MI ÑAMA 14
14
1Li Miali Diedo den maadi leni Musa ki yedi o: 2«Maadi leni Isalele yaaba ke ban magidi nintuali, Migidoli leni mi ñincianma siiga, naankani n teli Baali-Tisefoni. Li tie laa kaanu yaa nintuali ke yi baa jiidi ki yaa kuu leni mi ñincianma. 3*Falono baa maadi Isalele yaaba maama ki yedi: ‹Bi yaadi mi diema nni ke mi fanpienma bolini ba.› 4N baa teni Falono pali n juagi wan fii ki deli ke o baa cuo ba, ama Falono leni o toatieba baa teni n yeli n baa ti kpiagidi. Ejipiti yaaba baa bandi ke n tie Li Miali Diedo.» Isalele bila den tieni yeni.
5Bi den waani Ejipiti bado ke Isalele yaaba sani. Lanyogunu Falono leni o naacenba den lebidi bi yama bipo ki yedi: «Ti tieni be mo n yeni ki cedi ke Isalele yaaba gedi ki kan go yaa tuuni ti tuona?» 6Falono den teni ke bi cuani o teligu ki taa o niba ke bi yegi. 7O den taa Ejipiti yaa teliti kobiluoba yaadi n ŋani ki cie yaa teliti n sieni kuli. Bi toatieba den doni tikuli niinni niba tataa bonyengu kuli nni. 8Li Miali Diedo den teni ke Ejipiti bado Falono pali juagi ke o den deli ki bua cuo Isalele yaaba. Isalele bila den ñani mi diema nni ki cuoni ki gaani. 9Ejipiti yaaba den deli ki bua cuo ba, Falono teliti leni o taami leni o tandanba leni o toatieba kuli den nandi ba yaa yogunu ke bi jiidi mi ñincianma kani, naankani n tiegi Pi-Hahiloti ki ye Baali-Tisefoni nintuali.
10Falono den nagini. Isalele yaaba n den yaadi ki diidi ki laa ke Ejipiti yaaba ŋua bi puoli, ti jawaanciandi den cuo Isalele yaaba ke bi buudi ki yi Li Miali Diedo. 11Bi den yedi Musa: «Naani a sua ke kula ki den ye Ejipiti diema nne ke a cuani ti ke tin kpe mi fanpienma nni? A soani ti be yaa tuonli mo n yeni ki teni ke ti ñani Ejipiti nni? 12Tii den tuodi ki maadi a Ejipiti nni ki yedi a: ‹Cedi tin yaa tie Ejipiti yaaba yonbi, ke li cie tin baa kpe mi fanpienma nni?› » 13Musa den goa ki yedi bi niba yeni: «Yin da jie mani liba kuli. Sedi mani yi baa le Li Miali Diedo n baa faabi yi maama dinla. Kelima Ejipiti niba yaaba ke yi nua ba dinla yeni, yi kan go faa le ba hali abada. 14Li Miali Diedo n baa koani ki ga yi, yinba wani n sedi mani suoo.»
U Tienu luodi u sanu mi ñincianmoanma siiga
15Li Miali Diedo den yedi Musa: «Be yaa po ke a kpaani ki miadi n todima? Maadi leni Isalele yaaba ki teni ban fii ki yaa cuoni. 16Fini, yugidi a gbiamu, tandi a nuu mi ñincianma po ki teni man boagidi. Isalele yaaba baa kua mi ñincianma siiga ke bi taana kuoni. 17N mo baa teni Ejipiti yaaba pala n juagi, ban ŋoadi ba mi ñima nni. Falono leni o toatieba, leni o teliti, leni o tandanba baa teni n kpiagidi n gedi foagima. 18Ejipiti yaaba baa bandi ke n tie Li Miali Diedo, Falono leni o teliti leni o tandanba n baa teni n kpiagidi n doagidi yaa yogunu.»
19U Tienu yaa maleki yua n yen ye Isalele yaaba goli liiga den lebidi ki guani bi puoli po. Ku tawaligu yaagu n den ye bi liiga moko den lebidi ki guani bi puoli po. 20Ku den se Ejipiti yaaba yaa goli leni Isalele yaaba goli siiga. Li den biigi bi ne po ki yieni bi ne po. Laa ñiagu kuli a golieda yeni naa den nagini a yaa.
21Musa den tandi o nuu mi ñincianma po. Li Miali Diedo n den teni ku tafaaciangu ñani puoli po ki tudi mi ñincianma ku den figi boncianla laa ñiagu kuli. Ku den teni ke mi ñincianma paadi ke siiga nni kuodi. 22Isalele yaaba den poandi mi ñincianma siiga nni ke bi taana kuoni. Mi ñincianma den tua nani a guona bi jienu leni bi ganu kuli po.#1Kol 10.1-2; Ebl 11.29 23Ejipiti yaaba den deli ki bua ki cuo ba. Falono taami leni o teliti, leni o tandanba kuli den kua Isalele yaaba puoli po mi ñincianma siiga. 24U yienu n den pudi yaa yogunu, Li Miali Diedo den ye ku tawaligu nni leni mi fantama yaa tawaligu nni ki nua Ejipiti yaaba goli. O den teni ke Ejipiti yaaba goli lengidi boncianla. 25O den teni ke bi teliti taana ñani ke bi cenli paagi hali boncianla. Lani yaa po Ejipiti yaaba den yedi: «Tin sani ki foagidi leni Isalele yaaba kelima Li Miali Diedo koani bipo ki yie Ejipiti yaaba po.»
26Li Miali Diedo den yedi Musa: «Tandi a nuu mi ñincianma po, mi ñima baa guani Ejipiti yaaba po, bi teliti leni bi tandanba po kuli.» 27Musa den tandi o nuu mi ñincianma po. Lan den bua ki faa mi ñincianma go den guani leni u paaciamu ke Ejipiti yaaba den sani kelima mi den bua ki nandi ba. Ama Li Miali Diedo den teni ke Ejipiti yaaba baa mi ñincianma siiga. 28Mi ñima den guani ki milini ti teliti leni bi tandanba leni Falono yaa toatieba kuli yaaba n den kua mi ñima nni ki ŋoadi Isalele yaaba. Baa niyendo naa den ñani lienni. 29Isalele yaaba den cuoni ke bi taana kuoni mi ñincianma siiga nni ke mi ñima den fii ki se nani a guona yeni bi jienu leni bi ganu po.
30Laa daali Li Miali Diedo den faabi Isalele yaaba Ejipiti yaaba nuu nni. Isalele yaaba den laa Ejipiti yaaba yaaba n den kpe ke bi bili mi ñincianma boanjaali po. 31Isalele yaaba den laa Li Miali Diedo n den pua Ejipiti yaaba leni o nuu yu n pia u paaciamu maama. Bi niba den jie Li Miali Diedo ki daani Li Miali Diedo leni o naacemo Musa.
Musa leni Isalele yaaba yanbu
Currently Selected:
MI ÑAMA 14: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
