Abhagharatia 5
5
Öbhötöönööni ubhwa Umukiristo
1Kiristo yaatohaana öbhötöönööni, okore tobhe abhatöönööni. Ku bhuyö ni-igha monaghe, motakaikërrya ukukyora ghwiki mo-bhoghorwa ubhwa amaraghërryö. 2Mwitegherre keno öni Pauro nkobhatëëbhya. Ndabhatëëbhya igha, hano moraaikërri okosaarwa ko okoghera iya okoghoota amaraghërryö, Kiristo taabhe na ubhwera bhwobhwonswe bhoora kö-bhëënyu hë. 3Ndabhatëëbhya harabhu igho ghwiki igha, umushaasha wowonswe igho ono araaikërri okosaarwa, ni-igha aghoote amaraghërryö ghonswe igho agha Mosa. 4Nyoore nkwitengʼera mörë okobharwa abha heene ko okohetera okoghoota amaraghërryö, hayö momanye igha, noraanyoore bhëënyu abheene momarrë ukutighana na Kiristo. Ghwiki kora noraanyoore n-kebhara mörë iya örööbhö urwa Waryobha. 5Kasi bhëëtö, keno tukwitengʼera ni-igha, Waryobha naraatobhare igha m-ba heene törë, ko bhoora tukukumya Kiristo. Kiyö nkyo tokoghanya ko obhotoro ubhwa Umwika Ömöhörëëru. 6Mbe hano oraanyoore igha ntoghootaini na Kiristo Yëësu, okosaarwa, handë ukwanga okosaarwa, tekoona omoremo ghoghonswe igho hë, ekenene, nu-mukumo ghono ghokokora emeremo ku righonshe.
7Ekembere mwaakoranga bhuuya! Bhoono nawë abharëbhërrëëyë igha motakaaghoota amëëghyö agha obhoheene? 8Ömöngʼënërrya uyö, n-wöndë igho, te-Waryobha ono yaabhabherekera hë. 9Kasi momanye igha, amëëghyö agha obhorongo ghayö, n-kya bhono abhantö bhakoghamba igha, “Ehamiira engʼanabhosa, nkokora ërë obhose bhonswe igho bhotondora!”#5:9 Ehamiira engʼanabhosa, nkokora ërë obhose bhonswe igho bhotondora. Ensonga iyaamo ni-igha, amëëghyö agha obhorongo ngakaabha amake igho, nkoromaana gharë mo-bhantö abhaaru. 10Ko bhoora igha bhëënyu na-abha Omonene Yëësu mörë, ku bhuyö nemanyirë igha, timwikërri okongʼainwa hë. Kyokyonswe igho keno keraabhe, kasi ömöntö uyö akobhangʼaina narishibhibhwa.
11Abhakumya bharikyëtö, ndaighwa abhantö abhandë bharaghamba igha, öni nkoraareka nkërë igha, abhashaasha bhonswe igho ni-igha bhasaarwe. Hano okaanyöörrë igha m-maheene ni-igho nkoraareka, n-kwakë Abhayahudi bhakunyankya? Singa ni-igho nkoraareka ko-bhantö, okoraareka ukwane amangʼana agha omosarabha ughwa Yëësu, tekokaaghërrë Abhayahudi bhandererre hë. 12Nkwighomba ndë igha, abhantö bhayö bhakobhanyankya ko amangʼana agha okosaarwa, kora n-hano bhakaainatirë abheene!
Eteemo iyëëtö etangatwenga na Umwika Ömöhörëëru
13Bhëënyu abhakumya bharikyëtö, Waryobha yaabhabherekera okore mobhe abhatöönööni. Kasi motakaakora öbhötöönööni ubhwënyu bhobhe ubhwa oronamba urwa ömöbhërë, kasi mötöörraninga, na mohanshanenga. 14Amaraghërryö ghonswe igho agha Mosa nkokomanibhwa gharë hamwë ko bhoghambi bhono bhokoghamba igha, “Ohanshe murikyaho kya bhono wihanshirë uwe umwene.”#5:14 Maaha Amangʼana agha Abharaawi 19:18. 15Kasi nyoore nkoromana mörë na okoraagherana kya matyënyi, mwiyangarre motakaasha kwisikya bhëënyu abheene.
16Mbe, keno nkobhatëëbhya ni-igha, eteemo iyëënyu etangatwenga na Umwika Ömöhörëëru. Hano moraakore igho, temohanshe oronamba urwa ikisheema urwa ömöbhërë. 17Nkobhatëëbhya ndë igho ko bhoora igha, bhyonswe igho bheno ömöbhërë ghukwighomba, te-bhyo Umwika Ömöhörëëru akutuna hë. Kora bheera Umwika Ömöhörëëru akutuna, te-bhyo oronamba urwa ömöbhërë rukwighomba hë. Umwika Ömöhörëëru taana öbhömwë na oronamba urwa ömöbhërë hë, ku bhuyö temokotora okokora keera mukutuna igha mokore. 18Kasi hano eraabhe igha Umwika we akobhatangata, temoobhe abhaghorwa abha amaraghërryö hë.
19Mbe, amangʼana ghano bhakokora abhantö abha oronamba urwa ömöbhërë, ngamanyekaini igha, no-bhosooraare, ubhunyanku, okokora amangʼana agha sënsöni, 20okosengerra ëbhëtöndö, ubhuturutumbi, ubhubhisa, ribheeha, orongʼeera, okorerra, ifitina, ukwanga ukwighwerrana, okohaanga abhantö amangʼana, 21rikenge, öbhörëëbhi, obhohoobhaaru hamwë na aghandë ghano gharëngë kya ghayö. Nkobhatëëbhya ndë ghwiki kya bhoora naabhatëëbhëri igha, abhantö bhano bhakokora amangʼana kya ghayö, tebhaana umwandö ghwoghwonswe ghoora mo-Bhokama ubhwa Waryobha hë. 22Kasi hano oraanyoore igha Umwika Ömöhörëëru we akototangata, ntoraabhe na ehagho iya Umwika Ömöhörëëru. Ehagho iyö ni-iya righonshe, ukushomerwa, omorembe, ököghömërrya, öbhöntö ubhwa heene, öbhösërëënia, obhoheene, 23obhohaabhu bheena ukwirebherra. Teghaaho amaraghërryö ghano ghakokaania ömöntö igha atakaakora amangʼana ghayö. 24Hano wanyoora abhantö bhaghootaini na Yëësu Kiristo, nkunyoora örë n-kya bhano bhaahanekwa ko-mosarabha hamwë na Kiristo Yëësu. Tebhakotongwa ghwiki na oronamba urwabho urwa ëmëbhërë, hamwë na amaitegherro aghaabho amaghogho ghaara. 25Ko bhoora Umwika yaatohaana öbhöhöru obhohya, mbe ni-igha toghoote-ko obhotangati ubhwaye. 26Totakaikumyanga bhosa igho, totakatenderananga handë okokorrana rikenge.
Currently Selected:
Abhagharatia 5: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.