Génesis 33
33
Jacóbo ha Esau oiko porã jevy oñondive
1Ha Jacóbo ojesaupívo, oma’ẽ, ha péina ápe Esau ouhína 400 kuimba’e ndive; upémaramo ha’e omboja’o aty atýpe, Léa imembykuéra ndive, Raquel imemby ndive ha umi hembiguái kuña imembykuéra ndive.
2Ha’e omoĩ hembiguái kuñakuéra ha imembykuéra tenonderã, upéi Léa ha imembykuéra ha ipahápe Raquel, Jose ndive.
3Ha ha’e ohasa henondepekuéra ha oñakãity yvy rehe 7 jevy, og̃uahẽ meve ityke’ýra rendápe.
4Ha Esau katu oñani hendápe ha oñañu’ã ichupe, ha ojeity ijajúra kuápe, ha ohetũ ichupe; ha ojahe’o hikuái.
5Ojesaupi jevy rire ohecha umi kuña ha umi mitãme, ha he’i: Máva piko ko’ãva. Ha Jacóbo he’i ichupe: Ko’ã mitã Ñanderuete ome’ẽma ne rembiguáipe.
6Upéi ou hembiguái kuñakuéra, imembykuéra ndive, ha oñakãity hikuái Esau renondépe.
7Upéi ou Léa, imembykuéra reheve, ha oñakãity avei hikuái; upéi og̃uahẽ Jose ha Raquel, ha oñakãity avei hikuái.
8Ha Esau he’i: Mba’épa rejapose umi atyeta ajohuva’ekue rehe. Ha Jacóbo he’i ichupe: Tajohu py’aporã che jára resa renondépe.
9Ha Esau he’i: Che voi areko heta mba’e, che ryvy; topytapánte ndéve g̃uarã umi mba’e, ne mba’e voi ningo.
10Ha Jacóbo he’i: Nahániri, che ajerure ndéve; ajohúgui py’aporã nde resa renondépe, erahána ko che jopói, ama’ẽ ramo nde rova rehe, ha’eténte chéve ahecha Ñanderuete rova, chepy’arory rohecha jevýre.
11Ejapyhymína, ajerure ndéve, ko’ã jopói che agueruva’ekue ndéve g̃uarã, Ñanderuete cherovasa porãgui ha opaite mba’e oĩva guive ko’ápe che mba’e meme. Ha’e ojerure jevy jey ichupe, ha ipahápe Esau omoneĩ ha oguerahauka.
12Ha Esau he’i: Eguata ha jaha oñondive; che aháta nde ykére.
13Jacóbo katu he’i ichupe: Che jára oikuaa porã voi umi mitã ikyrỹi gueteriha, ha aguerekoha ovecha ha vakakuéra imembyramóva; ha amokane’õiterei ramo peteĩ árape, omanombakuaa che ovechakuéra.
14Ehasána che jára, ne rembiguái renonderãme, ha mbeguekatu che ahamíta che rymba atykuéra reheve nde rapykuéri ag̃uahẽ meve Seírpe, che jára rendápe; che katu aguatava’erã umi mitãmi ha che rymba ra’y oguatakuaa háicha.
15Upérõ Esau he’i: Ahejáta nendive ko tapicha aty chendive oúva. Jacóbo katu he’i: Ma’ẽrã piko péva. Tajohu py’aporã che jára resa renondépe.
16Upéramo Esau oho jevy hape rupi Seírpe.
17Ha Jacóbo oho Sucótpe, ha upépe ojehoga’apo, ha omopu’ã hymbakuéra korapy; ha upévare ombohéra pe yvy pehẽngue Sucot.
18Jacóbo og̃uahẽ porãite tesãi reheve Padan-arámgui pe táva Siquem renondépe, opytáva Canaan retãme.
19Ha ojogua 100 óro pehẽnguére peteĩ ñu (lóte), Hamor ra’ykuéragui, Hamor ra’y ningo Siquem.
20Ha omopu’ã upépe ikuave’ẽmby renda, ha ombohéra El-Elohe-Israel (he’ise Israel Jára Ipu’akapáva).
Currently Selected:
Génesis 33: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
