Juan 21
21
Hesu ojehechauka 7 hemimbo’ekuérape
1Ko’ã mba’e rire Hesu péicha ojehechauka jevy hemimbo’ekuérape pe yguasu Tibérias rembe’ýpe:
2Oĩ hikuái oñondive Simon Pédro ha Tomas, ojehérova Kõingue, ha Natanael, peteĩ Canaygua, Galiléa departaméntogui, ha Zebedéo ra’ykuéra, ha mokõi ambue hemimbo’ekuéra.
3Simon Pédro he’i ichupekuéra: Che aháta aikutu pira. Ha’ekuéra ombohovái ichupe: Ore rohóta nendive. Oho hikuái yguasu rembe’ýpe ha ojupi peteĩ canóape, ha upe pyharépe noguenohẽi mba’evete.
4Ko’ẽmbávo Hesu og̃uahẽ yguasu rembe’ýpe, hemimbo’ekuéra katu ndoikuaái Ha’e Hesuha.
5Upérõ Hesu he’i ichupekuéra: Che ra’ykuéra, peguenohẽ piko pirakuéra. Ombohovái hikuái: Mba’evete katu noroguenohẽi.
6Upémarõ Hesu he’i ichupekuéra: Peity pende red pe canóa akatúa gotýo ha penohẽta. Oity hikuái, ha ndaikatúi oguenohẽ, hetaiterei pira oikémagui irédpe.
7Upémaramo pe temimbo’e Hesu ohayhúva he’i Pédrope: Hesu voi ningo. Upérõ Pédro pya’e omonde ijao, ha’e ijopívogui, ha ojeity yguasúpe.
8Ha umi ambue Hesu remimbo’ekuéra oñemboja pe canóa reheve yguasu rembe’ýpe, naimombyrýi voi, 90 métro rupi yguasu rembe’ýgui, ha ombotyryryhápe ogueru pe red henyhẽva pirágui, yguasu rembe’y peve.
9Oguejývo pe canóagui, ohecha tatapỹi rendy ha hi’ári oĩ pira ha pan.
10Upérõ Hesu he’i ichupekuéra: Pegueru pira peguenohẽ ramóvagui.
11Simon Pédro oike pe canóape ha ombotyryry pe red henyhẽva 153 pira tuichávagui, ha hetaiterei ramojepe ndosorói ired.
12Ha Hesu he’i ichupekuéra: Peju pearambosa, ha Hesu remimbo’ekuéra apytégui avave ndaipy’aguasúi oporandu hag̃ua Hesúpe: Máva piko Nde, oikuaa voi ha’e Hesuha.
13Hesu oñemboja ha ojapyhy pe pan ha ome’ẽ ichupekuéra, ha péicha avei pe pira.
14Kóva ningo mbohapyha jevy Hesu ojehechaukaháma hemimbo’ekuérape oikove jevy rire omanova’ekue apytégui.
Hesu oñe’ẽ Pédro ndive
15Ha oarambohasapa rire hikuái, Hesu oporandu Simon Pédrope: Nde Simon, Juan ra’y, cherayhuvépa ko’ãvagui. Simon Pédro ombohovái ichupe: Héẽ, che Jára, Nde ningo reikuaa che rohayhuha. Hesu he’i ichupe: Eñangareko che ovecha ra’ykuéra rehe.
16Upéi Hesu oporandu jevy: Simon, Juan ra’y, cherayhúpa, Pédro ombohovái ichupe: Héẽ, che Jára, Nde ningo reikuaa che rohayhuha. Upérõ Hesu he’i ichupe: Eñangareko che ovechakuéra rehe.
17Uperiremínte Hesu oporandu mbohapyha jevy Pédrope: Simon, Juan ra’y, cherayhúpa. Ha Pédro ñembyasyhápe ombohovái ichupe: Che Jára, Nde reikuaa opaite mba’e, reikuaa avei che rohayhuha. Upérõ Hesu he’i ichupe: Eñangareko che ovechakuéra rehe.
18Añetehápe, añetehápe, Che ha’e ndéve, nemitãrusuvérõ, rejeku’ajokuámi ha reho rehosehápe, ndetuja rire katu, reipysóta nde pokuéra ha ambue ndeku’ajokuava’erã ha ndeguerahava’erã nderehoseihápe.
19Ko’ã mba’e Hesu omombe’u oikuaauka hag̃ua ichupe mba’eichagua ñemano rupípa Pédro omomba’eguasúta Ñanderuetépe. Ha Hesu he’ipávo ko’ã mba’e, he’i ichupe: Eju che rapykuéri.
20Ha Pédro ojerévo ohecha pe temimbo’e Hesu ohayhúvape, ouha avei Hesu rapykuéri. Ha’e ningo avei pe temimbo’e ojejokova’ekue Hesu pyti’a rehe pe céna péva jave, ha oporanduva’ekue Hesúpe: Ore Jára, máva temimbo’épa ore apytégui netraicionátava.
21Ha Pédro ohechávo ichupe oporandu Hesúpe: Ha kóvagui piko mba’e oikóta.
22Hesu katu he’i ichupe: Che aipota ramo ha’e oikove Che aju jevy peve, mba’éiko ndéve upéva. Nde katu eju che rapykuéri.
23Upévare ningo oje’e Hesu Crísto reheguáva pa’ũme, ko temimbo’e kóva nomanomo’ãiha. Hesu katu nde’íri Pédrope: Ha’e nomanomo’ãiha, he’ínte: Che aipota ramo ha’e oikove Che aju jevy peve, mba’éiko ndéve upéva.
24Pe temimbo’e Hesu ohayhúvape ningo, ohai ko kuatia ñe’ẽ kóva, ha’e voi ningo peteĩ techahare porãva, ha ñande jaikuaa iñe’ẽnguéra hi’añete ha hekoitepeha.
25Hetaiterei mba’e Hesu ojapoveva’ekue, ha ojehai rire peteĩteĩ hi’ã chéve, ko múndope ndaijapaiva’erãmo’ã umi kuatiañe’ẽ ojehaivétava.
Currently Selected:
Juan 21: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
