1 Abhakörintö 8
8
Ibhyakorya bheno bhikumwenserwa ëbhëtöndö
1Mbe, bhoono tigha nshumaashere amangʼana agha ibhyakorya bheno bhimwënsëywë ëbhëtöndö. Ntomanyirë bhono bhëënyu mokoghamba igha, “Bhëëtö bhonswe igho, ntoona obhomanyi ko amangʼana ghayö.” Kasi obhomanyi, nkoreeta bhörë ikiheemere ko-bhantö. Na righonshe ryo nkoghera rërë umukumo ughwa ömöntö ghonagha. 2Nyoore aaho ömöntö ono akokanya igha, namanyirë engʼana nyabhorebhe, amanye igha, taghemanyirë kya bhono ikutunwa igha aghemanye. 3Kasi hano ömöntö araahanshe Waryobha, uyö namanyekaini ku-Waryobha.
4Mbe, ko amangʼana agha okorya ibhyakorya bheno bhimwënsëywë ëbhëtöndö, ntomanyirë igha, ëbhëtöndö, tebheena engʼana ko-kebhara kono hë, na Waryobha nö-ömwë igho. 5Nokaanyoora bheeho ëbhëntö bheno bhekobherekerwa igha bhawaryobha, mbekaabha mu-ryobha handë ko-kebhara kono, kya bhono okomaaha igha bhawaryobha m-baaru, na bhano bhakobherekerwa igha abhanene bhonswe m-baaru, 6kasi kö-bhëëtö, Waryobha nö-ömwë igho, kora we Taata uwëëtö. Uyö we yaabhömbirë ëbhëntö bhyonswe igho. Kora öbhöhöru ubhwëtö ntonabho okore tutighinkanerenga Waryobha. Kora aaho Omonene ömwë igho, uyö we Yëësu Kiristo, ëbhëntö bhyonswe igho mbyaabhömbirwë okohetera ku-uyö, na öbhöhöru ubhwëtö nku-uyö bhokohetera.
7Te-bhantö bhonswe igho bhamanyirë amangʼana ghayö hë, ko bhoora bhaaho abhandë bhano bhaanara amangʼana agha ëbhëtöndö. Abhantö bhayö kora bhoono igho hano bhaarya ibhyakorya bheno bhimwënsëywë ëbhëtöndö, nkorya bharë bhaana amaitegherro agha ikimwenso ikya ëbhëtöndö, nkunyankuha bharë, ko bhoora amaitegherro aghaabho m-matëntëëru. 8Ibhyakorya tëbhëkötöörrya ömöntö okobha haangʼë na Waryobha. Ntokatigha okorya, titukusuuhwa na ëkëntö hë, kora ntokaarya, titukunyoora ehoorohooro yoyonswe igho hë.
9Kasi mwiyangarre bhuuya, obhomanyi ubhwënyu bhotakaatimba bhanyamukumo mötëntëëru. 10Ko bhoora hano nyamukumo mötëntëëru araamaahe wikaayë mu-risengerro irya ëbhëtöndö orarya, bhoono taitegherre mo-maitegherro aghaaye igha naingʼarëëyi okorya ibhyakorya bheno bhimwënsëywë ëbhëtöndö? 11Maaha mbe, umukumya murikyaho uyö, nyamukumo mötëntëëru ono Yëësu Kiristo yaakwërëëyë, nasira ko okoghera iya obhomanyi ubhwaho bhuyö.
12Ku bhuyö hano mwasarrya abhakumya bharikyënyu na ukunyahaara amaitegherro aghaabho amatëntëëru, hayö n-Yëësu Kiristo we ukunyoora mosarëëyi. 13Ku bhuyö, hano ibhyakorya bheraaghere umukumya murikyane aitimbe, obhoheene tenderya inyama ghwiki hë, okore ntakaaghera umukumya murikyane aitimbe.
Currently Selected:
1 Abhakörintö 8: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.