Lewiy 15
15
Gaya Mmhemuc Meyah
1Rmengo Moseh ma Aharon ka Utux Tmninun: 2“Rngagi ka seediq Israel. Mnarux mmhemuc meyah ka seediq we, niqan rutiq kiya di. 3Mnarux mnhemuc meyah ka heya, ani wada mlmelux we, niqan rutiq nana. 4Qlapo tnqiyan na we gaga niqan rutiq. Tnluungan na we niqan rutiq uri. 5Kana tmnelung qlapo na we, asi ka niqan rutiq betaq keeman. Kiya uri ma mangal qsiya mahu lukus na. 6Tmnelung tnluungan seediq mnarux mmhemuc meyah kiya we, asi ka niqan rutiq betaq keeman. Kiya ma mangal qsiya mahu lukus na. 7Tmnelung heyi mnarux mmhemuc meyah nii we, asi ka niqan rutiq betaq keeman. Kiya ma mangal qsiya mahu lukus na ma trima heyi na. 8Nasi mturuq heyi ini knarux ka mnarux mmhemuc meyah de, seediq tnruqan we, asi ka niqan rutiq betaq keeman. Kiya ma dmoi qsiya mahu lukus na ma mptrima heyi na. 9Qraqil tcpilan tluungan seediq mnarux mmhemuc meyah nii we, gaga niqan rutiq uri. 10Kana tmnelung qyqeya na we, asi ka niqan rutiq betaq keeman. Mnangal qyqeya na we, asi ka niqan rutiq betaq keeman. Kiya ma dmoi qsiya mahu lukus na ma mptrima heyi na. 11Ini trima baga ka mnarux mmhemuc meyah nii we, ima ka tleung tnluungan na de, ida niqan rutiq betaq keeman ka seediq kiya. Kiya ma dmoi qsiya mahu lukus na ma mptrima heyi na. 12Qyqeya tnluungan mnarux mmhemuc meyah nii we, asi ka gremun. Tnluungan na qyqeya snmalu qhuni we asi ka snagun qsiya kana.
13Wada malu ka mnarux mmhemuc meyah nii de, asi ka smepu mk7 ali psbgurah heya nanak. Kiya ma asi ka mahu lukus na ma dmoi qsiya trima heyi na. Kiya de bgurah ka heya da. 14Tg8 ali de, asi ka madis 2 derang ma 2 byugu ka heya. Meyah rhengun kobu mrtaso, berah Utux Tmninun ma bege na msapuh ka qbheni. 15Msapuh we mbege 1 snapuh psruwa qnquwan noda ma, 1 snapuh psqmaan. Ado seediq kiya we mnarux mmhemuc meyah, kiya de asi ka mpririh psruwa qnquwan na meniq berah Utux Tmninun.
16Nasi kmmhemuc meyah ka utaq qyqeya rseno we, asi ka niqan rutiq betaq keeman. Kiya ma maangal qsiya trima heyi na. 17Ani qraqil ka lukus, wada ruun utaq de, asi ka niqan rutiq betaq keeman. Kiya ma maangal qsiya trima. 18Mnsuupu ka rseno ma mqedil we, asi ka niqan rutiq betaq keeman. Kiya ma mdoi qsiya trima heyi daha.
19Meyah yyahan ka mqedil we, asi ka niqan rutiq mk7 ali. Kana tmnelung heya we, asi ka niqan rutiq betaq keeman. 20Gaga meniq ckceka rutiq hiya ka mqedil we, kana tnqiyan na we gaga niqan rutiq kana. Tnlungan na uri we gaga niqan rutiq kana. 21Kana tmnelung qlapo na we, asi ka niqan rutiq betaq keeman. Kiya ma asi ka mahu lukus na ma mdoi qsiya trima heyi na. 22Kana tmnelung qyqeya tnlungan na we, asi ka niqan rutiq betaq keeman. Kiya ma asi ka mahu lukus na ma dmoi qsiya trima heyi na. 23Meniq qlapo na ma, uxe uri we tmnelung tnlungan na ma qyqeya na we, asi ka niqan rutiq betaq keeman. 24Nasi msuupu taqi mqedil kiya ka rseno, wada ruwan rutiq na we, asi ka niqan rutiq mk7 ali. Tnqiyan na qlapo we gaga niqan rutiq uri.
25Mqedil ge, nasi mrana ali yahan na mmhemuc meyah dara, uxe uri we bsiyaq ka yahan na betaq mnarux mmhemuc meyah de, asi ka niqan rutiq ka heya. Mntena so niqan rutiq yyahan mqedil. 26Mnarux mmhemuc meyah ciida, tnqiyan na qlapo ma, tnlungan na we gaga niqan rutiq kana. Mntena so yyahan mqedil. 27Kana tmnelung qyqeya nii we, ida niqan rutiq ma asi ka niqan rutiq betaq keeman. Kiya ma asi ka mahu lukus na ma mdoi qsiya trima heyi na. 28Nasi wada malu ka mnarux na mmhemuc meyah de, asi ka smepu mk7 ali, kiya de bgurah ka heya da. 29Tg8 ali de, asi ka mangal 2 derang uxe uri we 2 byugu mosa rhengun kobu mrtaso bege na msapuh. 30Msapuh we mbege 1 snapuh psruwa qnquwan noda, 1 snapuh psqmaan. Ado mnarux mmhemuc meyah ka seediq kiya. Msapuh de mpririh psruwa qnquwan na meniq berah Utux Tmninun.
31Yamu we asi namu ka psnakun peeyah rutiq ka dseediq Israel. Kiya de so uxe mpsrutiq kobu mrtaso mu. Kiya de uxe mphuqil qnrutiq daha nanak.”
32Nii mnarux mmhemuc meyah ma kmmhemuc meyah utaq rseno we, ida niqan rutiq kiya. 33Gaya yyahan mqedil ma mnarux mmhemuc meyah we, ani rseno ma mqedil, kiya ma msuupu taqi niqan rutiq mqedil ka seediq nii.
Currently Selected:
Lewiy 15: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020