MATIYE 19

Awəy cəərə buusi bə kərama

(Mar. 10.1-12; Liki 16.18)

1Adordə minti Yeesu təwaŋ hateŋ wəra taw kəyaŋ, wə yaakaŋ seŋka də Galileŋ, wə kooroŋ giidə seŋka də Zudeŋ warna cakaɗi cəərə vor bə Zurdeŋ na. 2Kaa gə ablaw həənu bəlam du da, kəya wə seerteŋ kaa kə ɗemeŋ wəra a ko toŋa faɗi gəm.

3Kəya sərdə kaanə *Farisiyeŋ kəman zeŋ suru da bə golde minti té law kəmpuru la də kel. Yə wəətunu minti: «Kəkəy yaŋ bə ayə-aye minti hulum buusə muruŋ la wəra gud kela anə hãy keɗe faɗi mo?» 4Wə hərnəy kel minti: «Kel gə minti a wəra gə jeerə-jeere giidə kefter kə Pepeŋa, aŋ əŋkənəy bə mo? Kel teŋ waate haa minti, hãã a mele bə gud koŋ daŋ, Pepeŋ jəŋ hulum kisirkiŋ ha'aŋ, hulum də həlgəŋ faɗi. 5Kəya Pepeŋ waataŋ a ko toŋa ada minti: ‹Gud teŋa ta, hulum koŋkor yaake buru wəra də nuru bə ɗe a ve kuli neeteŋ də muruŋ#19.5 Ve bə kuliŋ waate haa minti hulum koŋkor də həlgəŋ, yə tepe wəra də kumsi damdi karman bə larpə-larpeŋ ana.. Kəya yə ɓasi keɗe, yə kole haa hulum bə məna'iŋ#19.5 Gen. 2.24.› 6Bədoona ana ta, yə paapa kaa ɓasi pəda, yə koloŋ haa hulum məna faɗi. Bədoona ana gəm, karman bə minti Pepeŋ a təpnu wəraŋ, hulum kisirki a ɓərsu duru wəra pəda.» 7Kəya kaanə Farisiyeŋ raawaŋ bə wəətu minti: «Jəəne doloy bədoonaŋ, *Moyisi a ayaŋ ku gili a hulum koŋkor minti wə bəlaŋ buusi muruŋ ne wəraŋ, wə ayə kefter bə ge dər la kaasa minti tó buusənə wəraŋ, haa səm mo?#19.7 Gen. 24.1-4; Mat.5.31» 8Wə wəətənəy minti: «Moyisi a aynaŋ kəkəy bə buusi kəram nəətiŋ haa gud bə minti ku tarməyaŋ wəra də hẽŋə-hẽŋe cəərə kel kə Pepeŋa. Səma a mele bə gud koŋ da ha'aŋ, kel a paapa bədoona ana ba. 9Ten waataŋ: hulum bə minti buusuŋ muruŋ ne wəra anə faɗi bay a ji kel kə piwpiw, wə ɗeŋ ne a de daalaŋ, wə jəŋ haa piwpiw faɗi.»

10Kəya *kaa gə guuduŋ wəətunu minti: «Jəəne doloy minti hulum isi həlgəŋ haa bədoonaŋ, pisi duŋ haa bə minti wə a de həlgə baŋ.» 11Wə hərnəy kel gəm minti: «Kumsə kel teŋ kəyaŋ, kaŋ paapa keɗe gə nakə-neke bə doy haa di ba. Doy haa di haa kaa gə minti Pepeŋ əynəy hel də doy təwa. 12Gud maa mo, kaa kəman yaŋ ha'aŋ, a we di da anə hãã, yə paapa gə nakə-neke bə tope kəram ba. Sirdi kəman yaŋ ha'aŋ, kumsiŋ təsniy wəra, yə tope kəram ba haa sə teŋ. Kaa gaalaŋ yaŋ, teŋ koloŋ kusri wəra minti té tope kəram ba gud joŋre bə *Kumna kə Pepeŋa. Hulum bə minti bə nakə-neke bə de kel kə hate toŋ kəyaŋ wə doy la!»

Yeesu ge pisiŋ cəərə kəmar koncoŋa

(Mar. 10.13-16; Liki 18.15-17)

13Kəya kaa kəman bəŋ də kəmar koncoŋ sar Yeesu minti wə maltə kəəsu la siri bə gay pisiŋ ciiri daana wə toosə la ciiri gəm. Kəya *kaa gə gud Yeesuŋ wəətənəy minti yə a bi da diiri ba. 14Səma Yeesu wəətənəy minti: «Aŋ yaakə kəmar koncoŋ la, yə bəəda səran da, aŋ a hay kuy wəra ba. Gud maa mo, ɗe a ve a *Kumna kə Pepeŋa haa kaa gə minti ji kusri damdi té ana'iŋ.» 15Kəya wə maltaŋ kəəsu siri bə gay pisiŋ ciiri, adoro wə kooroŋ faɗi.

Puranul bə begeŋ

(Mar. 10.17-31; Liki 13.30; 18.18-30)

16Kəya puranul kəman zeŋ sar Yeesu da, wə əsəŋ bə wəətu minti: «Hulum bə hate kaŋ, karman pisi bə minti ten jəw la bə fele dədərgə də bay teweŋ, haa maa mo?» 17Wə wəətunu minti: «Tam lan kun cəərə karman pisiŋa haa səm mo? Karman pisiŋ ɗaaməna, haa Pepeŋ. Tam waataŋ ne minti tam falə dədərgə də bay teweŋ laŋ, humə kosoŋ la cəərə *ku gili nuutuŋa.» 18Kəya puranul hərnu kel minti: «Haa ku gili muntu mo?» Wə hərnu kel minti: «A awe titi ba, a ji piwpiw ba, a ji dəgaaya ba, a ŋete kel sar kumsuma ba, 19haa cəərə bəram la apəya də nərəm, balə kumsum la damdi kusrum ana faɗi gəm#19.19 Ex. 20.12-16.» 20Puranul hərnu kel minti: «Kar teŋ gila keɗe, ten jəŋ teŋ ne wəra, maa baalaŋ yaakaŋ wəra sarəna pə mo?» 21Wə wəətunu minti: «Tam bəlaŋ ne minti tam de ku kel teŋ wəra keɗeŋ, ɗee la, gusə kar nəmtiŋ la wəra, ayə soloy diŋ la wəra a kaa kə caacaŋ, kəya tam ɗe a fele bege nəmti bə gəəzə-gəəzi yaŋ apəy na. Adoro, bəəda, tapə la guudəna nuutu ta.» 22Bə minti puranul əskəŋ kel teŋ kəyaŋ, wə kooroŋ máŋ kəya bə doo-de kosõõye, gud maa mo wə də bege ablaw.

23Kəya Yeesu əsəŋ bə waate *kaa gə guuduŋa minti: «Gəəzi ten waataŋ, bə kele a *Kumna kə Pepeŋaŋ, gəəliŋ nuutu gil tiinə kaa kə begeŋa faɗi! 24Ten hare bə dogoŋ kel teŋa pa: joŋjoŋ neke nuutu bə kele a tələŋkə də paatala mo? Ãhãã! Bə minti hulum bə begeŋ kele a Kumna kə Pepeŋ naŋ, gəəli dəŋaŋ toŋ kəm pə ɗaw!» 25Bə minti kaa gə guuduŋ əskəŋ kel teŋ anəkay, yə ŋələŋ wəra hasi faɗi, yə əsəŋ bə law ku minti: «Bə jəəne bədoonaŋ, neke bə fele seereŋ haa mindi toŋ pə mo?» 26Yeesu gulnuy, wə wəətənəy minti: «Kaa kəsarkaŋ paapa gə nakə-neke bə seere kusri ba, Pepeŋ toŋ bə nakə-neke. Gud maa mo, karman anə məna minti Pepeŋ nəkaŋ bə ji toŋ baŋ, paapa.» 27Kəya Piyer wəətunu minti: «Kə are kaayaŋ teŋ gəm mo? Are yaakaŋ kar naareŋ warda neŋneŋ keɗe bə ham bəlam dəm; are bə fele haa maa gəm tə mo?» 28Yeesu wəətənəy minti: «Gəəzi ten waataŋ, *Kormə Hulúm əsəŋ ne akaceŋa cəərə jaaŋa nuutu də məyana a ko bə minti Pepeŋ haraŋ ne bə kole koŋa kimirwiŋ, aŋ kaa gə minti a təpaŋ guudənaŋ, aŋ bə əsti yaŋ a gəjaaŋaw kə kəkamnaŋa hor cəərə ɓasa bə jeme kəətiŋa cəərə tanta də kaanə *Israyel hor ciiri ɓasiŋa. 29Hulum mundu mundu mo bə minti yaakaŋ kuli nuutuŋ, kəsəənu kaŋkar, kəsəənu kəram, buru, nuru, kərmuyuŋ, kumundu ba anə taakaw nuutuŋ ne wəra gud səmanaŋ, hulum toŋ ɗe a fele gaalaŋ dəŋaŋ kəsi ɗaw, daana wə fele dədərgə də bay teweŋ gəm. 30Səma ablaw də kaa gə minti teŋ hebkəna kaa kə ajew, bə ɗe a kole yaŋ kaa kə adoro. Ablaw də kaa gə minti hebkəna kaa kə adoroŋ, bə ɗe a kole yaŋ kaa kə ajew haa teŋ gəm.»

Currently Selected:

MATIYE 19: KERNT05

Highlight

Copy