San Marcos 10
10
Jesús rse'adiene ki tan rhela'a to bene le'an nigolha kie'
(Mt 19.1-12; Lc 16.18)
1Jesús broaje yechhi Cafarnaúm na guiaje ga' nababa Judea kan yechhi dia ga' nababa Jordán. Na' tayobilha bedobikaka bene ga' zee, te le' bezolhoe rse'adiene le'ake, ka' rhongse tolizi. 2Balaka bene fariseos guiajke ga' ze'a Jesús, te kinda gzoake le' rhoaguia'a, gnabekene le' a dia lataj chen to bene yele'e le'an nigolha kie'. 3Le' gochhie le'ake:
—¿Nobi gne'a Moisés gonle?
4Gne'ake:
—Moisés bde lataj yela'a to bene le'an nigolha kie' chen bene na gde to guichi ga' rne'a bela'ake.
5Na'arhe Jesús gochhie le'ake:
—Moisés gochhie lén kan yela zidi nakalhe. 6Le'a ga' gzolhote'a gota' lichhileyo', Diozo be'anhe bene bguio' kan nigolha. 7Tanka bene bguio' gsanhe xoze kan xhne'e kinda gtzagane' le'an to nigolha, 8te rhopakate gakake tozi bene. Te kan labirhe nakake chopake, tozi bene beyakake. 9Chen Diozo bkoe' to bene bguio' le'an nigolha bigslano rhala yela'a le'ake.
10Kati chi ze'ake lo yo'o, bene lachhile'anke le' gnabekene le' tayobilha ki ten. 11Jesús gochhie le'ake:
—No' rhela'a le'an nigolha kie' na yezie'e nigolha yobilha, rgoe'e dolaxhkia' tan birhonhe balan nigolha kie'; 12te chen to nigolha rhele'e le'an bene kie' te yezie'e bene yobilha, le'aksikan rgoe'e dolaxhkia' tan birhonhe balan bene kie'.
Jesús rhon la'aye ka bindo
(Mt 19.13-15; Lc 18.1-17)
13Balaka bene yajoake bindo kie'ake ga' ze'a Jesús, kinda kanhe le'akabi; te ka bene lachhile'anke le' gzolhoke rdilake bene rhajoake le'akabi. 14Jesús, ble'ene ten, bdze'e te gochhie le'ake:
—Legde lataj kida ka bindo ga' zea', bigzagalhe, le'a yelarne'abe'a ki Diozo naka ki no' naka ka' le'akabi. 15Talite'a rhapa lén no' labi rzi'i yelarne'abe'a ki Diozo ka' to bindo, labi gake koenda yeyoe' lo yelarne'abe'a ki Diozo.
16Te bnide ka bindo, na be'an la'aye le'akabi rxoe ne'e yikiajkabi.
To bene rze'akie rtzalaje le'an Jesús
(Mt 19.16-30; Lc 18.18-30)
17Kati Jesús beyoe' neza, bchhin to bene rze'azenhe, bze'achoe xhibe lawe na gnabene le':
—Muestro wen, ¿Nobi rhala gonha te sde'aleda yelanaban tzalasa?
18Jesús bochhie':
—¿Nobixhkia' rhe'agalho ne'adia bene wen? Tozi bene wen zoe: Diozo nake bene wen. 19Loe' chinezelho tan rhe'anhe Diozo gonrha: Bigotilho bene, bitzagalho tixe nigolha, bikoanlo, bigpaguelho bene xhkiachola, nika silho ye'a; te be'an balan xozilho kan xhnalho.
20Bene na gochhie le':
—Muestro, yogote'a tan chibe'anha kumplirhe kati nakatia xhkuidi.
21Jesús byoe' le' gokiene le', na bochhie':
—Dia yeto' ta rhala gonlo: beyiaj, yajye'ati yogote'a tan dia kio' te bde' kika bene ye'achi. Te kan gapalho babanheza lo yeba'. Dena'a da te gdo ne'adia.
22Bene na gzoa ye'achie nan benhene ten; le'a tan nake bene rze'akiegueze.
23Jesús byoe' sdote'a kuite na gochhie ka bene lachhile'anke:
—¡Ze'adigazi rhon kika bene rze'akiekene tzo'oke lo yelarne'abe'a ki Diozo!
24Bene lachhile'anke le' gokiekene banachhi nan benkene ten, na Jesús gochhie le'ake tayobilha:
—Lén xhi'inhado, ¡ze'adi rhon kinda tzo'oke lo yelarne'abe'a ki Diozo! 25Rhonrhe yolaj ki to camello teba' lo naga yechi', ka' to bene rze'akie tzo'oe lo yelarne'abe'a ki Diozo.
26Nan benkene ten gokiene banachhirhe, te rnabe leza'ake:
—¿Te nono waka sla chen?
27Jesús byoe' le'ake na gochhie le'ake:
—Kika bene rhon ze'adi, zan ki Diozo labi, le'a Diozo yogote'a wake gonhe.
28Pedro gochhie Jesús:
—Ne'ato chibsan na'ato yogote'a tan dia kne'ato, te chigdoto loe'.
29Jesús bochhie':
—Talite'a rhapa lén notite'azi chen nia' kia' o tan bkie'abi xhtidza bsan ne'e yo'o kie', o bene bichie', zanhe, xhne'e, xoze, xhi'inhe, yo' kie', 30wazi'i lo yelanaban dza'arha nan togayoa mazirhe de yo'o, bichie', zanhe, xhne'e, xhi'inhe kan yo', za'akalha rsakaya'ake le'; te lo yelanaban ziza'a wazie'e yelanaban tzalasa. 31Te tixeka bene ze'ake nan nerho, yeyonke yelhalhe; kan tixeka bene ze'ake nan yelhalhe, yeyonke nerho.
Jesús rguixaje'e ta guione niaa tan gatie'
(Mt 20.17-19; Lc 18.31-34)
32Zeajke Jerusalén, te Jesús zeaje lawe lo ka bene tzachhino lachhile'anke le'. Le'ake rhe'akiekene banachhi, te ka bene zeajke xhkodzake rdzebike. Na tayobilha Jesús bledze kieze ka bene tzachhino lachhile'anke le', te gdixajene le'ake ka' gaka kie': 33Ka' rle'elhe lén, nan zeajrha Jerusalén, ga' Xhi'in bene bguio' yodeke le' lona'a ka xanka bxozi kan muestro ki xhba'a, na gzoake le' rhoa yelagoti te yodeke le' lona'a ka bene zito. 34Gtitajkene le', gdake le' xhenhe, sgagodzake le' te gotike le'; te nan gaka tzona dza yeyasayebanhe.
Jesús rhochhie' ki Santiago le'an Juan
(Mt 20.20-28)
35Santiago le'an Juan, nakake xhi'in Zebedeo, guiajke ga' ze'a Jesús te gochhike le':
—Muestro, rhe'anheto gonlo ne'ato yodarhe ka' tan snabato kio'.
36Le' gnabene le'ake:
—¿Nobi rhe'anhelhe gonha nia' kie'alhe?
37Gochhike le':
—Kati xhchhin dza koelho ga' sne'abe'alho be'ana lataj koeto kuitalho toto tzala'a lhi' ye toto tzala'a yegalha.
38Jesús gochhie le'ake:
—Lén binezelhe bi rnabalhe. ¿Awakalhe guia'ajlhe ta sla'a tan guia'aja ne'adia, kan yezilolhe ka' yezilawa ne'adia?
39Le'ake bochhike:
—Wakato.
Jesús gochhie le'ake:
—Lén guia'ajlhe ta sla'a tan guia'aja ne'adia, kan yezilolhe ka' yezilawa ne'adia; 40te tan koelhe kuita tzala'a lhi' o tzala'a yegalha labi naka lona'a snia nono koe kuita, le'a Diozo chigleaje ka bene koeke kuita.
41Kati benke ye chi ka bene lachhile'anke le', bdza'ake Santiago kan Juan. 42Na Jesús bledze le'ake, te rhe le'ake:
—Ka' chigsi nezelhe, ga' dzaka bene birheajkeneye'a Diozo na' notzeke bene rhe'akiekene naka lona'ake sne'abe'ake kon rsakaya'ake bene yechhi, na bene dekene rdekate'alhe be'a rgonkene chhin bene yechhi. 43Te de lén labi rhala gaka kan. Natzalha, no' rhe'anhe se'a yajlo, rhala guioe' ka bene yebalake chen bi rnaba rkinkene. 44Na de lén no' rhe'anhe gaka bene yajlo, rhala gake bene we'anchhin kika bene yebalake. 45Le'a ni Xhi'in bene bguio' labi bide' kinda gonke chhin kie', bide' kinda gake bene we'anchhin kika bene kan gde yelanaban kie' kinda gsle'e ka bene lichhileyo'.
Jesús beyonhe Bartimeo bene birle'ene
(Mt 20.29-34; Lc 18.35-43)
46Bchhinke yechhi Jericó. Te kati Jesús beze'e yechhi na, le'an bene lachhile'anke le' kan bene zen, to bene birle'ene rnabe karda' rhelawe Bartimeo, xhi'in Timeo, rhie rhoa neza. 47Nan benhene za'a Jesús bene Nazaret, bene birle'ene gzolhoe rbechhiye'e:
—¡Jesús, Xhi'in David, beye'achilachhi ne'adia!
48Tixeke rdilake le' kinda se'e balanzi, te le' rbechhiya'arhe mazirhe:
—¡Xhi'in David, beye'achilachhi ne'adia!
49Na'arhe Jesús gzoe', te gne':
—Legledze nilha.
Bledzake bene birle'ene, rhe'ake le':
—Bezi balhorhe, beyasa; na rne'a Jesús loe'.
50Bene birle'ene bzale larhe naxoe', na gxitie to guiaje ga' ze'a Jesús, 51na Jesús gnabene le':
—¿Nobi rhe'anhelho gonha kio'?
Bene birle'ene bochhie':
—Muestro, rhe'anda yelhe'eda.
52Jesús gochhie le':
—Waka yiajlho; tan rheajelhoye'a ne'adia chibeyakalho.
Tina'azi bene birle'ene belene, te gdoe Jesús toneza
Currently Selected:
San Marcos 10: XDZPY
Highlight
Share
Copy
Want to have your highlights saved across all your devices? Sign up or sign in
Porciones en Zapoteco de Yalahui, Oaxaca, México © Sociedad Bíblica de México, A.C.
