Spegan 16
16
Tnbrinah na Qorax, Datan ma, Abiram
1Lqlaqi laqi Lewiy, lqlaqi laqi Qahat, Qorax laqi Yichar ma, msuupu lqlaqi laqi Reuben, kiya ka Datan ma Abiram laqi Eliyab ma, On laqi Pelet. 2Dheya we madis 2'50 mpdudul seediq Israel, kiya ka gneegan niqan ngayan pneeyah ckceka seediq mtheyaq meyah berah Moseh. 3Msseli tbrinah rmengo Moseh ma Aharon: “Ma namu sgcuqi riyung! Mrtaso namu kana ka yamu ma, gaga ckceka namu ka Utux Tmninun uri. Ma namu psparu nanak yamu ma, hmrinas namu dseediq Utux Tmninun ho?” 4Mbahang ka Moseh de, asi tgtemaq dxeral. 5Rmengo Qorax ma dseediq mtheyaq heya: “Betaq mgrebu so kusun de mptiyu niima ka nheya ka Utux Tmninun ma, tgiima mprtaso kiya ka maha smdaling heya. 6Qorax ma kana dseediq gaga mtheyaq isu! Keso nii ka oda namu: Angal sara psaan puniq. 7Kusun meniq berah Utux Tmninun we psai bagah ka truma na ma psqama. Kiya de posa bobo hiya ka sknexan. Ima ka gneegan Utux Tmninun de, ima ka mprtaso. Lqlaqi laqi Lewiy! Sgcuqi namu da!”
8Rmengo Qorax dungal ka Moseh: “Lqlaqi laqi Lewiy, qbahang! 9Utux Tmninun nuIsrael we gmnao yamu peeyah ckceka seediq Israel ma smdaling heya mqeepah oda kobu mrtaso Utux Tmninun. Kiya uri ma mpheyu berah seediq mpririh dheya meepah. Neepah namu nii we biciq qpahan peni? 10Utux Tmninun we wada na srwaun ka isu ma kana mtswai su, kiya ka lqlaqi laqi Lewiy mpsdaling heya. Mpesa namu qpahan msapuh na peni? 11So kiya de, isu ma kana seediq mntheyaq isu we msseli namu tbrinah Utux Tmninun. Ima ka Aharon, tbrnahan namu migin kari ka heya?”
12Moseh we smkagul seediq mosa mlawa laqi Datan ma Abiram laqi Eliyab. Rmengo ka dheya: “Uxe miyan maha! 13Isu ka mnlatac dmnudul yami peeyah dxeral psbyeqan nunuh ma walu, betaq phuqil su menan tadus brenux hini we, biciq ooda ka nii peni? Mpqbsuran su ma mpqlahang su yami peni? 14Ini su pdehuk dmudul menan betaq dxeral psbyeqan nunuh ma walu. Ini su bege qnpahan ma qnpahan lipas ngngalun miyan pusu dnoi uri. Yaa su pkungalun kana ka doriq dseediq nii da peni? Uxe miyan maha!”
15Sqama seang na ka Moseh ma rmengo Utux Tmninun: “Iya hiya ngali ka snapuh dseediq nii. Uxe ku ba mangal ani 1 dapa roba daha ma, ini ku ba pqraqil ani ima dheya.” 16Rmengo Qorax ka Moseh: “Kusun, isu ma kana dseediq gaga su thiqan ma, Aharon we eyah berah Utux Tmninun. 17Txtaxa namu we adis ka sara spuhan skenux namu nanak ma, psai skenux eyah berah Utux Tmninun. Kana daha we 2'50. Isu ma Aharon we desi sara spuhan skenux uri.” 18Kiya de dheya ge, madis sara spuhan skenux ka txtaxa daha ma psaan daha bagah ma sknexan, msuupu Moseh ma Aharon mheyu rhengun kobu mrtaso. 19Pssliun na rhengun kobu mrtaso kana seediq ka Qorax ma, migin kari Moseh ma Aharon. Ciida, asi truura kana seediq ka ledax Utux Tmninun.
20Rmengo Moseh ma Aharon ka Utux Tmninun: 21“Laxi ka kana seediq nii, kiya ka kklaun mu phuqil nhari.” 22Tgtemaq dxeral ka Moseh ma Aharon, rmengo: “Utux Baro, Utux Baro bnege hengak kana seediq! Mnoda qnquwan noda ka 1 seediq de, kseengun su kana ka seediq di peni?”
23Rmengo Moseh ka Utux Tmninun: 24“Rngagi kana ka seediq: Sttheya peeyah kobu Qorax ma Datan ma Abiram ka yamu.” 25Mtutuy ka Moseh, mosa quri Datan ma Abiram hiya ka heya. Smnegul heya mosa ka drudan Israel uri. 26Rmengo seediq ka heya: “Yamu we sthyai ka kobu dnaqah seediq nii! Iya ba telung qyqeya daha. So kiya de yamu we ririh kana qnquwan noda daha ge, maha namu pspuun pkuuka.” 27Kiya de malix peeyah kobu Qorax, Datan ma, Abiram ka dheya. Datan ma Abiram we madis mqedil daha ma lqlaqi daha mheyu rhengun kobu daha. 28Rmengo ka Moseh: “Ado ooda nii, maha namu mkela kana noda nii we smnkagul kenan ka Utux Tmninun, uxe ba pneeyah lnglungan mu. 29Nasi pntena seediq bobo dxeral ka hnqilan seediq nii, uxe uri we sntrengan daha we mntena ba dseediq ma, uxe ku na snkgulan Utux Tmninun ka yaku. 30Kiya de, nasi Utux Tmninun ka smalu bgurah ooda, betaq mtraguh ka dxeral ma muudus ba rqenun na posa tuxan mnkuung ka kana dseediq nii de, maha namu klaun dseediq nii we smbiciq qmita Utux Tmninun ka dheya.” 31Hani mhedu rmengo kari nii ka Moseh de, asi kceka ka dxeral toma papak daha. 32Mceka ka dxeral ma wada na rqenun kana ka dheya ma tnsapah daha ma, kana dseediq ma qyqeya Qorax. 33Dheya ma kana qyqeya na, wada muudus mtuting tuxan mnkuung kana. Gmemuk ka dxeral baro daha dungal ma, asi kuuka peeyah ckceka seediq ka dheya da. 34Mbahang lingis daha meniq mtqiri daha hiya ka kana dseediq Israel de qduriq kana. Rmengo: “Rqenun tana ka ita uri da!” 35Meyah peeyah Utux Tmninun ka puniq ma, wada na qhdeun psqama ka 2'50 seediq smnapuh sknexan.
36Rmengo Moseh ka Utux Tmninun: 37“Rngagi ka Elajar laqi Aharon msapuh. Qdaani peeyah ckceka puniq hiya ka sara spuhan skenux. Puniq daha we sai qada dxeral icil. Ado pnsnakan mrtaso ka sara spuhan skenux. 38Sara spuhan skenux dseediq wada phqilun qnnaqah noda na we, pseepux tmuting ma ngali xiluy llabu spuhan. Ado dsara nii we pnsnakan mrtaso bnege berah Utux Tmninun kiya. Tduwa pskraya pndakar pgkela dseediq Israel.” 39Kiya de pssliun Elajar msapuh ka sara spuhan skenux seediq wada psqmaun phuqil puniq ma, pspexan na tmuting smalu llabu spuhan. 40Nii we pndakar quri seediq Israel, so uxe meyah smapuh berah Utux Tmninun ma, smdaling ka uxe dseediq lqlaqi laqi Aharon. Kiya de maha mntena Qorax ma dseediq tnheyaq heya ka heya. Mntena so kari Utux Tmninun rnengo na Moseh.
41So kusun de, tbrinah smnetur Moseh ma Aharon ka kana seediq Israel: “Wada namu phuqil seediq Utux Tmninun ka yamu da.” 42Meyah msseli tbrinah Moseh ma Aharon ka kana seediq ciida de, mquri kobu mrtaso ka Moseh ma Aharon. Tai! Gisu mubung kobu mrtaso ka plabu. Knledax Utux Tmninun we truura pledax. 43Kiya de meyah berah kobu mrtaso ka Moseh ma Aharon. 44Rmengo Moseh ka Utux Tmninun: 45“Sthyai ka kana seediq nii. Kiya we klaun so asi mu phuqil kana ka dheya.” Tgtemaq dxeral ka 2 heyi. 46Rmengo Aharon ka Moseh: “Angal sara spuhan skenux su, posa toma hiya ka bagah puniq spuhan, psai bobo bagah ka skenux ma, desi nhari dseediq hiya ma, psruwa qnquwan noda daha. Ado seang we mpeeyah berah Utux Tmninun meyah. Kiya de mprading ka knarux punu da” 47Muyu kari Moseh ka Aharon, madis sara spuhan skenux na ma, tmalang mosa ckceka rahul seediq hiya. Tai! Knarux mpunu we gisu prading ckceka dseediq da. Heya de posa sknexan ma pririh smruwa qnquwan noda dseediq ka heya. 48Mheyu ckceka seediq gaga muudus ma seediq mhuqil ka Aharon, kiya de asi alix ka knarux punu da. 49Ini spegi ka wada phqilan noda Qorax. Wada phqilun knarux punu nii we 1 mang 47'00 heyi. 50Mbrinah meyah rhengun kobu mrtaso ka Aharon ma, mosa Moseh hiya. Wada malix ka knarux punu da.
Currently Selected:
Spegan 16: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020