MI ÑAMA 13
13
1Li Miali Diedo den maadi leni Musa ki yedi o: 2«Gagidi npo bijakpelo kuli n tu bijakpelo Isalele yaaba siiga leni ti yandi siiga kuli kelima mini n die ba.»#Coa 3.13; Luk 2.23
3Musa den yedi bi niba: «Yaa tiadi mani li naa daali, yaa daali ke yi ñani Ejipiti diema nni ti yonbidi nni. Li tie leni o nuu yaa paaciamu yo ke Li Miali Diedo ñani yi mi diema nni. Oba kuli n da ŋmani yaa dupen n pia li *dabinli laa daali. 4Yi ñani dinla yaala n tie i di n maa yaa ŋmaalo.#13.4 Laa ŋmaalo n den tie Isalele yaaba binli ŋmakpialo yua n yen cili citaa boagidima ki ban juodi cinaa yaa boagidima. 5Li Miali Diedo yaa teni ke yi kua Kanana yaaba, Heta yaaba, Amola yaaba, Hefa yaaba leni Jebusa yaaba yaa diema nni, wan den poli yi baanba po ke o baa pa yi yaa diema, mi naaŋanma leni ti siadi n dua naani, yin kubi mi naa *jaanma Li Miali Diedo po o naa ŋmaalo yaa niinni binli kuli. 6Hali damuna lele yi baa yaa di yaa dupen n ki pia dabinli, li daleleeli baa tie jaanma Li Miali Diedo yeli yaa kpiagima po. 7Yi baa di yaa dupen n ki pia dabinli laa daleleeda kuli. Yin da pia yi diedi nni yaa dupen n pia dabinli baa waamu. Ban da le dabinli yi diema nni kuli mo.
8Laa yogunu a baa yedi a bijua: ‹Li tie tiadima kelima Li Miali Diedo n den tieni npo yaala min den ñani Ejipiti diema nni yaa yogunu.› 9Li baa tuaapo nani mi maalima a nuu nni leni mi tiadima a yutunli po, ke Li Miali Diedo yaa *bali maama n yaa ye a ñoabu nni. Li tie kelima o nuu yu n pia u paaciamu yaa po yo ke Li Miali Diedo den teni ke a ñani Ejipiti nni. 10U yogunu yaa pundi binli n tu binli a baa kubi li ñoabonli na.
11Li Miali Diedo yaa teni ke a kua Kanana yaaba yaa diema nni yaa yogunu nani wan den poli fini leni a baanba po maama ke o go puni a ma, 12a baa gagidi ki cuani bonjakpiaga kuli Li Miali Diedo po, baa ŋan pia yaa yandi yantonkpiamu kuli Li Miali Diedo n die.#Ñam 34.19-20; Luk 2.23 13A baa taa ki pebiga ki da ki faabi o ŋunbo yaa bontonkpiaga. A yaa da ki faabi o a baa mudi o bunkpanjuoli. A go baa da ki faabi bi niba bonjakpiala kuli a bijaba siiga. 14A bijua yaa buali a yaa daali: ‹Line bundi be?› A baa goa ki yedi o: ‹Li Miali Diedo den teni ke ti ñani Ejipiti diema nni ti yonbidi nni leni o nuu yaa paaciamu. 15*Falono n den yie ke o kan tuo tin gedi, Li Miali Diedo den teni ke Ejipiti diema nni bonjakpiala kuli kpe ki cili bi niba bonjakpiala ki ban taani leni ti yandi bontonkpiala. Li tie lani yaa po ke n padi Li Miali Diedo po ti yandi yaa bonjakpiala, yaaba n tie a bontona, ki nan da ki faabi n bijaba yaa bonjakpiala kuli.› 16Li baa tie nani mi maalima a nuu nni ki go yaa naani leni mi tiadima yaa tila a yutunli po. Li tie kelima o nuu yu n pia u paaciamu yaa po yo ke Li Miali Diedo den teni ke ti ñani Ejipiti diema nni.»
U Tienu gobidi o niba bi cenli nni
17Falono n den cedi ke ku niligu ñani, U Tienu naa den teni ke bi tagini Filisiti yaaba diema nni baa ke lankani n den kuu ki cie kelima U Tienu den yedi: «Bi niba baa fidi ki le bu toabu ki jie ki sani ki guani Ejipiti diema ni.» 18Ama U Tienu den teni ke ku niligu gaani ki lindi ki tagi mi fanpienma po ki tagini mi ñincianmoanma po. Isalele yaaba den ñani Ejipiti diema nni ki bogini bu toabu po. 19Musa den taa Josefi kpaba kelima Josefi den teni ke Isalele bijaba poli. O den yedi ba: «U Tienu yaa ti goandi yi yaa yogunu yin ñani n kpaba nekanba.»#Cil 50.25; Jos 24.32
20Bi den fii Sukoti ki jiidi Etami naani n ye mi fanpienma juodima po. 21Li Miali Diedo den ye bi liiga. O den ye ku tawaligu nni u yensiinu ki gobidi ba bi sanu nni. Ku ñiagu o den ye mi fantama yaa tawaligu nni ki yendi bipo ban yaa cuoni u yensiinu leni ku ñiagu kuli. 22Yensiinu kuli ku tawaligu yen yiini bipo, ñiagu mo kuli mi fantama tawaligu yen yendi bipo.
Falono ŋua ki deli Isalele yaaba
Currently Selected:
MI ÑAMA 13: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
