. »
Currently Selected:
Matye 18: NTVIL
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.
