MI ÑAMA 12
12
1Li Miali Diedo den yedi Musa leni Alono Ejipiti diema nni:#Lef 23.5; Coa 9.1-5; 28.16 2«O naa ŋmaalo baa tie yipo o ŋmakpialo. O baa tie yipo li binli ŋmakpialo. 3Yin maadi leni Isalele nitaana kuli ki yedi ba: O naa ŋmaalo yaa danpiiga, yi baa taa ki pebiga diedaano kuli leni o niba po, diegu kuli baa pia ku yaa pebiga. 4Li yaa tie ke ku diegu nni yaaba wa ki kan fidi ki gbeni pebimunga ban taani leni bi yieninlieba nani bi yaa niba n pundi maama ki pebiga po ki coadi yua kuli n baa fidi ki je yaa banlu. 5Li baa tie yaa pebiga n ki pia poadi kuli, ki tie bontonga ki go pia binyenli. Yi baa fidi ki taa pebiga bi ŋuabiga. 6Yi baa kubi ga hali o naa ŋmaalo yaa piiga n danaali. Isalele nitaana kuli baa padi ga laa daali yaa yenjuogu. 7Bi baa taa ki soama ki tieni ma ban dini ga yaa dieli nni li buliñoatuogili leni ti buliñoakpiandaadi po. 8Laa ñiagu bi baa puli ti nandi ki go ŋmani ti. Bi baa ŋmani ti leni yaa dupen n kaa pia *dabinli leni yaa muadi n to. 9Yin da ŋmani ti ke tii beni, yin da ŋaani ti mi ñima nni mo, ama yi baa puli ti ki taani leni li yuli leni a taana leni ti muadi kuli. 10Yin da cedi baa waamu n sieni hali ku tiŋaagu. Baa li yaa sieni, ku tiŋaagu yin sia ti mi fantama nni. 11Yin baa ŋmani ti maama nne: yin kpa ñagini yi ciamu ti gbanñagiditi ki pili yi cacaadi ki mubini yi gbiami yi nii nni. Yi baa ŋmani ti tontoni. Li tie Li Miali Diedo yaa *Pendima jaanma.
12Laa ñiagu n baa ña ki gaani Ejipiti diema nni kuli. N baa pua Ejipiti diema bonjakpiala kuli ki cili leni bi niba ki ban taani leni ti yandi kuli. N baa jia ti buudi leni Ejipiti yaa *buli kuli. N tie Li Miali Diedo. 13Mi soama baa tie mi maalima yin ye yaa diedi nni. N baa le mi soama ki pendi ki ŋa yi. Lani, o falabiado kan baa yi min baa pua Ejipiti diema yaa yogunu. 14Yi baa kubi laa daali yaa tiadima. Yi baa jaani mi jaanma ki jigindi Li Miali Diedo kelima laa tiadima yaa po. Yi baa jaani ma man tua yipo yaa bogidili n baa ye yogunu kuli.#Ñam 23.15; 34.18; Lef 23.6-8; Coa 28.17-25
Yaa dupen n ki pia dabinli jaanma
15Hali dana lele yi baa yaa di yaa dupen n ki pia dabinli. Hali laa dana yaa cilima daali dabinli kan yaa ye yi diena nni, kelima yaa nilo n dini yaa dupen n pia dabinli li dacilidaali leni li daleleeli siiga, bi baa ñani o Isalele yaaba siiga. 16Li dakpiali, yi baa tieni taangagidikaali, li daleleeli mo yi go baa tieni taangagidikaali. Oba kuli kan soani tuonliba laa dana yaa niinni. Yi baa fidi ki tieni nilo kuli po o jiema bebe.
17Yi baa kubi yaa dupen n kaa pia dabinli yaa jaanma yeni kelima li tie laa daale ke n den baa teni yi toacaga n ña Ejipiti diema nni. Yi baa kubi laa daali lan tua yaa bogidili n kan pendi nifiima n tu nifiima. 18O ŋmakpialo yaa piiga n danaali yaa yenjuogu yi baa cili ki je yaa dupen n ki pia dabinli ki yaa caa hali o piilie n dayenli juogu. 19Dana lele yeni yin da pia li dabinli yi diena nni baa waamu. Yaa nilo n dini yaa dupen n pia li dabinli kuli, bi baa ñani o Isalele nitaana siiga o yaa tie caano bi o yaa tie dotielo. 20Yi kan je yaa dupen n pia dabinli ama yi baa di yaa dupen n ki pia dabinli yin baa ye naani kuli.»
Mi Pendima jaanma jiema ŋanbima
21Musa den yini Isalele yaaba nikpeliba kuli ki yedi ba: «Gedi mani ki taa ti yandi yi diedi po ki padi mi Pendima jaanma. 22Lanwani yi baa taa *isope yaa faadi ki tuuni mi soama nni, yaama n baa ye ku tadigu nni ki tu li buliñoatuogili buliñoakpiandaadi leni a buliñoagundilieda. Yin tu ti leni yaa soama n ye ku tadigu nni. Yi siiga oba kuli n da ña o dieli nni ki cili lan yogunu hali ku tiŋaagu. 23Li Miali Diedo yaa goadi ki pua Ejipiti yaaba, o yaa laa mi soama li buliñoatuogili buliñoakpiandaadi kani Li Miali Diedo baa pendi ki ŋa laa buliñoabu yipo. O kan tuo ke o bolindo n kua yi diedi nni ki pua yi.#Ebl 11.28 24Yi baa kubi laa bonla lan tua yipo li bogidili yinba leni yi bila po hali yaa yogunu kuli. 25Yi yaa kua Li Miali Diedo n baa pa yi yaa diema nni nani wan den niani yi maama, yi baa kubi li naa bogidili yaali n pia mi gagidima. 26Yi bila yaa buali yi li naa bogidili bundi yipo bee? 27Yi baa goa ki yedi ba: ‹Li tie mi Pendima jaanma yaa padili yaali n kpiagidi Li Miali Diedo, yua n den pendi ki ŋa Isalele yaaba yaa diedi yula po, Ejipiti diema nni wan den pua Ejipiti yaa yogunu ki ciadi yaa diedi.› » Isalele yaaba den gbaani ki pugi Li Miali Diedo. 28Isalele yaaba den gedi ki ban tieni Li Miali Diedo n den waani Musa leni Alono yaala.
O fala juodika: Ejipiti bonjakpiala kuuma
29Ku yagisiigu Li Miali Diedo den pua Ejipiti diema nni a bonjakpiala kuli. Li den cili leni *Falono yua kaa ti gbandi po yaa bijakpelo ki gedi ki ban taani leni ti yandi yaa bontonkpiamu kuli.#Ñam 4.22-23 30Falono den fii ku ñiagu wani leni o naacenba leni Ejipiti yaaba kuli. A bubula den yaba Ejipiti diema nni hali boncianla kelima li naa den pia baa dieyengu yaagu n naa den pia kuuma. 31Laa ñiagu Falono den yini Musa leni Alono ki yedi ba: «Fii mani ki ña n niba siiga, yinba leni Isalele yaaba kuli. Gedi mani ki ban kpiagi Li Miali Diedo nani yin den yedi maama. 32Taa mani yi pe leni yi ne nani yin den yedi maama. Gedi mani ki gaali nni.» 33Ejipiti yaaba den tigini bi niba ki jaligi ki bua ki ñani ba mi diema nni kelima bi den yedi: «Tikuli baa bodi.»
34Bi niba den taa bi dupen yonkaadi ki tugi ke ti daa pili. Bi den gbabini bi dupentiadi bi tiadi nni ki bugi. 35Isalele bila den tieni Musa n den yedi yaala. Bi den mia Ejipiti yaaba ke ban pa ba yaa tiadi n tie ŋanjilifa leni yaa tiadi n tie wula leni ti tiayiekaadi. 36Li Miali Diedo den teni ke Ejipiti yaaba mangi bi pala bi niba po ke bi den puni ba ban mia yaala kuli. Bi den fagi Ejipiti yaaba.#Ñam 3.21-22 37Isalele yaaba den fii Lamisesa ki gedi Sukoti ki bua ki pundi jaba tudakobiluoba yaaba n pundi ki kua minteeli, ki daa taani bi puoba leni a bila. 38Bi niba boncianla yaaba n tie nibuotoe den taani ki fii leni ba. Bi den pia a yangola boncianla i pe leni i ne. 39Bi den taa ban den ñani yaa dupen yonkaadi Ejipiti nni ki pua ti lalaadi ke tii pia dabinli kelima Ejipiti diema nni bi den deli ki ñani ba ke baa baa yaa yogunu n baa guudi ti dupenyonkaadi n pili ki buali ban kubi mi jiema li sancenli po.
40Isalele yaaba n den tieni yaa bina Ejipiti nni den pundi kobinaa n bina piitaa.#Cil 15.13; Gal 3.17
41Kobinaa n bina piitaa n den tuoni yaa daali Li Miali Diedo yaa toacaga kuli den ñani Ejipiti diema nni. 42Laa ñiagu den tie jaanma Li Miali Diedo yeli yaa kpiagidi po. Nani Li Miali Diedo n den dua ki guu ki ñani o bila Ejipiti diema nni yeni, moko binli n tu liyali Isalele yaaba kan guani laa daali yaa ñiagu kelima li gagidi Li Miali Diedo yaa po yo.
Ban baa jaani mi Pendima jaanma maama
43Li Miali Diedo den yedi Musa leni Alono: «Line n tie li ñoabonli mi Pendima jaanma po. Nilamoba kuli kan je ma. 44A yaa da yaa yonbo leni a ligi ki kuani o ku koanciagu wani n baa fidi ki je ma. 45O caano leni o tuonsoanlo kan je laa jiema. 46Yi kan je ma niini se li dieli nni. Yi kan taa ti nandi ki ñani ti li dieli nni, yin da mudi baa kpabiyenli mo.#Coa 9.12; Jan 19.36 47Isalele bila nitaana kuli baa kubi mi Pendima jaanma. 48Li yaa tie ke o nilamo, yua n kaa yi siiga bua ki kubi Li Miali Diedo yaa Pendima jaanma se o diegu nni bonjaga kuli n kua ku koanciagu. Lanwani o baa fidi ki nagini ki jaani, o baa tie nani yi buolu yua. Ama jifoloba kuli kan je ma. 49Laa *bali maama baa tie yenma o dotielo po leni o caano yua n kaa yi siiga kuli po.» 50Isalele yaaba kuli den tieni Li Miali Diedo n den waani Musa leni Alono yaala ki naa ŋa liba kuli. 51Laa daali lige kakap ke Li Miali Diedo den teni ke Isalele yaaba kuli ñani Ejipiti diema nni ki cuoni caga caga nani bi toacaga n tie maama.
Yaa bali maama n tuugi leni mi Pendima jaanma
Currently Selected:
MI ÑAMA 12: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
