Lewiy 27
27
Gaya Snepu Bbege Sndehu
1Rmengo Moseh ka Utux Tmninun: 2“Rngagi ka seediq Israel: Nasi smdehu Utux Tmninun ka seediq we, asi ka spooda beyax bbege na. 3Snepu namu quri rseno peeyah 20 knkawas betaq 60 knkawas we, asi ka muyu sneengan nniqan mrtaso mege 50 skere pila. 4Quri so mqedil we, sneengan su mpbege 30 skere pila ka kiya. 5Rseno peeyah 5 knkawas betaq 20 knkawas we, mbege 20 skere ka rseno ma, mbege 10 skere ka mqedil. 6Rseno peeyah 1 knkawas betaq 5 knkawas we, mbege 5 skere pila. Mqedil we mbege 3 skere pila. 7Rseno wada hmrinas 60 knkawas de, mbege 15 skere pila. Mqedil we mbege 10 skere pila. 8Nasi qrinuc ka heya ma, ini dehuk mege bbege na we, asi ka desun berah msapuh ka heya. Msapuh de kmpooda beyax na smepu bbege na.
9Nasi tnbugan ka bbege na we, bbege na snapuh Utux Tmninun kiya. Kana bbege Utux Tmninun nii we, asi ka mrtaso kiya. 10Uka spririh ka seediq ma, uka prihan uri. Ani wada prihun naqah ka malu, uxe uri we wada prihun malu ka naqah. Nasi prihun tnbugan ka tnbugan. Asi ka mrtaso kana ka prihan ma spririh. 11Nasi niqan rutiq ka tnbugan de, asi ka ini ngali snapuh bbege Utux Tmninun kiya. Asi ka desun berah msapuh. 12Msapuh we msepu asi ka so knhenu ka bbege daha. Ani malu ma naqah ka tnbegan we, asi ka msapuh ka mseung na. So kiya de, maha so kiya. 13Nasi na rrihun maruy we, asi ka sneengan bbege na ma, prnaun 1 tnugrmaan pila.
14Psnakan na prtaso ka sapah seediq we, bbege daha Utux Tmninun ma, msepu maha knhenu ka msapuh. So kiya ka snepu na de, asi ka so kiya mooda. 15Ptgaya prtaso sapah daha ka seediq we, nasi spririh daha maruy dungal ka sapah we, asi ka prnaun mege nii tnugrmaan snepu daha bbege dungal. Sapah nii de maha nheya da.
16Nasi na psnakan prtaso ka duma dxeral na bbege na Utux Tmninun we, asi ka spegun knhenu ka bbege daha. Nasi 1 hmeyu ka mugi de, asi ka mege 50 skere pila. 17Nasi na speeyah knkawas paru qrasan ciida ptgaya prtaso ka dxeral we, asi ka muyu sneengan bbege kiya. 18Nasi hmrinas smseman knkawas paru qrasan ka pnsaanak su prtaso de, asi ka msapuh ka meyah smeung. Asi ka spegun ka knkawas ini dehuk knkawas paru qrasan, mpeeyah hiya smeung bbege daha. 19Pnugaya prtaso dxeral we, nasi pririh na maruy ka dxeral, asi ka prnaun na mege 1 tnugrmaan snepu daha ka heya. Kiya de maha nheya ka dxeral da. 20Nasi ini eyah pririh maruy ka heya, uxe uri we wada na sbaruy seediq ka dxeral de, asi ka ini na yahi pririh maruy kiya di. 21Kiya de, dehuk knkawas paru qrasan de, wada sbege peeyah mbnaruy ka dxeral we, asi ka prtaso quri Utux Tmninun. Mntena so dxeral sbege ani betaq knuwan. Maha dmsapuh ka kiya. 22Nasi dxeral bnaruy na, uxe daha ngalun ddxeral daha we, asi ka ptgaya prtaso bbege na Utux Tmninun. 23Msapuh we asi ka betaq knkawas paru qqrasan ka snepu na bbege. Ali ciida, asi ka prtaso snepu bbege na Utux Tmninun ka heya. 24Dehuk ka knkawas paru qrasan de, asi ka sbege bnaruy ka dxeral. Kiya ka tnpusu dxeral nii. 25Kana snepu su bbege pila we, asi ka spooda sneengan nniqan mrtaso. 20 kira we 1 skere.
26Wano pnlaale mtuting ka tnbugan we, ani dapa ma miric we, asi ka sbege Utux Tmninun kiya. Ani ima we asi ka ini na psnaki prtaso. Ado nii we nuUtux Tmninun kiya. 27Nasi pntuting tnbugan niqan rutiq we, asi ka prnaun 1 tnugrmaan mege snpegan pririh maruy. Nasi na ini yahi pririh maruy de, ani su spooda sneengan daha ma, ani su brigun ka kiya.
28Kiya de, kana bnege su ani betaq knuwan we, kiya ka bnege na Utux Tmninun ani betaq knuwan we, ani seediq, ani tnbugan, iya bale sai pririh maruy kiya. Kana bbege su ani betaq knuwan we, mrtaso riyung nuUtux Tmninun. 29Kana ssliqun pneyah ckceka seediq we, iya bale yahi pririh maruy. Asi ka phqilun ka kiya.
30Kana pneyah dxeral, ani heyi hneru peeyah qhuni. 1 tnugmxalan we nuUtux Tmninun kiya. Mprtaso bbege Utux Tmninun. 31Mkpririh maruy qyqeya nii ka seediq we, asi ka prnaun na mege 1 tnugrmaan pila. 32Kana rahul dapa ma miric, kana mnoda toma hukuc we, tg10 na we asi ka sbege prtaso Utux Tmninun kiya. 33Iya siling malu ma naqah. Iya pryuxi uri. Nasi so pryuxun namu de, pnriyux namu ma tnbugan we asi ka mrtaso kana. Ini prihi maruy kiya.”
34Kari pnosa Utux Tmninun tnugesa na Moseh quri seediq Israel meniq dgiyaq Sinay hiya ka nii.
Currently Selected:
Lewiy 27: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020