Kut 25
25
1Aburahamu akashwera ondiijo mukazi orikwetwa Ketura; 2yaamuzaaraho Zimuraani, Yokoshaani, Medani, Midiyani, Ishibaki na Shua. 3Yokoshaani niwe yaabaire ishe wa Sheeba na Dedani. Reero beene Dedani nibo Ashurimi, Letushimi na Leumimi. 4Kandi beene Midiyani ni Eefa, Eeferi, Hanoki, Abiida na Elidaasha. Abo boona bakaba bari oruzaaro rwa Ketura.
5Bwanyima Aburahamu ebye byona akabiraga Isaaka. 6Kwonka abatabani abaazairwe ebinyanshunju bye yaabaha ebiconco. Kandi ku yaabaire akihuriire yaaboohereza; baataana n'omutabani Isaaka, baatoora obukiizi bw'oburugwa-izooba baahika omu nsi y'obwo bukiizi.
Okufa kwa Aburahamu
7Emyaka y'obukuru ei Aburahamu yaahikize ekaba igana na makumi mushanju n'etaano. 8Aburahamu ku yaahikize omu ngingo za bukuru, omwitsyo gwamuhwamu, yaafa gye ari omugurusi eboote, yaakurata abaabo. 9Abatabani Isaaka na Ishimaeli baamuziika omu nyanga ya Makipeela omu kibanja kya Efurooni mwene Zohari Omuhiiti, ahashungaine na Mamure. 10Nikyo kibanja eki Aburahamu yaabaire aguzire aha Bahiiti. Aho niho Aburahamu yaaziikirwe hamwe na Saara omukazi we. 11Aburahamu ku yaaherize kufa, Ruhanga yaaha omutabani Isaaka omugisha; Isaaka yaatuura Beeri-lahai-roi.
Oruzaaro rwa Ishimaeli
12Oru nirwo ruzaaro rwa Ishimaeli mwene Aburahamu, ou yaazaire ahari Hagari Omunyamisirikazi, omuzaana wa Saara. 13Mbwenu aga nigo maziina ga beene Ishimaeli nk'oku baakurataine omu kuzaarwa. Omujigaijo gwa Ishimaeli ni Nebayooti; haakurataho Kedari, Adibeeli, Mibusamu, 14Miishima, Duma, Masa, 15Hadadi, Tema, Yeturi, Nafishi na Kedema. 16Abo nibo beene Ishimaeli, kandi ago nigo maziina gaabo omu birorero byabo n'omu maka gaabo, abategyeki ikumi na babiri nk'enganda zaabo oku zaabaire ziri.
17Emyaka y'obukuru ei Ishimaeli yaahikize ekaba igana na makumi ashatu na mushanju; omwitsyo gwamuhwamu yaafa, yaakurata abaabo. 18Abatabani baatuura okwiha Havila okuta Shuuri aharikureebana na Misiri, ogurikuza Asiriya. Ishimaeli ogwo akaba atwire ahashungaine na beene ishe.
Okuzaarwa kwa Esau na Yakobo
19Oru nirwo ruzaaro rwa Isaaka mwene Aburahamu. Aburahamu akazaara Isaaka. 20Isaaka obu yaashwera Rebeka muhara wa Betueli Omuaramu wa Padanarama, munyaanya Labaani Omuaramu, akaba ahikize emyaka makumi ana y'obukuru. 21Mbwenu Isaaka ogwo yaashabira omukazi we ahari Nyakubaho, ahabw'okuba akaba ari engumba. Na Nyakubaho yaamuha eki yaashabire; omukazi we Rebeka yaabaka enda. 22Abaana baamurwanira omunda, nawe nikwo kugira ati: Ku kiraabe kiri kityo, mbwenu ningumibwaho ki? Atyo agyenda ayehanuuza ahari Nyakubaho. 23Reero Nyakubaho amugira ati:
Enda yaawe erimu amahanga abiri,
abaana bu oraazaare nibaija kurugwamu
amahanga abiri garikuharikana,
haza erimwe rikize rigyenzi ryaryo amaani;
Kakuru aheereze Kato.
24Mbwenu ebiro bye by'okuzaara ku byahikire, yaashangwa aine enda y'amahasha. 25Owaabandize yaazaarwa naatukura, omubiri gwe gwona gushwekirwe obwoya nk'omwenda gw'ebyoya; nabo nikwo kumweta Esau. 26Handi hakye omurumuna nawe yaazaarwa, omukono gwe gukwaitse ekitsintsiino kya Esau. Nikwo kumweta Yakobo. Obwo Isaaka ahikize emyaka y'obukuru makumi mukaaga, obu omukazi we abazaara.
27Abo boojo ku baakuzire, Esau yaaba omuhiigi rugambwa, ruraara-mahamba; Yakobo we yaaba omucureezi orikuguma omuka. 28Isaaka akaba akunda Esau, ahabw'okuba akaba arya aha mihiigo ye; kwonka Rebeka akaba akunda Yakobo.
Esau okuguza Yakobo obukuru bwe
29Eizooba rimwe Yakobo ku yaabaire ateekire omujurugye, Esau yaija naaruga omu ishwa naakooza aine enjara. 30Esau yaagira Yakobo ati: Ka ndye ahari ogu mujurigye gurikutukura, ahabw'okuba enjara yaanyita! (Nikyo baamukubiize eiziina Edomu)#25:30 Edomu: Amakuru ngu ekirikutukura. 31Yakobo amugira ati: Banza onguze obukuru bwawe. 32Ndi Esau ati: Ka ndi haihi kufa mbwenu eby'obukuru nibingasira ki? 33Yakobo ati: Banza ondahire. N'onu amurahira; obukuru bwe abuguza atyo Yakobo. 34Mpaho Yakobo aha Esau omugaati n'ezo mboga zicucumire. Onu arya, anywa, bwanyima aimuka agyenda. Nikwo Esau yaagayire atyo obukuru bwe bw'okuzaarwa.
Ebya Isaaka ashuuhuukiire Gerari
Currently Selected:
Kut 25: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
