Spegan 21
21
Mbeyax Mccebu Dseediq Kenaan
1Qbsuran paru Arad seediq Kenaan gaga meniq Negeb we, mbahang gisu moda elu Atalim ka seediq Israel de asi osa mccebu dheya ma, wada na qrapun ka duma seediq. 2Smdehu rmengo quri Utux Tmninun ka seediq Israel: “Nasi su bale ba sbege baga miyan ka seediq nii de, qhdeun miyan smeeliq ka kana alang daha.” 3Mbahang hrenang seediq Israel ka Utux Tmninun de, sbege na ka seediq Kenaan. Kiya de seediq Israel we wada daha qhdeun smeeliq ka seediq Kenaan ma lualang daha. Kiya de Xormah kesun daha ptngayan ka dxeral hiya.
Quyu Snmalu Limuk
4Kndalax dgiyaq Hor ka seediq Israel ma, rmaro dxeral Edom mqquri elu oosa rcilung Mtanah. Kmhngeras lhebun daha moda elu ka seediq. 5Smeriq smnetur rmengo quri Utux Baro ma Moseh ka seediq: “Hmuwa namu ba platac menan peeyah Micrayim ma pphuqil namu menan uka uqun ma uka qsiya tadus brenux hini ho? Hini we uka uqun, uka qsiya ma, smceecu riyung uqun ka sbelus uqun nii.” 6Utux Tmninun we smkagul quyu tqbequq mremux ckceka seediq mosa qmiyuc dheya. Kiya de wada mhuqil ka hbaro hari seediq Israel. 7Meyah Moseh hiya ka seediq: “Niqan qnquwan noda nami da. Ado wada miyan smmeriq smnetur Utux Tmninun ma sunan. Braho su bale druni ka Utux Tmninun, qdriqi peeyah menan ka quyu.” Kiya de dmurun dseediq ka Moseh. 8Rmengo Moseh ka Utux Tmninun: “Slmei 1 quyu tqbequq qyaani bobo roro. Qmita quyu nii ka kana dseediq qnyutan quyu de mpkuudus.” 9Kiya de smalu 1 quyu limuk ka Moseh ma spqeya na bobo roro. Qmita quyu limuk nii ka seediq qnyutan de muudus da.
Peeyah Dgiyaq Hor Betaq Rbeyuk Moab
10Theruy ka seediq Israel ma, pkobu Obot hiya. 11Dungal we theruy peeyah Obot ma, pkobu Iyey Haabarim sipo tadus brenux Moab mquri nklaan hido. 12Dungal we theruy peeyah hiya ma, pkobu ayu Jered. 13Peeyah hiya dungal theruy ka dheya, pkobu sipo yayung Arnon. Yayung Arnon nii we meniq tadus brenux, hmeru peeyah dxeral seediq Amori. Ayus dxeral Moab ka yayung Arnon, gaga meniq cenga seediq Moab ma Amori. 14Maanu so kiya de gaga spatis patis pnbuwan Utux Tmninun we so nii:
“Alang Waheb dxeral Supah,
ayu yayung Arnon,
15kiya ma mcherus dxeral ssiyo yayung dxeral Ar,
nii smdaling ayus dxeral Moab kana.”
16Theruy peeyah hiya ka seediq Israel ma, dehuk Beer. Cuuxal rmnengo Moseh ka Utux Tmninun: “Psseli ka seediq ma, biqun mu qsiya ka dheya.” Hghugan qsiya rnengo daha we kiya ka nii. 17Ciida, muuyas uyas nii ka seediq Israel:
“Hghugan qsiya! Psbqebuq mgkala baro ka qsiya!
Ppyasi uyas ka heya!
18Hghugan qsiya nii we knari hukuc beyax dseediq mdudul,
knari hukuc dseediq paru ngayan ckceka seediq kiya.”
Theruy peeyah tadus brenux mquri Matanah ka seediq Israel. 19Peeyah Matanah betaq Maxaliel ma, peeyah Maxaliel betaq Bamot. 20Peeyah Bamot betaq ayu dxeral Moab, kiya uri ma betaq bungu dgiyaq Pisgah, tduwa qtaan peeyah baro nii ka tadus brenux.
Mbeyax Mccebu Qbsuran Paru Amori ma Basan
(Meg 2:26-3:11)
21Smkagul seediq mosa Sixon qbsuran paru Amori hiya ka Israel, rmengo: 22“Braho misu bale, pooda miyan dxeral su. Uxe miyan mooda qnpahan ma ckceka qnpahan namu lipas. Uxe miyan miimah qsiya bubul hghugan uri. Wano elu paru ka daun nami ma, betaq ayus dxeral su.” 23Kiya de Sixon we ini sruwa pooda dxeral na ma, psseli supi na betaq tadus brenux kmccebu Israel. Kiya de mccebu Israel meniq dxeral Yahac hiya. 24Seediq Israel we sdoi daha hlmadac phuqil ka heya ma, betaq daha ngalun ka dxeral daha. Dxeral nii we peeyah yayung Arnon betaq yayung Yaboq ma, betaq ayus dxeral seediq Amon. Ado gaga mgdehu ba ka ayus qlhangan seediq Amon. 25Wada mangal kana alang hini ka seediq Israel. Kiya de meniq lualang seediq Amori ka seediq Israel. Kana lualang dxeral Xesbon. 26Xesbon we pusu alang paru Sixon qbsuran paru Amori. Berah na nii we mnccebu qbsuran paru Moab ka Sixon ma, wada mangal dxeral na peeyah baga na ma, betaq yayung Arnon. 27Maanu so kiya de so nii uyas daha ka msalu uyas:
“Eyah Xesbon ka yamu.
Tai so phyegun smalu ka alang Sixon.
28Ado pneeyah Xesbon ka puniq,
mnkala peeyah alang Sixon ka rana puniq,
wada psqama alang Ar ma alang Moab,
wada psqama pusu thmkuwan daha spuhan meniq yayung Arnon.
29Dseediq Moab! Smtali namu bale!
Seediq Kemos! Mpniqan su mqraqil da!
Mpqduriq ka rseno Kemos,
qrapun ka mqedil,
sbege daha Sixon qbsuran paru Amori.
30Wada miyan buun ka dheya.
Wada uka kana ka Xesbon betaq Dibon.
Wada miyan glekun betaq Nopax.
Peeyah Nopax betaq Meydba.”
31So kiya, meniq dxeral Amori ka seediq Israel. 32Smkagul seediq mosa kmuuruy alang Yajer ka Moseh. Wada mangal lualang ssiyo Yajer ka seediq Israel ma, lwaqun daha ka seediq Amori.
33Bobo na, mbrinah ka seediq Israel, mquri elu ssaun Basan ka dheya. Og qbsuran paru Basan we madis kana seediq na meyah mccebu dheya meniq Edrei hiya. 34Rmengo Moseh ka Utux Tmninun: “Iya kcugi ka heya! Ado wada mu sbege baga su ka heya ma dseediq na, kiya uri we dxeral na we bege mu baga su kana. Ptnaani so Sixon qbsuran paru Amori meniq namu Xesbon ka heya uri.” 35Kiya de wada daha phqilun ka qbsuran paru Basan ma lqlaqi na, kiya uri ma dseediq na. Uka ani 1 ka mtngari na. Kiya de ngalun daha ka dxeral na.
Currently Selected:
Spegan 21: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020