Lewiy 23
23
Quri Smseman
1Rmengo Moseh ka Utux Tmninun: 2“Rngagi ka seediq Israel. Smseman Utux Tmninun we, asi namu ka ptuura rmengo smseman mrtaso psliyan.
Ali Sngayan
3Mk6 ali we qpahi. Tg7 ali de, ali mrtaso sngayan kiya. Asi ka niqan psliyan mrtaso. Iya bale qeepah ani maanu ka yamu. Nii we asi namu ka pyugun ali sngayan Utux Tmninun meniq nniqan namu ka nii. 4Smseman Utux Tmninun we, dehuk ka ali de, asi namu ka ptuura rmengo psliyan mrtaso we so nii.
Smseman Hrnasan ma Ini Psai Tgeda
(Lnt 12:1-20. Spe 28:16-25. Meg 16:1-8)
5Ali 14 tgkingal idas knkingal knkawas, peeyah gbiyan ciida we, kiya ka ali smseman hrnasan nuUtux Tmninun. 6Ali 15 tgkingal idas nii we, smseman ini psai tgeda nuUtux Tmninun kiya. Yamu we asi namu ka mk7 ali mekan pang ini psai tgeda. 7Tgkingal ali we asi ka psseli mrtaso. Kana qqpahun namu we iya bale qeepah kana. 8Asi namu ka mk7 ali mege snapuh psqama Utux Tmninun. Tg7 ali de oda msseli thmuku ma, iya qeepah ani maanu qqpahun.”
Mege Pnlaale Ba Mghei
9Rmengo Moseh ka Utux Tmninun: 10“Rngagi ka seediq Israel: Dehuk namu dxeral bbege mu yamu hiya, qmburung namu pnhmaan de, asi ka mekuy namu 1 bnkean pnlaale ba mghei na bege msapuh. 11Msapuh we slgelu na berah Utux Tmninun ka 1 bnekuy nii ka msapuh. So qqrasun mangal ka yamu. Msapuh we bobo ali sngayan ciida we, asi ka slgelu na smapuh ka bnekuy nii. 12Lmgelu bnekuy nii ciida we, asi su ka mege 1 knkawas mttuku hnyegan wawa baus miric, bege namu snapuh psqmaan Utux Tmninun. 13Pspui snapuh pnhgalang, kiya ka 2 tnugmxalan igipa nemu mugi gmaxun abura ka ngalun snapuh skenux bbege Utux Tmninun. Pthiqi sino, kiya ka 1 tnugsepac sin sino. 14Ani pang, nuduh rehak ma, mugi bgurah ba we, iya bale uqi. Asi ka betaq madis snapuh daha meyah mege Utux Tmninun ciida ge, kiya ka ani namu uqun. Ngali gaya betaq ani knuwan knxalan meniq nniqan namu ka nii.
Smseman Kmetuy
(Lnt 34:22. Spe 28:26-31. Meg 16:9-12)
15Pyahani bobo ali sngayan smepu, kiya ka ali bnege namu snapuh mlgelu ciida, asi ka mttuku ba mk7 ali sngayan. 16Dehuk mk7 ali sngayan, bobo na kiya ka 50 ali. Asi ka mege namu bgurah ba snapuh pnhgalang Utux Tmninun ka yamu. 17Angal 2 tnugmxalan igipa nemu mugi peeyah tnsapah namu. Pgmaxi tamul ma duhi 2 pang ngalun snapuh slgelu. Kiya ka snapuh pnlaale ba mghei bbege Utux Tmninun kiya. 18Kiya ma asi namu ka madis 1 knkawas mttuku hnyegan wawa miric ma 1 wawa dapa balas, 2 miric rudu, pspui pang mege kana. Kana nii pspui mege snapuh pnhgalang ma snapuh sino, ngngalun snapuh psqama bbege Utux Tmninun ka nii. Kiya ka snapuh puniq sknexan bbege Utux Tmninun ka nii. 19Asi ka mege namu 1 baus miric smapuh psruwa qnquwan noda namu. 2 ka 1 knkawas wawa baus miric ngalun snapuh ptbale. 20Msapuh ge, pspuun na pang snmalu mugi plaale mghei ma 2 wawa miric rudu ngalun daha snapuh mlgelu. Ssapuh daha mlgelu berah Utux Tmninun. Nii we bbege Utux Tmninun uqun mrtaso ma bbege msapuh ka nii. 21Ali nii ciida we, ptuura namu rmengo psliyan mrtaso ka yamu. Kana ani maanu qpahun we iya bale qeepah. Gaya betaq ani knuwan knxalan nniqan namu ka nii.
22Qmburung namu pnhmaan dxeral namu ciida, iya bale qbrungi ka ssiyo na ma, iya bale lmui ka mntuting na. Asi ka sbege seediq qrinuc ma seediq tnooda ka kiya. Yaku we Utux Tmninun, Utux Baro namu.”
Smseman Knkawas Bgurah
(Spe 29:1-6)
23Rmengo Moseh ka Utux Tmninun: 24“Rngagi ka seediq Israel: Prading ali 1 idas 7 we, ngali ali mrtaso sngayan. Yupi iyuk urung so namu lnglungun. Asi ka niqan pnsliyan mrtaso. 25Ani maanu qpahun we iya bale qeepah. Asi namu ka mege snapuh puniq Utux Tmninun.”
Ali Psruwa Qnquwan Noda
(Spe 29:7-11)
26Rmengo Moseh ka Utux Tmninun. 27“Ali 10 idas 7 we kiya ka ali psruwa qnquwan noda. Asi ka ngalun namu pnsliyan mrtaso. Kiya ka pqraqil ka lhebun namu ma, asi ka mege snapuh puniq Utux Tmninun uri ka yamu. 28Ali nii ciida, ani maanu qpahun we iya bale qeepah. Ado ali psruwa qnquwan noda ka nii. Asi namu ka meniq berah Utux Tmninun, Utux Baro namu psruwa qnquwan noda namu. 29Ali nii ciida, ani ima ini pqraqil lhebun daha we, asi ka pkungalun peeyah ckceka seediq kiya. 30Kana qmeepah ali nii ciida we, asi ka phqilun peeyah ckceka seediq kiya. 31Ani maanu qqpahun we iya bale qeepah ka yamu. Ngali gaya ani betaq knuwan knxalan meniq nniqan namu ka nii. 32Pyugi bale ali sngayan mrtaso ka nii. Kiya ma pqraqil lhebun namu uri. Peeyah gbiyan ali 9 idas nii betaq gbiyan so kusun we, ngali bale ali sngayan ka nii.”
Quri Smseman Pkobu
(Spe 29:12-39. Meg 16:13-15)
33Rmengo Moseh ka Utux Tmninun: 34“Rngagi ka seediq Israel, ali 15 idas 7 we smseman pkobu ka kiya. Asi namu ka mk7 ali smseman berah Utux Tmninun. 35Tgkingal ali we, asi ka niqan pnsliyan mrtaso. Kana qpahun we iya bale qeepah. 36Mk7 ali cenga na nii we, mbege namu snapuh puniq Utux Tmninun. Tg8 ali de ngali psliyan mrtaso. Asi ka sbege namu Utux Tmninun ka snapuh puniq. Ali nii we ali thmkuwan kiya. Kana qpahun we iya bale qeepah.
37Smseman Utux Tmninun ka nii. Kiya ka ptraun namu smseman psliyan mrtaso ka nii. Asi ka sbege namu Utux Tmninun ka snapuh puniq, snapuh psqmaan, snapuh pnhgalang ma, snapuh sino. Niqan nanak ali na kana. 38Ini spegi ka ali sngayan meniq Utux Tmninun, bnege namu pnsdehu namu ma, qnaras bnege namu Utux Tmninun ka nii.
39Mnhedu namu smeku qnbrungan namu de, peeyah 15 ali 7 idas, asi ka mk7 ali moda namu smseman Utux Tmninun. Tgkingal ali we ali sngayan mrtaso. Tg8 ali we ali sngayan mrtaso uri. 40Tgkingal ali we mangal namu malu ba heyi qhuni, waso sbiki paru, qhuni mubung ba cida na ma, cida qhuni lebi ssiyo yayung. Meniq namu berah Utux Tmninun, Utux Baro namu mpqaras namu mk7 ali. 41Knkingal knkawas ckceka tg7 idas we asi namu ka smmesung mk7 ali Utux Tmninun smseman nii. Ngali gaya ani betaq knuwan knxalan dyamu ka nii. 42Meniq namu truma kobu mk7 ali. Kana dseediq Israel we asi ka meniq truma kobu kana. 43So maha kklaun ani betaq knuwan ka yaku we, dmnudul ku seediq Israel mlatac peeyah dxeral Micrayim ma, mneniq truma kobu ka dheya. Yaku we Utux Tmninun, Utux Baro namu.”
44So kiya de, Moseh we srengo na seediq Israel ka smseman Utux Tmninun.
Currently Selected:
Lewiy 23: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020