Juan 14

Hesu Crísto ningo pe tape ohóva Ñanderuete rendápe

1Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.

2Che Ruete rekohápe oĩ heta óga, upeicha’ỹ rire ha’eva’erãmo’ã peẽme, ko’ág̃a katu aháta ambosako’i hag̃ua pene rogarã.

3Ha Che aha rire ha ambosako’ipa rire avei, aju jevýta pene rendápe pogueraha hag̃ua chendive, peẽ peiko hag̃ua avei che aikohápe.

4Peẽ ningo peikuaa voi moõpa Che aháta, ha peikuaa avei pe tape.

5Upérõ Tomas he’i Hesúpe: Ore Jára, ndoroikuaái ningo moõpa rehóta, mba’éicharupi piko ikatu roikuaa porã pe tape.

6Hesu he’i ichupe: Che ningo pe tape, pe añetegua ha pe tekovete, avave ndaikatúi og̃uahẽ che Ruete rendápe cherehe’ỹ. Cherupímante uvei ikatu oñeg̃uahẽ Ñanderuete rendápe.

7Peẽ chekuaa porã ramo, peikuaa porãta avei che Ruetépe, ha ko’ág̃a guive peikuaáma ichupe, ha pehecháma avei ichupe.

8Upérõ Felípe he’i Hesúpe: Ore Jára, ehechaukána oréve nde Ruetépe, ha ovalétama oréve.

9Hesu katu ombohovái ichupe: Heta árama aiko pende apytépe, ha ne’ĩra piko nde Felípe chekuaa. Upe cherecháva ningo ohecha avei che Ruetépe. Mba’éicharupi piko nde ere ehechaukána oréve nde Ruetépe.

10Nderegueroviái piko, Che aĩha che Ruetepype, ha che Ruete oĩha chepype, ko’ã ñe’ẽ ko’ãva Che ha’éva guive, nañe’ẽi chejehegui reínte, pe che Ru chepype, oĩva uvei, Ha’e voi ningo pe ojapóva pe tembiapo Che ajapóva.

11Peguerovia Che aikoha Tuvapype, ha che Ru oikoha chepype, kóva ndapegueroviái ramo peguerovia che rembiapo porã rehe.

12Añetehápe, añetehápe, Che ha’e peẽme: Pe ojeroviáva cherehe, ojapova’erã avei umi tembiapo Che ajapóva, ha tembiapo tuichavéva ko’ãvagui ojapova’erã, Che ahátagui che Ruete rendápe.

13Ha opaite mba’e peẽ pejeruréva che rérape, upéva Che ajapóta avei. Che Ruete oñembotuicha hag̃ua chérupi.

14Peẽ pejerure ramo che rérape, Che ajapova’erã.

15Peẽ cherayhu ramo, pejapóta avei che rembipota.

16Ha Che ajeruréta che Ruetépe, Ha’e ombou hag̃ua ambue Pytyvõhára (Pytu Porãmbáva) pene rendápe, Ha’e opyta hag̃ua tapia g̃uarã penendive.

17Pe Pytu Añeteguáva, ko múndo ndaikatúi orecibi, ha’ekuéra ndohecháigui ni ndoikuaáigui ichupe. Peẽ katu peikuaa ichupe, Ha’e opytátagui penendive ha oikova’erã pendepype.

18Che ndapohejamo’ãi tyre’ỹ peẽme, aju jevýta pene rendápe.

19Ndahi’arevéima yvyariguakuéra ndacherechamo’ãvéi, peẽ katu cherecháta, Che aikovégui peẽ peikovéta avei.

20Upe ára upévape peẽ peikuaa porãta Che aĩha che Ruetepype, ha peẽ peĩha (peimeha) chepype ha Che aĩha pendepype.

21Upe oikuaáva che rembipota ha ojapóva avei, upéva ningo cherayhu añetehápe, ha upe cherayhúva, Ñanderuete ohayhuva’erã avei ichupe. Ha Che ahayhúvape ahechaukáta avei che mborayhu.

22Upérõ Júdas he’i Hesúpe, ndaha’éi pe Iscarióte: Ore Jára, mba’érehe piko rejekuaaukáta orévente ha ambue yvyariguakuérape nahániri.

23Ha Hesu ombohovái ichupe ha he’i: Upe cherayhúva katuete ojapo avei che rembipota, ha che Ruete ohayhuva’erã avei ichupe, ha rojuva’erã hendápe rombosako’i hag̃ua ore rekoha ipype.

24Upe cherayhu’ỹva katu ndojapói che rembipota. Ha pe ñe’ẽ peẽ pehendúva guive che jurúgui, ndaha’éi che ñe’ẽ pe chembouva’ekue ñe’ẽ uvei.

25Ko’ã mba’e ko’ãva ha’epáma peẽme aĩ aja gueteri penendive ko yvy ári.

26Pe Pytyvõhára, pe Pytu Porãmbáva, Ñanderuete omboútava pene rendápe che rérape, Ha’e penembo’éta opaite mba’e, ha penemomandu’áta opaite umi mba’e Che ha’emava’ekue peẽme.

27Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

28Pehendu ningo Che ha’éma hague peẽme: Aháta, aju jevy hag̃ua avei pene rendápe. Peẽ cherayhúrõ ningo pevy’aitéta ha’e haguére ahataha che Ruete rendápe, pe Túva ningo mba’eguasuve chehegui.

29Che amombe’u ko mba’e kóva peẽme ojehu mboyve, peguerovia hag̃ua ojehu ramog̃uarã umi mba’e ha’éva peẽme.

30Nañe’ẽ hetamo’ãvéima penendive, oúmagui ko yvy jára, Satana, chemoĩvai hag̃ua, ndojohumo’ãi katu mba’evete jejavy che rekovépe.

31Opaite ko’ã mba’e ojehútava guive che renonderãme, ojehu tetãyguakuéra oikuaa porã hag̃ua Che ahayhuha che Ruetépe, ha ajapopataha Ha’e he’iva’ekue guive chéve. Pepu’ã katu, ha jaha ko’águi.

Currently Selected:

Juan 14: ÑÑP2015

Highlight

Copy