لوقا 18
18
ڒْمِثَال ن ثَاجَّاڒْث يرزُّوْن ڒْحَقّ نّس
1ئِسِّيوڒ اَكِذْسن عِيْسَى س يِجّن ن ڒْمَعْنَا بَاش اَذ سّْنن بلِّي يتْخصَّا-يَاسن اَذ تْࢲَادْجن ڒبْدَا وَار تِيحْڒن شَا. 2ينَّا-ٱسن: "ئِجّن ن تْوَاڒَا ذݣ يِجّن ن ثنْدِينْت يجّن ن ڒْقَاضِي وَار يتݣّْوذ شَا أَربِّـي، وَار يتْوقِّير شَا يوْذَان. 3ذِنِّي ذِي ثنْدِينْت نِّي يجّن ن ثَاجَّاڒْث تْرَاح غَارس ثقَّار-اَس: ؤُش-اَيِي ڒْحَقّ ينُو خ ونِّي ذَايِي يضلّْمن 4أَطَّاس زݣ وَامِي يتَاݣِي اَذَاس يُوْش مِين ذَاس تتَّار نتَّاث. وَلَكِن منْبَعْد إِ مَانَايَا ينَّا ذِي نّفْس نّس: وَاخَّا وَار تݣّْوْذغ شَا أَربِّـي، وَار تْوقِّيرغ شَا يوْذَان، 5ثَاجَّاڒْث-أَ صَافِي ثْسِيحڒ-اَيِي. أَذَاس ؤُشغ ڒْحَقّ حمَا وَار د تْعِيقِيب ثْوَاڒَا نّغْنِي اَذَايِي ثْسدّع."
6ينَّا-ٱسن سِيذِيثْنغ: "صنّْطث إِ مِين ينَّا ڒْقَاضِي-يَا يضدْجْمن. 7أَربِّـي، مَا وَار ذَاسن يتِيشّ ڒْحَقّ إِ يِوْذَان نّس إِي ث يتتَّارن دْجِيڒث ذ نْهَار؟ مَا اَخَاسن يعطَّڒ وَار ذَاسن يسْتِيجِيب شَا؟ 8أَذَاوم ينِيغ: أَذَاسن يُوْش ڒْحَقّ ذغْيَا. إِنَّمَا، مِّيس ن بْنَاذم نْهَار إِي ذِي د غَا يَاس، مَا ٱذ يَاف لإِيمَان ذِي ثْمُوْرْث؟"
ثْࢲَادْجِيث ن صَّح
9يسِّيوڒ س ڒْمَعْنَا-يَا اَك شَان يِوْذَان تُوْغَا تَارَّان يخف نْسن نِيشَان، تْحݣَّارن ينّغْنِي: 10"ئِجّن ن نْهَار رُوْحن يجّن ن ثْنَاين ن يرْيَازن غَار ثمْزِيذَا ثَمقّْرَانْت ن أَيث-إِسْرَائِيل حمَا اَذ ࢲَّادْجن، ئِجّن زِي ڒْحِزب ن يفَرِّيسِيْين، ئِجّن يجمّع ضَّرِيبَا. 11ئِبدّ وفَرِّيسِي نِّي يتْࢲَدْجَا ذِي نّفْس نّس ينَّا: يَا أَربِّـي تْشكَّرغ-شك، مِينْزِي وَار دْجِيغ شَا اَم يِوْذَان نّغْنِي يدْجَان ذ يخوَّانن نِغ ذ يِنِّي وَار يدْجِين شَا نِيشَان نِغ ذ يِنِّي يزنَّان نِغ اَم وَانِيتَا إِݣ يجمّْعن ضَّرِيبَا! 12تْࢲُوْمِّيغ يُوْمَاين ذِي سِّيمَانَا، تْعشَّارغ خ مَارَّا مِين ربْحغ ذ اَݣْڒَا.
13وَلَكِن ونِّي يجمّْعن ضَّرِيبَا يبدّ غَار ڒݣّْوَاج. وَار يزْعِيم حتَّا اَذ ييْسِي ثِيطَّاوِين نّس غَار وجنَّا، ئِشَّاث ذݣ وُوْڒ نّس ينَّا: يَا أَربِّـي، رْحم-اَيِي نش ذ لْعَاصِي!
14أَذَاوم ينِيغ: ونِّي يجمّْعن ضَّرِيبَا يذْوڒ غَار ثدَّارْث نّس مْلِيح يمصْڒَاح اَك أَربِّـي، اَفَرِّيسِي نِّي لَّا. مِينْزِي ونِّي يسمْغَارن يخف نّس، أَتَاف اَذ يِيڒِي ذ اَمزْيَان. ونِّي يسمْزَاين يخف نّس، أَتَاف اَذ يِيڒِي ذ اَمقّْرَان."
سِيذِيثْنغ عِيْسَى يتْبَرَك يحنْجِيرن يمزْيَانن
15تُوْغَا يِوْذَان تَاوِين-اَس-د ؤُڒَا ذ يسيْمَان إِ عِيْسَى حمَا اَثن يحَاذَا. وَلَكِن يمحْضَارن نّس وَامِي ࢲْرِين مَانَاينِّي تْعَارَّاضن-اَسن. 16ئِكَّر عِيْسَى يڒَاغَا-د خ يحنْجِيرن أُوْشَا ينَّا-ٱسن إِ يمحْضَارن نّس: "جّم يحنْجِيرن يمزْيَانن اَغَارِي د اَسن. وَار ذَاسن تْعَارَّاضم شَا ڒَاحقَّاش ڒْمُلْك ن أَربِّـي يتِيڒِي غَار يِنِّي إِي يدْجَان اَم يِيْنَا. 17أَقَا تسْڒَام ڒْحَقّ: لَابُد إِ بْنَاذم اَذ يَامن س ڒْمُلْك ن أَربِّـي مَامْش زَّايس يتَامن وحنْجِير اَمزْيَان. مڒَا لَّا، أَتَاف بْنَاذم نِّي عمَّارْص اَذ يَاذف ذِي ڒْمُلْك ن أَربِّـي."
أَرْيَاز يدْجَان ذ تَّاجَر
18ئِسّقْسَا-ث يجّن زِي لْحُكَّام نْ أَيث-إِسْرَائِيل ينَّا-ٱس: "آ لْمُعَلِّم اَصبْحَان، مِين غَا ݣّغ حمَا اَغَارِي ثِيڒِي ثُوْذَارْث ن ڒبْدَا؟"
19يَارَّا خَاس عِيْسَى ينَّا-ٱس: "مَايمِّي ثقَّارذ قَا نش ذ اَصبْحَان؟ وَار يدْجِي حَدّ ذ اَصبْحَان إِلَّا أَربِّـي وَاحْذس. 20ثسّْنذ ڒُوْصِيَاث: وَار زنَّا، وَار نقّ، وَار تَاشَار، وَار شهّذ بُو ࢲُّوْر، وقَّار بَابَاش ذ يمَّاش."
21ينَّا-ٱس ورْيَاز نِّي: "زݣ وَامِي إِي دْجِيغ نش ذ اَمزْيَان تْوقَّارغ قَاع مَانَايَا."
22عِيْسَى وَامِي يسْڒَا إِ وَاوَاڒ نّس ينَّا-ٱس: "قَا ثقِّيم-اَش يجّن ن ڒْحَاجث وَار ت ثݣِّيذ شَا. رُوْح زنْز مَارَّا مِين غَارك ذ اَݣْڒَا صدّق-يث خ ڒْمُسَاكِين. سّنِّي اَغَارك يِيڒِي ڒْكنْز ذݣ وجنَّا، ڒخْدّنِّي اَرَاح-د شك ذْفَار-اَيِي-د." 23وَامِي يسْڒَا إِ مَانَاينِّي يخيّق اَطَّاس ڒَاحقَّاش غَارس اَطَّاس ن وَاݣْڒَا. 24ئِخْزَر ذَايس عِيْسَى ينَّا: "مشْحَاڒ يقْسح خَاسن خ تْوَاجَر اَذ اَذْفن ڒْمُلْك ن أَربِّـي. 25أَقَا يسْهڒ اَذ يعْذُو وڒْغم زِي ثِيطّ ن ثْسيْنفْث قْبڒ مَا ٱذ يَاذف تَّاجَر ذِي ڒْمُلْك ن أَربِّـي!"
26نّان يِنِّي يتسْڒَان: "خْيَار، ؤُݣ يزمَّرن اَذ ينْجم!؟"
27ئِنْدق-د عِيْسَى ينَّا-ٱسن: "مِين وَار ذَاس زمَّرن شَا يِوْذَان، ئِزمَّر-اَس أَربِّـي."
28ينَّا-ٱس بُطْرُس: "أَقَا نشِّين نسْمح ذِي كُڒْشِي نذْفَار-يش!"
29ينَّا-ٱسن عِيْسَى: "أَقَا تسْڒَام ڒْحَقّ: مَارَّا ونِّي يسمْحن ذِي ثدَّارْث نّس نِغ ذِي ثمْغَارْث نّس نِغ ذِي اَيْثْمَاس نِغ ذِي بَابَاس نِغ ذِي يمَّاس نِغ ذِي ثَارْوَا نّس عْلَاحْسَاب ڒْمُلْك ن أَربِّـي، 30أَتَاف اَغَارس ثِيڒِي ذِي دُّنشْت-أَ كْتَار س وَاطَّاس. أُو ذِي زْمَان إِي د غَا يَاسن اَتَاف اَغَارس ثِيڒِي ثُوْذَارْث ن ڒبْدَا."
سِيذِيثْنغ عِيْسَى عَاوذ يسَّاوَاڒ خ ڒْموْث نّس
31ئِرُوْح عِيْسَى يُوْوِي ثنْعَاش نِّي ن يمحْضَارن نّس وَاحذْسن ينَّا-ٱسن: "أَقَا نتْݣَعَّاذ غَار لْقُدْس مَانِي إِي غَا يكمّڒ مَارَّا مِين ؤُرِين لْأَنْبِيَا خ مِّيس ن بْنَاذم. 32أَث سلّْمن إِ يِنِّي وَار يدْجِين شَا زِي أَيث-إِسْرَائِيل، أَخَاس ضحْشن، أَث سحْقَارن، أَخَاس سُّوْسْفن. 33أَث ؤُوْثن س وسْغُوْن، أَث نْغن. نْهَار وِيس ثڒْتِيَّام اَذ د يكَّر زِي ڒْموْث."
34ئِمحْضَارن نِّي وَار فْهِيمن وَالُو زݣ وَاوَاڒن-أَ. ڒْمَعْنَا ن وَاوَاڒن-أَ ينُوْفَّر خَاسن، وَار سِّينن شَا مِينْخف يسَّاوَاڒ.
سِيذِيثْنغ عِيْسَى يسْݣنْفَا يج وضَرْغَاڒ ذِي ثنْدِينْت ن أَرِيحَا
35وَامِي يقَارّب عِيْسَى غَار ثنْدِينْت ن أَرِيحَا، ؤُفِين ذِنِّي يجّن ن وضَرْغَاڒ يقِّيم طَّارْف ن وبْرِيذ يتتَّار. 36وَامِي يسْڒَا إِ ڒْغَاشِي عدُّوْن ينَّا-ٱسن مِين يوقْعن؟ 37نَّان-اَس قَا عِيْسَى نَاصِرِي نتَّا إِي سَّا يعدُّوْن. 38ئِبْذَا يسْنكَّر ثْغُوْيّث يقَّار-اَس: "آ عِيْسَى آ مِّيس ن أَيث-دَاود، رْحم-اَيِي!" 39يِنِّي يزْوَارن إِ عِيْسَى نْهَان-ث نَّان-اَس سْقَار. نتَّا يُوْݣِي، ئِقِّيم يسْنكَّر ثْغُوْيّث عَاذ س جّْهذ يقَّار: "آ مِّيس ن أَيث-دَاود، رْحم-اَيِي!" 40ئِبدّ عِيْسَى يُوْمَر-يثن حمَا اَذَاس ثِيذ اَوِين. وَامِي غَارس د يقَارّب يسّقْسَا-ث ينَّا-ٱس: 41"مِين ثخْسذ اَذَاش ݣّغ؟"
ينَّا-ٱس وضَرْغَاڒ نِّي: "آ سِيذِي، قَا نش خْسغ اَذ تْوَاڒِيغ."
42ئِنْدق-د عِيْسَى ينَّا-ٱس: "تْوَاڒَا، قَا لإِيمَان نّش يسْݣنْفَا-شك!" 43ڒخْدّنِّي يبْذَا يتْوَاڒَا، ئِذْفَار عِيْسَى يسمْغَار أَربِّـي. وَامِي ࢲْرِين يِوْذَان نِّي مِين يوقْعن، مَارَّا بْذَان حمّْذن أَربِّـي.
Currently Selected:
لوقا 18: ريف
Highlight
Share
Copy
Want to have your highlights saved across all your devices? Sign up or sign in
