ufuġ 8

tagat n‑igʷra

1yini‑d sidi rbbi ġakudan i‑musa: «kšm s‑dar firɛawn tinit‑as: ‹inna‑yak rbbi da‑bdda‑illan, adj mddn‑inu ad‑ddun a‑yyi‑tqasan. 2iġ‑tagʷit ad‑asn‑trẓmt, han rad‑utġ kullu tamazirt‑nk s‑igʷra. 3ra‑iɛmmr‑wasif n‑nnil s‑igʷra, awnn s‑tgmmi‑nk ula s‑uḥanu lli‑ġ‑a‑tggant ula s‑tisi‑nk, kšmn s‑dar imɛawann‑nk ula mddn‑nk kullutn, kšmn s‑tfurna ula tiqṣray. 4ra‑d‑fllak‑takʷin igʷra kiyi ula mddn‑nk ula imɛawann‑nk kullutn.› » 5izayd sidi rbbi yuṣṣa musa: «ini i‑harun: ‹mdi‑n aɛmud lli‑illan ġ‑ufus‑nk s‑trgiw d‑isura d‑tmdwin, tssawnt‑d igʷra f‑wakal n‑miṣr.› » 6imdi‑n harun aɛmud‑ns s‑waman n‑miṣr, awnn‑d igʷra ɛmmrn kullu tamazirt n‑miṣr. 7walaynni ula isḥḥarn skrn ġmkan s‑ssiḥr‑nsn, ssawnn‑d ula ntni igʷra f‑wakal n‑miṣr.

8iġr‑d firɛawn ilmma i‑musa d‑harun yini‑asn: «ḍalbat i‑rbbi da‑illan a‑n‑yasi igʷra flla nkki d‑mddn‑inu. rad‑adjġ mddn‑nun ad‑ddun ġrṣn ġ‑umnid n‑rbbi da‑illan.» 9irar musa i‑firɛawn: «alġ ih̬f‑nk tinit‑iyi man tasaɛt trit ad‑ḍalbġ f‑ssibt‑nk d‑imɛawann‑nk d‑mddn‑nk baš a‑n‑fllak‑ittin igʷra, kiyi d‑tgʷmma‑nk, a‑ur‑d‑sul‑ssurfn ttmi n‑wasif.» 10yini‑as firɛawn: «azkka.» irar‑as musa: «ġmkad‑s‑tnnit a‑ra‑yili, f‑a‑tissant is‑ur‑illi kra n‑rbbi zund walli bdda illan ig rbbi‑nġ. 11ra‑n‑fllak‑tyattayn igʷra kiyi d‑tgʷmma‑nk d‑imɛawann‑nk d‑mddn‑nk. ur‑sul‑rad‑d‑ssurfn ttmi n‑wasif.» 12iffuġ‑d musa d‑harun zġ‑dar firɛawn. iġr musa s‑sidi rbbi iḍalb‑t f‑ssibt n‑igʷra ġmklli‑s‑inna i‑firɛawn. 13iskr sidi rbbi maylli‑as‑iḍalb musa, mmtn igʷra ġ‑tgʷmma d‑iswak d‑igran. 14ssmunn‑tn d‑igudiyn aylliġ ȷ̈̇ȷ̈̇uȷ̈̇ȷ̈̇an tamazirt kullutt. 15walaynni lliġ iẓra firɛawn tagat‑an tzri, issiqar ul‑ns yagʷi daġ a‑sul‑srsn‑isfld, ġmklli s‑inna sidi rbbi.

tagat n‑wabiba

16yini ilmma sidi rbbi i‑musa: «zayd tinit i‑harun: ‹mdi‑n aɛmud‑nk, tutt ġ‑ugdrur n‑wakal f‑a‑iwrri ig wabiba ġ‑kullu tamazirt n‑miṣr.› » 17skrn ġmkan, imdi‑n harun aɛmud lli‑illan ġ‑ufus‑ns, yut ġ‑ugdrur n‑wakal, yili wabiba f‑mddn d‑lbhaym. iwrri‑kullu‑ugdrur n‑wakal iga wabiba ġ‑kraygatt mani ġ‑tmazirt n‑miṣr. 18irin isḥḥarn ad‑skrn wabiba ġmkan s‑ssiḥr‑nsn, walaynni ur‑ẓḍarn. hati illa wabiba f‑mddn ula lbhaym kullutn, 19aylliġ nnan isḥḥarn i‑firɛawn: «askkir n‑rbbi ayad.» walaynni ul n‑firɛawn iqqur, ur‑srsn‑isfld, ġmklli‑s‑inna sidi rbbi.

tagat n‑izan

20yini ilmma sidi rbbi i‑musa: «nkr zikk ṣbaḥ, tbiddt‑n ġ‑umnid n‑firɛawn ġ‑tizi lliġ a‑d‑itffuġ s‑dar‑waman, tinit‑as: ‹ha ma‑inna rbbi da‑bdda‑illan. adj mddn‑inu ad‑ddun a‑yyi‑tqasan. 21walaynni iġ‑ur‑trẓimt i‑mddn‑inu, ra‑n‑srk‑aznġ izan, kiyi d‑imɛawann‑nk d‑mddn‑nk ula tigʷmma‑nk. rad‑ɛmmrn izan kullu tigʷmma n‑ayt‑miṣr ula ikalln lli‑ġ‑llan. 22ġakudan rad‑ẓliġ akal n‑gušn lli‑ġ‑zdġn mddn‑inu, a‑ur‑t‑lkmn izan. ġmkan a‑s‑ra‑tissant is‑lliġ ġ‑wammas n‑tmazirt‑ad nkki‑ad igan wad bdda illan. 23ġmkan a‑s‑rad‑ẓliġ mddn‑inu zġ‑mddn‑nk. tamatart‑ad, han azkka a‑ra‑tili.› » 24iskr sidi rbbi ġmkan, kšmn izan ggutnin s‑tgmmi n‑firɛawn d‑tgʷmma n‑imɛawann‑ns ula kullu akal n‑miṣr. thlk‑tmazirt s‑tugtt n‑izan.

25iġr‑d firɛawn i‑musa d‑harun s‑dars yini‑asn: «zaydat tġrṣm ġid ġ‑umnid n‑rbbi‑nun ġ‑miṣr.» 26irar‑as musa: «ur‑izri a‑nskr mayan, ašku tiġrṣiw lli‑mi‑ra‑nġrṣ i‑rbbi‑nġ da‑bdda‑illan, hati ḥrmnt dar ayt‑miṣr. iġ‑aġ‑ẓran s‑tġrṣiw lli‑darsn‑ḥrmnin, is‑ur‑ra‑ginġ‑ẓẓun s‑iẓran? 27iqqan‑aġ‑d a‑nmuddu tawada n‑kraḍ‑uwssan ġ‑lh̬la, a‑n‑nġrṣ ġ‑umnid n‑rbbi‑nġ da‑bdda‑illan ġmklli‑f‑aġ‑yuṣṣa.» 28yini‑asn firɛawn: «ra‑kʷn‑adjġ a‑tddum a‑n‑tġrṣm ġ‑lh̬la ġ‑umnid n‑wad illan ig rbbi‑nun, walaynni a‑ur‑n‑taggugm. dɛwat‑iyi didun.» 29yini‑as musa: «ġir a‑n‑ffuġġ zġ‑dark, rad‑ḍalbġ i‑rbbi da‑illan a‑n‑fllak‑yasi izan azkka, kiyi d‑imɛawann‑nk d‑mddn‑nk. walaynni a‑ur‑iyi‑daġ‑tġḍrt, tagʷit a‑tadjt mddn‑nġ ad‑ddun a‑n‑ġrṣn ġ‑umnid n‑rbbi da‑illan.» 30iffuġ‑d musa zġ‑dar firɛawn iḍalb sidi rbbi. 31iskr sidi rbbi maylli‑as‑iḍalb musa, issitti‑n izan f‑firɛawn d‑imɛawann‑ns d‑mddn‑ns, aylliġ ur‑sul‑tqama ḥtta yat‑tizit. 32walaynni firɛawn issiqar daġ ul‑ns tawala yaḍni, ur‑yudji mddn ad‑ddun.

Currently Selected:

ufuġ 8: SHILOT20

Highlight

Copy