Éxodo 18
18
Jétro ou oñandu Moiséspe
1Ohendu Jétro, peteĩ Madian pegua pa’i, Moises rembireko ru, opaite mba’e Ñanderuete ojapova’ekue Moises ha Israelguakuéra rehe, ha mba’éichapa Ñanderuete oguenohẽ Israelguakuérape Egípto retãgui.
2Upévare Jétro ou ogueru jevývo itajýra Síporape, Moises rendápe, ha’e voi omondova’ekue itúva rendápe (oĩ jave gueteri faraon renondépe).
3Ha mokõive Moises ra’y ou hendive, peteĩ hérava Gerson, Moises he’ígui péicha: Mbohupa ramo aiko haguére tetã ambuépe.
4Ha ambue héra Eliézer, he’ígui: Che ru Jára chepytyvõ ha chesalva faraon kysepukúgui.
5Upéicha Jétro, Sípora, Moises rembireko ha ita’yrakuéra ou Moises rendápe pe desiértope, ha’ekuéra opyta aja Ñanderuete cérrope;
6ha he’iuka Moiséspe: Che Jétro, ne rembireko ru, aju ne rendápe ne rembireko ha imemby mokõivéva ndive.
7Ha Moises osẽ ohecha hag̃ua hembireko rúpe, ha’e oñakãity ha ohetũ ichupe; ha oporandu ojupe mba’éichapa oiko hikuái ha upéi oike hikuái hóga tymba pirekueguigua guýpe.
8Ha Moises omombe’u hembireko rúpe opaite mba’e Ñanderuete ojapova’ekue faraon ha Egiptoyguakuéra rehe Israel rayhupápe, ha opaite mba’e ohasava’ekue hikuái tapére, ha mba’éichapa Ñanderuete osalva ichupekuéra Egiptoyguakuéra poguýgui.
9Ha opaite mba’eporã Ñanderuete ojapova’ekue Israel rehe, osalvávo ichupekuéra Egiptoyguakuéra poguýgui, ha péva ombovy’a Jétrope.
10Ha Jétro he’i: Toñemomba’eguasu Ñanderuete peneguenohẽva’ekue Egiptoyguakuéra ha faraon pógui ha osalvava’ekue hetãyguakuérape Egiptoyguakuéra poguýgui.
11Ko’ág̃a aikuaa Ñanderuete ituichaveha opaite ambue jarakuéragui; ipu’akágui umi oñembotuichava’ekue rehe.
12Ha Jétro, Moises rembireko ru, oikuave’ẽ kuave’ẽmby ojehapypáva Ñanderuetépe g̃uarã; ha Aaron ha karai ancianokuéra ou avei okaru hag̃ua Jétro ndive, Ñanderuete renondépe.
Moises oiporavo umi Israel aty ruvicha oporombojovake hag̃ua
13Ojehu uperiregua árape, Moises oguapy ombojovake hag̃ua hetãyguakuérape; ha hetãyguakuéra oĩ Moises renondépe pyhareve guive ka’aru peve.
14Jétro ohechávo péva ha opaite mba’e Moises ojapóva hetãyguakuéra rehe, he’i: Mba’érehepa rejapo ko’ã mba’e ne retãyguakuéra rehe. Mba’érehepa reguapy neaño, ha mayma tetãygua oĩ ne renondépe pyhareve guive ka’aru peve.
15Ha Moises he’i hembireko rúpe: Tetãyguakuéra oúgui che rendápe omba’eporandu hag̃ua Ñanderuetépe.
16Oñemboheko vai ramo ou hikuái che rendápe, ha che ambojovake ha amyesakã ichupekuéra Ñanderuete mbo’epy ha hembiapoukapykuéra.
17Upéramo Moises rembireko ru he’i ichupe: Naiporãi pe rejapóva.
18Ndepy’amanoitéta, nde ha avei ko’ã tetãygua oĩva nendive; pe tembiapo ipohyieterei ndéve g̃uarã; nde neaño nderejapopamo’ãiko ko’ã mba’e.
19Ehendu ko’ág̃a che ñe’ẽ; che rohekombo’ese ha Ñanderuete toĩ nendive. Eiko nde Ñanderuete renondépe ha eñe’ẽ hendive ne retãyguakuéra rendaguépe Ha’e nesãmbyhy hag̃ua opaite mba’épe.
20Ehekombo’e ichupekuéra Ha’e he’iva’ekue guive ndéve, ha ehechauka ichupekuéra haperã ha hembiaporã.
21Eiporavo avei ne retãyguakuéra apytégui kuimba’ekuéra ikatupyrývape ha okyhyjéva Ñanderuetégui, kuimba’e ijapu’ỹva, ha’entese’ỹva, umía emoĩ, 1000, 100, 50 ha 10 tapicha ári huvicha ramo.
22Ha’ekuéra tombojovake tetãyguakuérape opaite ára; ha umi mba’e hasyvévante togueru ne rendápe, ha’ekuéra katu ombojovakéta opaite mba’e michĩvante. Péicha tuicha rembovevúita ne rembiapo ha ha’ekuéra nepytyvõ porãvéta.
23Rejapo ramo ko’ã mba’e Ñanderuete he’íta avei ndéve rejapova’erãva ha nde ikatu rejejoko, ha avei maymaite ko’ã tetãygua ohóta py’aguapýpe hendag̃uáme.
24Ha Moises ohendu hembireko ru ñe’ẽ ha ojapopa ha’e he’imava’ekue guive ichupe.
25Upéi Moises oiporavo kuimba’e ikatupyrývape mayma Israel apytégui, ha omoĩ ichupekuéra 1000, 100, 50 ha 10 tapicha ári huvicha ramo.
26Ha ha’ekuéra ombojovake hetãyguakuérape opaite ára; ha umi mba’e hasyvévante ogueru hikuái Moises rendápe, ha’ekuéra katu ombojovake umi mba’e hasyete’ỹvante.
27Moises omomaitei paha hembireko rúpe, ha upéi Jétro oho jevy hetãme.
Currently Selected:
Éxodo 18: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
