1 Abhakörintö 10
10
Motakaasengerra ëbhëtöndö
1Abhakumya bharikyane, nkutuna ndë momanye igha, abhakörö abhëëtö bhonswe igho, mbaatangatwanga na risaarö,#10:1 Maaha mo-ketabho ikya Ukurishoka 13:21-22. bhakaheta bhonswe igho mu-nyansha ghatë, 2bhakabhatiisibhwa bhonswe igho ko nshera iya risaarö na inyansha, bhabhe abha Mosa.#10:2 Maaha mo-ketabho ikya Ukurishoka 14:22-29. 3Bhonswe igho bhakarya ibhyakorya, bheno bhyaaruurë mu-ryobha.#10:3 Maaha mo-ketabho ikya Ukurishoka 16:35. 4Ghwiki bhonswe igho bhakanywa amanshë ghaaraghaara, ghano ghaaruurë ku-Waryobha. Ko bhoora amanshë ghano bhaanyööyë, n-gano ghaarwanga ku-ritare#10:4 Maaha mo-ketabho ikya Ukurishoka 17:1-7; Okobhara 20:2-11. reno ryaabhasoorananga. Ritare riyö, n-Kiristo yaarë. 5Kasi abhantö abhaaru mo-bhayö, Waryobha tiyaatëghëriibhwi nabho hë, ku bhuyö akabhasikya ku-riköngö.
6Mbe, amangʼana ghayö, ghaabha ëkërëngyö kö-bhëëtö, okore totakaabha na oronamba urwa ukwighomba amangʼana amaghogho kya bhono bho bhaaighömbirë. 7Motakaasengerra ëbhëtöndö kya bhono abhandë bhaakörrë. Amaandeko Amahörëëru ko engʼana iyö gharaghamba igha, “Abhantö mbaaikaayë bhakarya na ukunywa, hano bhakomara, bhakaimoka, bhakabhina.”#10:7 Maaha mo-ketabho ikya Ukurishoka 32:6. 8Motakaakora obhosooraare, kya bhono abhandë mo-bhayö bhaakörrë, ekaghera abhantö ëbhëkwë merongo ëbhërë na bhatatö bhakasikibhwa ku-rusikö örömwë.#10:8 Maaha mo-ketabho ikya Okobhara 25:1-9. 9Motakaashaasha Omonene#10:9a Omonene. Ibhibhuria isyëndë seraghamba, Waryobha. uwëëtö Yëësu Kiristo, kya bhono abhandë mo-bhayö bhaakörrë, ekaghera bhakaromwa na sinshoka, bhakakwa.#10:9b Maaha mo-ketabho ikya Okobhara 21:5-6. 10Motakaibhëmbëërya kya bhono abhandë mo-bhayö bhaaibhëmbëërri, ekaghera bhakasikibhwa na umusikya.#10:10 Maaha mo-ketabho ikya Okobhara 16:41-49.
11Mbe, ghayö ghonswe igho ghaabhanyöörrë, ngaandëkirwë, okore ghabhe ëbhërëngyö ibhya okotokaania, bhëëtö bhano törëngë ku-sinsikö isya umuhiko. 12Ku bhuyö ono akokanya igha naimërëëyë, angarre atakaaghwa. 13Amashaasho ghano mwaanyoora, n-kya ghano abhantö abhandë bhakunyooranga. Kasi momanye igha, Waryobha uwa heene, taatighe mushaashwe okokera obhotoro ubhwënyu. Hano mwashaashwa, Waryobha nkobhahaana arë obhotoro ubhwa ököghömërrya na enshera iya ukurwa-mo.
Ibhyakorya ibhya Omonene uwëëtöna ibhya ukumwensera ëbhëtöndö
14Ku bhuyö abhaghonshe abhaane, motakaasengerra ëbhëtöndö kora hake hë! 15Nkushumaasha ndë na abhantö bhano momanyirë amangʼana ghayö, ku bhuyö mwitaahe amangʼana ghayö ngambirë. 16Hano twakumya Waryobha ko okoghera iya ekekombe ikya obhongʼoore keera, hayö ta-maanyinga agha Yëësu Kiristo ukunyoora torasanga? Omokaate ghono tokobhotora, hayö tö-möbhërë ughwa Yëësu Kiristo ukunyoora torasanga? 17Ko bhoora omokaate n-gömwë, na bhëëtö bhano tokosanga omokaate ghuyö m-baaru törë, kasi m-möbhërë ghömwë törë.
18Momaahere ko-Bhaisiraëri. Abhantö bhano bhakorya ikimwenso, nda nkoghootana bharë na ikimwenso kiyö?#10:18 Maaha mo-ketabho ikya Amangʼana agha Abharaawi 7:6-10, 7:14-15. 19Bhoono n-kë nkaghamba? Ngambe igha, ibhyakorya bheno bhimwënsëywë ëbhëtöndö, mbeena ubhwera? Handë igha, ëbhëtöndö mbeena ubhwera? 20Ti-igho hë. Keno nkoghamba ni-igha, ibhimwenso bheno abhantö bhano bhatamanyirë Waryobha bhakumwensa, na-masambwa bhakumwensera te-Waryobha hë. Tinkutuna mosange na Waryobha, na eno morasanga na amasambwa. 21Temotore okosanga ko-meeza iya Omonene uwëëtö, na eno morasanga ko-meeza iya amasambwa. 22Kasi, ni-igha twighërri rihari irya Omonene uwëëtö? Kasi nkokanya mörë igha ntoona singuru komokera?
Tokorenga ghano gharaaghere Waryobha atöönibhwi
23Abhantö bharaghamba igha, “Ëbhëntö bhyonswe igho, m-biiya bhiiki.” Kasi te-bhyonswe igho bheena ubhwera hë. “Ëbhëntö bhyonswe igho m-biiya bhiiki,” kasi te-bhyonswe igho bhekohaghaasha umukumo ughwa ömöntö. 24Ömöntö atakaatönibhwa na ehoorohooro iyaaye umwene igho hë, kasi atönibhwi na ehoorohooro iya murikyaye.
25Kera ëkëntö keno këköghöribhwa mo-moteera, moraagherenga motakaabhöörërryanga ko okoghera iya amaitegherro. 26Ngambirë igho, ko bhoora Amaandeko Amahörëëru gharaghamba igha, “Ekebhara na ëbhëntö bhyonswe igho bheno bheemo, ni-ibhya Omonene.”#10:26 Maaha mo-ketabho ikya Zabhuri 24:1.
27Ömöntö ono atarëngë umukumya hano abharaarëkirë, na bhëënyu mwikërëëyi ukughya, moghende moraaghere kera ëkëntö keno moraareeterwe, motakaabhöörërryanga ko okoghera iya amaitegherro. 28Kasi hano ömöntö araabhatëëbhi igha, “Ibhyakorya bheno bhimwënsëywë ëbhëtöndö,” motakaarya ibhyakorya bhiyö, ko okoghera iya ömöntö uyö abhatëëbhëri, na ko okoghera iya amaitegherro. 29Hano naghamba amaitegherro, ta-aghaaho nkoghamba hë, kasi na-agha ömöntö uyö abhatëëbhëri. Ko bhoora igha, n-kwakë öbhötöönööni ubhwane bhobhotorrwe ikiina na amaitegherro agha ömöntö uwöndë? 30Nyoore öni nkorya ndë ibhyakorya bhiyö ku ukukumya Waryobha, n-kwakë ntokwe ko okoghera iya ibhyakorya bheno ndëëyë ndakumya Waryobha?
31Mbe, hano mwarya handë ukunywa, handë hano mwakora kyokyonswe keera, mokorenga kwa ökötöönia Waryobha. 32Motakaabha ikibhuno ikya ukutimba Abhayahudi, abhantö bhano bhatarë Abhayahudi, handë ekanisa iya Waryobha. 33Mobhe kya öni bhono nkötëghërya abhantö bhonswe igho, ko amangʼana ghonswe igho ghano nkokora. Tenkokora igho ko okoghera iya ehoorohooro iyaane, kasi n-ko okoghera iya ehoorohooro iya abhantö abhaaru okore bhatööribhwi.
Currently Selected:
1 Abhakörintö 10: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.