ufuġ 7

musa d‑harun ġ‑dar firɛawn

1isawl sidi rbbi s‑musa yini‑as: «ẓr ġilad, han giġ‑k d‑zund rbbi i‑firɛawn, gġ gʷmak harun d‑zund nnabi‑nk. 2ra‑ttinit kullu ma‑s‑a‑ki‑tamrġ, yini gʷmak harun i‑firɛawn a‑yadj ayt‑israyil ad‑ffuġn tamazirt‑ns. 3walaynni rad‑ssiqarġ ul n‑firɛawn. timitar d‑lɛjayb ggutnin a‑rad‑skarġ ġ‑miṣr, 4imma nttan ur‑ra‑srun‑isfld. ra‑n‑gġ ilmma afus‑inu f‑miṣr, ar‑fllas‑kkatġ lḥkamat šqanin, ssufġġ‑d ikabarn n‑mddn‑inu n‑ayt‑israyil zġ‑miṣr. 5rad‑issann ayt‑miṣr izd nkki a‑igan rbbi da‑illan lliġ‑n‑mdiġ afus‑inu f‑miṣr, ssufġġ‑d ayt‑israyil zġ‑gratsn.»

6iskr musa d‑harun maylli‑f‑tn‑yuṣṣa, skrn kullu s‑wawal n‑sidi rbbi. 7lliġ sawln s‑firɛawn, ilin dar musa tam id‑mraw (80) n‑usggʷas, ilin dar harun tam id‑mraw d‑kraḍ (83) n‑usggʷas.

8izayd sidi rbbi yini i‑musa d‑harun: 9«iġ‑awn‑inna firɛawn ‹mlayt‑iyi‑d kra n‑lɛjb›, tinit ġakudan i‑harun ‹asi aɛmud‑nk tluḥt‑t‑in ġ‑lgddam n‑firɛawn›, ra‑iwrri ig algʷmaḍ.» 10ikšm musa d‑harun s‑dar firɛawn, skrn ġmklli‑f‑tn‑yuṣṣa sidi rbbi. iluḥ‑n harun aɛmud‑ns ġ‑lgddam n‑firɛawn d‑imɛawann‑ns, hati iwrri iga algʷmaḍ. 11iġr‑d firɛawn ġakudan i‑ayt‑tḥkimt‑ns d‑išuwwafn‑ns, skrn isḥḥarn n‑miṣr ula ntni ġmkan s‑ssiḥr‑nsn. 12kraygatt yan iluḥ‑n aɛmud‑ns, s‑han iɛmad‑lli wrrin gn ilgʷmaḍn. imma aɛmud n‑harun, hati iṣrṭ iɛmad‑nsn. 13walaynni sul iqqur‑uwl n‑firɛawn ġmklli‑s‑inna sidi rbbi, ur‑srsn‑isfld.

tagat n‑idammn

14yini ilmma sidi rbbi i‑musa: «han iqqur‑uwl n‑firɛawn, yagʷi a‑irẓm i‑mddn‑inu. 15ddu s‑dar firɛawn zikk ṣbaḥ ġ‑tizi lli‑ġ‑a‑itffuġ s‑dar‑waman, tbiddt a‑k‑in‑yaf ġ‑tama n‑wasif, tasit ġ‑ufus‑nk aɛmud lli‑iwrrin ig algʷmaḍ, 16tinit‑as: ‹yuzn‑iyi‑d srk rbbi da‑bdda‑illan, ig rbbi n‑ayt‑ɛibr, inna‑yak: adj mddn‑inu ad‑ddun a‑yyi‑tqasan ġ‑lh̬la. imma kiyi sul s‑ġilad ur‑ta‑trit a‑tsfldt. 17ha ma‑yk‑d‑inna rbbi da‑bdda‑illan: ġmkad a‑s‑ra‑tissant is‑giġ rbbi da‑illan. aman‑ad n‑wasif n‑nnil, ra‑gisn‑utġ s‑uɛmud‑ad illan ġ‑ufus‑inu, wrrin gn idammn. 18rad‑mmtn kullu islman lli‑gisn‑illan, iwrri iȷ̈̇ȷ̈̇u‑wasif. ra‑t‑tkrhun ayt‑miṣr, ur‑sul‑rad‑iḥmaln ad‑sun aman‑ns.› »

19yini ilmma sidi rbbi i‑musa: «zayd tinit i‑harun: ‹asi aɛmud‑nk tmdit‑n afus‑nk s‑kullu maniġ llan‑waman ġ‑miṣr, ig‑iyt tirgiw nġd isura nġd timdwin nġd ifraḍn, ad‑kullu‑wrrin gn idammn.› rad‑ilin idammn ġ‑kraygatt mani ġ‑tmazirt n‑miṣr, ula ġ‑irukutn n‑ukššuḍ d‑win‑uẓru.»

20iskr musa d‑harun ġmklli‑s‑asn inna sidi rbbi. yall aɛmud, yut ġ‑waman n‑wasif ġ‑lgddam n‑firɛawn d‑imɛawann‑ns. wrrin‑kullu‑waman n‑wasif gn idammn. 21mmtn kullu islman lli‑gisn‑illan, iwrri‑wasif iȷ̈̇ȷ̈̇u. ur‑sul‑ẓḍarn ayt‑miṣr ad‑sun aman‑ns. ilin idammn ġ‑kraygatt mani ġ‑tmazirt n‑miṣr. 22imma isḥḥarn n‑miṣr ula ntni skrn ġmkan s‑ssiḥr‑nsn. sul iqqur‑uwl n‑firɛawn, ur‑srsn‑isfld ġmklli‑s‑inna sidi rbbi. 23igrawl firɛawn ġakudan iddu s‑tgmmi‑ns, imma ġaylli ijran, ur‑tt‑akkʷ‑gis‑yiwi. 24ayt‑miṣr ar‑kullu‑qqazn ġ‑tama n‑wasif n‑nnil ad‑afn aman mad‑ssan, ašku ur‑ẓḍarn ad‑sun aman n‑wasif. 25zrin ssa n‑uwssan tigira n‑ma‑yut sidi rbbi asif n‑nnil.

Currently Selected:

ufuġ 7: SHILOT20

Highlight

Copy