Kut 26
26
1Omu biro ebyo ensi ekateerwa endiijo njara, etari eri eyaateire omu biro bya Aburahamu. Isaaka nikwo kuza Gerari owa Abimeleki omugabe w'Abafilisiti. 2Reero Nyakubaho yaamubonekyera, yaagira ati: Otashuuma Misiri; guma omu nsi ei ndaakugambire. 3Oshuuhuukire omuri egyo nsi, haza naanye ndyaguma naiwe, nkuhe emigisha, ahabw'okuba ezo nsi zoona ndyazikuha iwe na baijukuru baawe, mpikiirize endahiro ei naarahiire Aburahamu sho. 4Ndyakanyisa oruzaaro rwawe rube nk'enyonyoozi z'omu iguru, haza baijukuru baawe mbahe ezo nsi zoona; kandi omuri baijukuru baawe amahanga g'omu nsi goona nimwo gariheerwa emigisha. 5Ahabw'okuba Aburahamu akaanyorobera, yaakora ebi naamuragiire: Nibyo biragiro byangye n'ebi naataireho n'amateeka gangye.
6Atyo Isaaka yaatuura Gerari. 7Abashaija baayo ku baamubuurize aha bikwatiraine n'omukazi we, yaagira ati: Ni munyaanyazi. Ahabw'okuba akatiina kugira ati: N'omukazi wangye, naateekateeka ati: Abashaija b'omuri ekyo kyanga batakaanyita, bakantura Rebeka. Manya Rebeka ogwo akaba ari murungi munonga. 8Okwo ku yaabaire amazireyo omwanya muraingwa, Abimeleki omugabe w'Abafilisiti yaayozya amaisho omu dirisa, yaareeba Isaaka naacundana na Rebeka omukazi we. 9Abimeleki nikwo kweta Isaaka, akamugira ati: Ka n'omukazi waawe! Mbwenu shi okagirira ki oti: Ni munyaanyazi? Isaaka yaamugarukamu ati: Manya nkateekateeka ngu nkaafa mmuzira. 10Abimeleki amugira ati: Mbwenu shi ekyo otukoreire ki? Manya omwe aha bashaija bangye kikaamurahukiire kubyama n'omukazi waawe, haza obwo oba niiwe otureeteire orubanja. 11Abimeleki ayehanangiriza abantu be boona ati: Orikora ahari ogu mushaija nari aha mukazi we aryaitwa.
12Mpaho Isaaka yaabiba embibo omuri egyo nsi omuri ogwo mwaka, yaashaaruura ebirikukira ebi yaabibire emirundi igana. Nyakubaho yaamuha omugisha. 13Ogwo mushaija yaatunga, yaaganagana okuhitsya obu yaabaire omutungi rugambwa. 14Yaagira amatungo g'amasyo g'entaama n'ag'ente n'abaheereza b'omu ka ye baingi munonga; ekyo kyareetera Abafilisiti kumugirira eihari.
Amaziba ga Gerari na Beerisheba
15Mbwenu obwo Abafilisiti bakaba baatabire amaziba agaafukwirwe abairu ba Aburahamu omu biro bya Aburahamu ogwo, bagaijwize eitaka. 16Mpaho Abimeleki yaagira Isaaka ati: Tuhigize ogyende, ahabw'okuba nootukiza amaani. 17Isaaka arugayo ateera amahema omu ruhita rwa Gerari, aba niyo yaatuura. 18Isaaka agaruka afukura amaziba agaabaire gaafukwirwe omu biro bya Aburahamu ishe, ahabw'okuba Abafilisiti bakaba bagatabire Aburahamu aherize kufa, kandi yaageeta amaziina agu ishe yaabaire ageetsire. 19Kwonka abairu ba Isaaka ku baafukwire omuri orwo ruhita, baagwa aha iziba ry'enshuro y'amaizi. 20Abariisa ba Gerari baatongana n'abariisa ba Isaaka nibagira bati: Amaizi n'agaitu. Nawe nikwo kweta eryo iziba eiziina Eseki, ngu ahabw'okuba bakamutonganisa. 21Bwanyima baafukura erindi iziba, naryo baaritonganira, yaaryeta eiziina Siitina.#26:21 Siitina: Amakuru ngu obuzigu. 22Okwo yaarugayo yaatimba erindi iziba, kwonka eryo tibaaritonganira, nikwo we kuryeta Rehoboti, amakuru ngu, hati Nyakubaho yaatuha ah'okweshandira, nitwija kukanyira omuri egi nsi.
23Ku yaarugire aho yainamuka yaaza Beerisheba. 24Haza Nyakubaho yaamubonekyera ekyo kiro, yaamugira ati: Niinye Ruhanga wa Aburahamu sho. Otatiina, ahabw'okuba nkwine kandi niinyija kukuha omugisha, nkanyise oruzaaro rwawe ahabwa Aburahamu omuheereza wangye. 25Isaaka yaayombekayo eitambiro, yaaramizayo Nyakubaho kandi yaayeteererayo eihema. Okwo nayo abairu ba Isaaka baafukurayo eiziba.
Isaaka okukora endagaano na Abimeleki
26Bwanyima Abimeleki akaruga Gerari aine Ahuzati omuhi we w'obwengye na Pikoli omukuru w'eihe rye, yaija ahari Isaaka. 27Reero Isaaka yaababuuza ati: Muunyiziireho ki, haza mwanyangire mukambinga owaanyu? 28Baamugarukamu bati: Nitureebera kimwe ku Nyakubaho ari hamwe naiwe. Nikyo turikugirira tuti: Ka turahirane, tukore naiwe endagaano; 29ku otaritukora kubi nk'oku naitwe tutaine ki twakukozire tukagira eki twakwitsa, kureka okukukorera ebirungi tukakuraga n'obusingye. Mbwenu reeba, ori ou Nyakubaho ahaire omugisha. 30Atyo abateekyera obugyenyi, barya, banywa. 31Omu kasheeshe baimuka kare barahirana. Bwanyima Isaaka abaraga, bamurugaho n'obusingye. 32Eryo izooba abairu ba Isaaka baija baamugambira eiziba ri bafukwire, bamugira bati: tuzoire amaizi. 33Nawe aryeta Shiba. Nikyo orwo rurembo rurikweterwa Beerisheba n'eri izooba.
Esau okushwera abanyamahangakazi
34Bwanyima Esau ku yaahikize emyaka makumi ana y'obukuru, yaashwera Yudita muhara wa Beeri Omuhiiti, na Basemaati muhara wa Eloni nawe Omuhiiti. 35Haza abo bakazi baanyangaraza Isaaka na Rebeka.
Yakobo okuryangatanisa omugisha gwa Esau
Currently Selected:
Kut 26: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
