ufuġ 9

tagat ġ‑lksibt

1yini ilmma sidi rbbi i‑musa: «kšm s‑dar firɛawn tinit‑as awal‑ad: ‹ha ma‑inna wad bdda illan ig rbbi n‑ayt‑ɛibr. adj mddn‑inu ad‑ddun a‑yyi‑tqasan. 2walaynni iġ‑tn‑sul‑tumẓt tagʷit a‑ysn‑trẓmt, 3ra‑yut‑ufus n‑rbbi da‑illan lksibt n‑wakal‑nk s‑yan‑waṭṭan bahra išqan. ra‑yili f‑iysan d‑iġʷyal d‑irɛman d‑imugayn d‑uwlli kullutn. 4walaynni rbbi da‑illan ra‑iẓli lksibt n‑ayt‑israyil zġ‑tin ayt‑miṣr. ur‑ra‑tmmt ḥtta yat zġ‑kullu lksibt n‑ayt‑israyil.› » 5izzga sidi rbbi tizi yini: «azkka rad‑skrġ mayan ġ‑wakal n‑miṣr.» 6ndid azkka iskr sidi rbbi ġmklli‑s‑inna, tmmt kullu lksibt n‑ayt‑miṣr. imma lksibt n‑ayt‑israyil, ur‑gis‑tmmut ḥtta yat. 7yazn firɛawn ma‑ys‑d‑itawin lah̬bar, yaf‑n lksibt n‑ayt‑israyil ur‑gis‑tmmut yat, walaynni sul iqqur‑uwl‑ns, ur‑irẓim i‑mddn‑an.

tagat n‑uh̬bitn

8yini daġ sidi rbbi i‑musa d‑harun: «asyat‑d urawn n‑iġd zġ‑ufarnu, a‑t‑yall musa izuzzr‑t ġ‑lgddam n‑firɛawn. 9ra‑iwrri ig agdrur yafufn f‑tmazirt n‑miṣr kullutt, iskr uh̬bitn šqanin i‑mddn d‑lbhaym, ar‑tbbaqin s‑arsḍ ġ‑wakal n‑miṣr kullutt.» 10asin‑d iġd n‑ufarnu. biddn ġ‑lgddam n‑firɛawn, yall‑t musa izuzzr‑t, s‑iwrri iga uh̬bitn šqanin, ar‑tbbaqin s‑arsḍ ġ‑mddn ula lbhaym. 11isḥḥarn ur‑sul‑ẓḍarn ad‑biddn ġ‑umnid n‑musa s‑uh̬bitn lli‑gisn ntni d‑ayt‑miṣr kullutn. 12walaynni sidi rbbi issiqar ul n‑firɛawn, ur‑srsn‑isfld ġmklli‑s‑inna sidi rbbi i‑musa.

tagat n‑ibruri

13yini ilmma sidi rbbi i‑musa: «nkr zikk ṣbaḥ, tbiddt ġ‑lgddam n‑firɛawn tinit‑as awal‑ad: ‹ha ma‑inna wad bdda illan ig rbbi n‑ayt‑ɛibr. adj mddn‑inu ad‑ddun a‑yyi‑tqasan. 14ašku ġilad rad‑ssyagasġ ul‑nk s‑tagatin šqanin s‑uggʷar, kiyi d‑imɛawann‑nk d‑mddn‑nk, f‑a‑tissant is‑ur‑illi zund nkki ġ‑ddunit kullutt. 15ašku mra is‑n‑yadlli‑srk‑mdiġ afus‑inu, utġ‑k kiyi d‑mddn‑nk s‑kra n‑waṭṭan inqqan, lukun laḥ‑kʷn ġ‑iggi n‑wakal. 16walaynni mayad a‑f‑k‑udjiġ, f‑ad‑ak‑ssbayynġ taẓḍḍart‑inu. d‑ġmkad a‑s‑rad‑sfldn mddn f‑ism‑inu ġ‑ddunit kullutt. 17imma kiyi ar‑ukan‑sul‑ttallt ih̬f‑nk f‑mddn‑inu, tagʷit ad‑asn‑trẓmt ad‑ddun. 18hati azkka tizi‑ad ra‑n‑aznġ ibruri išqan. ur‑jji‑illi zund nttan ġ‑miṣr zġ‑isizwur‑ns ar ġilad. 19zayd ġilad taznt ma‑d‑issmunun lksibt ula kullu ma‑teṭṭaft ġ‑igran, tšškšmt‑tn s‑untal. ašku ra‑yut ibruri mddn ula lbhaym nna‑illan ġ‑igran. d‑willi ur‑intiln ġ‑tgʷmma, rad‑kullu‑mmtn.› » 20yili ma‑yumnn awal‑an n‑sidi rbbi ġ‑imɛawann n‑firɛawn, ssrwln‑d ismgan‑nsn ula lksibt‑nsn s‑tgʷmma‑nsn. 21imma willi ur‑tt‑yiwin ġ‑wawal n‑sidi rbbi, udjan‑in ismgan‑nsn ula lksibt‑nsn ġ‑brra.

22yini ilmma sidi rbbi i‑musa: «mdi‑n afus‑nk s‑ignwan a‑iḍr ibruri f‑kullu tamazirt n‑miṣr, f‑mddn ula lbhaym ula f‑kullu ma‑d‑imġin ġ‑igran ġ‑wakal n‑miṣr.» 23imdi‑n musa aɛmud‑ns s‑ignwan, yazn‑d sidi rbbi iggign d‑ibruri ar‑d‑kkatn‑usmann f‑wakal, iffi‑d sidi rbbi ibruri f‑tmazirt n‑miṣr. 24iggut ibruri išqu bahra. ur‑jji‑illi wan ibruri‑an ġ‑wakal n‑miṣr zġ‑isizwur n‑tmazirt. zaydn‑usmann ar‑d‑kkatn zġ‑tsga‑yad ula h̬tad. 25izayd ibruri ar‑itkkʷm kullu ma‑illan ġ‑igran n‑tmazirt n‑miṣr kullutt, mddn ula lbhaym ula ma‑d‑imġin, irẓ kullu iṣġarn. 26imma akal n‑gušn lli‑ġ‑llan ayt‑israyil, nttan waḥdut a‑ġ‑ur‑illi ibruri.

27yazn firɛawn ma‑d‑yaqran i‑musa d‑harun s‑dars yini‑asn: «ha‑yyi ġilad jliġ. rbbi da‑illan ad‑dar lḥqq. jliġ nkki ula mddn‑inu. 28ḍalbat rbbi da‑illan, ašku yuwda‑yaġ zġ‑iggign n‑rbbi d‑ibruri‑ns. ra‑kʷn‑adjġ a‑tddum, a‑ur‑sul‑tqamam ġid.» 29yini‑as musa: «ġir a‑n‑ffuġġ zġ‑tmdint, ra‑n‑mdiġ ifassn‑inu s‑rbbi da‑bdda‑illan, bbin‑in iggign laḥ ibruri, f‑a‑tissant s‑ṣṣaḥt, ddunit tga tin rbbi da‑bdda‑illan. 30imma kiyi d‑imɛawann‑nk, ssnġ is‑ur‑ta‑trim a‑stti‑ttawim ġ‑rbbi‑ad igan wad bdda illan.»

31han tizi‑an ityawhlak lkttan ula ṭumẓin, ašku ṭumẓin ar‑d‑ssufuġnt tizlfin, ula lkttan ijjujg. 32imma irdn d‑uḍkkuy ur‑tthlkn ašku ur‑ta‑d‑mġin.

33izayd musa ifl firɛawn ġakudan iffuġ zġ‑tmdint, imdi‑n ifassn‑ns s‑sidi rbbi, bbin‑in iggign d‑ibruri, ur‑sul‑a‑d‑itffi‑unẓar f‑wakal. 34walaynni firɛawn, lliġ iẓra anẓar d‑ibruri d‑iggign bbin‑in, ijlu daġ. issiqar‑uwl‑ns ntta d‑imɛawann‑ns. 35han iqqur‑uwl n‑firɛawn, ur‑yudji ayt‑israyil ad‑ddun, ġmklli‑s‑inna sidi rbbi f‑ils n‑musa.

Currently Selected:

ufuġ 9: SHILOT20

Highlight

Copy