Yaya 16

1Né wɛ́ɛ ó kó ólu bɛ́ fɔ a yɛ́ ké a kúnnɔn kɛ́nan cáan ké lánanya o kɛ́nan bhɔ a bhóo. 2Í yáa a gbɛ́ kɛ a lábhɔ kaangɛbho ŋólu kɔ́ɔnnɔn, wáati lɔ́ yáa sé, mɔɔn mínnu káa a Fáa, olu yáa í míli ko í wɛ́ɛ kóbhɛɛ lé kɛ́ Ala yɛ́. 3Í yáa o bháala súu ólu kɛ́ kɛ mansɔɔ í man Nvá lɔ́, í lo mán né lɔ. 4Ni ó kó ólu fɔ́la a yɛ́ ké, o wáati ólu kɛ́ sé, áa a bhyáa a hákii lɔ kó né tɛ́ wɛ́ɛ ó fɔ a yɛ́ kɔɔ.

Né mán ó fɔ a yɛ́ a lámyaan ó lɔ́, kɛ mansɔɔ né tɛ́ɛ ní ále.

Ní Sɛnnɛnyanin ŋó nankun ŋo

5«Sísan ní táa njébhaa ó saala, ále lɔ tɛ́ né mánɲaankɛla kó ní táa mín. 6Waa a hákii ó wɛ́ɛ ɲanmin ne yɛ kóman olu kósɔn. 7Wáa ní tínɲan lé fɔ́la a yɛ́. Ni táala a lée léelu kósɔn, ní né mán táa, dhyɛ́manbhaa o táa nan a mán, waa ni né kɛ́ táa, né yáa a bhyáashaa a mán. 8A yáa a yáa dínɲan mɔɔn olu lá ko í wɛ́ɛ fíi yúumu ólu lɔ óni téeɲanko ólu lɔ, óni Ala yɛ́ kítiko ólu lɔ. 9Míin nan kɛ́ yúumu ó lé, í wɛ́ɛ fíi kɛ mansɔɔ i mán lá né lá. 10Míin nan kɛ téeɲan ólu lé, í wɛ́ɛ fíi, kɛ mansɔɔ ní táala Fá o fɛ́ yé, a táa ne yé bhée. 11Míin nan kɛ kítiko ó lé, aa a yáa í lá kó Ala wɛ́ɛ kíti tɛ́ɛ dínɲan kunndii#16.11 Dínɲan kúnndii min ngo fɔnin é yánun, o lée Sɔtaannan lé. ó ka kɛ́ bhá. 12Kó shɛ́ɛman ŋé né fɛ́ kɛ fɔ a yɛ́, waa a tɛ́ sé kɛ bhɔ́ ó bɛ́ ɲánle sísan. 13Ní Sɛnnɛnyanin min é Ala yɛ́ tínɲan ó yáala mɔɔn ólu lá, ní ó kɛ́nan wáati min nɔn, a yáa a bhyáa tínɲan sháa ó bɛ́ ka, kɛ mansɔɔ a táa kóman a gbúlu bháaka lɔ́. Wáa a kɛ́ fé ŋóo fé myɛ́n, óni kó mínnu káa kɛ́, a yáa ó fɔ a yɛ́. 14Ní Sɛnnɛnyanin ŋó yáa bwóɲan lá né ka, kɛ mansɔɔ a kɛ́ fé min myɛ́n né lá, a káa ó lé fɔ a yɛ́. 15Fé míin Fá o tá le, o bɛ́ɛ ne tá le, o lɔ́ ní fɔ́la ngó Ní Sɛnnɛnyanin ŋó kɛ́ fé min myɛ́n né lá, a káa ó lé fɔ a yɛ́.»

Kaamɔɔndhye ŋólu yɛ nilafin ŋo yáa yɛ́ɛman kɛ kɛ nisɔdhyaa lé

16Ɛnza ŋé fɔ a yɛ kaamɔɔndhye ŋolu yɛ ko sanni wáati dɔ́ɔnin njɛ a táa ne yé bhée, wáati dɔ́ɔnin ŋó kwɔ́ a yáa wɛ́ɛ kɛ́ ne yé. 17A yɛ́ kaamɔɔndhye nɔ́lu tɛ́ɛ ɲɔ́ɔn mánɲaankɛla kó: «Aa fɛ́ kɛ́ mínnɛɛn lé fɔ án ɲɛ́n? Kó sánni wáati dɔ́ɔnin njɛ a táa yé, wáati dɔ́ɔnin ŋó kwɔ́ an ɲáan wɛ́ɛ kɛ́ a yé. A kó í kwɔ́ kó né kɛɛ tɛ́ɛ Fá Ala sáala. 18Íi fɔ kó: ‹Wáati dɔ́ɔnin ŋo kɔɔ oo mínnɛɛn lé? Án ngwɛnnin man bhɔ́ o ɲánle.› »

19 Ɛnza ndɛ́ wɛ́ɛ lɔ́ ŋóo íi fɛ́ kɛ́ ale mánɲaankɛ mínngɛ, aa fɔ í yɛ́ kó: «Áa ɲɔ́ɔn manɲaankɛla né yɛ́ kóman ó kɔ́ɔ o lé mán an? Née fɔ mínngɛ ngo sánni wáati dɔ́ɔnin njɛ a táa né yé, óni kó sánni wáati dɔ́ɔnin njɛ íkwɔ a yáa ne yé. 20Tínɲan in ne ni fɔ́la a yɛ́ ngó, a yáa kásikɛ fɔ kɛ́ mánywaankan nvɔ, waa ké dínɲan mɔɔn ólu nisɔdhyaa o lɔ. A níla yáa fín, wáa a yɛ́ nílafin ŋó yáa yɛ́ɛman kɛ́ kɛ nisɔdhyaa le. 21Ní muso ó kɛ́ kɛ tin ŋo man wáati mínnɔn, a ní ó tɔ́lɔla lé, kɛ mansɔɔ a yɛ́ tɔ́lɔyawaati ó lé wɛ́ɛ sé, wáa ni a kɛ́ wɛ́ɛ wóola, a tɛ́ i mílila o tɔ́lɔya ó mán bhée dhyé ŋó sɔ́ɔ ó nisɔdhyaa ó kósɔn. 22A nílafinnin ɲé sísan, wáa ɲáan a yé íkwɔ, o wáati ó lɔ a yáa í nisɔdhyaa, mɔɔn sí táa sé kɛ́ ó nisɔdhyaa ó bhɔ́ a bhóolɔ.

23O ló ŋó lá, a táa né mánɲaankɛ fósi lá bhée. Tínɲan in ne ní fɔ́la a yɛ́ ngó, ni a kɛ fé ŋóo fé ngófɔ Fá Ala yɛ́ né tɔ́ɔla, a yáa o dí a mán. 24Fɔ kɛ́nan sé bí mán, a mán fósi kófɔ Ala yɛ né tɔ́ɔla bhá. Aa kófɔli kɛ́, a yáa sɔ́ɔli kɛ́, ké a yɛ́ nisɔdhyaa o waa í lafa.»

Ɛnza née sésɔɔbhaa ó lé

25«Ní kóman a yɛ́ sáanan lú lɔ, wáati lɔ́ yáa sé, né mánfaa kóman a yɛ́ sáanan ólu lɔ bhée, waa né yáa Fá o kofɔ a yɛ́ kóman gbɛ́nin nú lɔ. 26O ló ŋó lá, a yáa Fá Ala dɛ́li né tɔ́ɔ lá, waa mán fɔ a yɛ́ ngó né yáa a kofɔ Fá o yɛ́ ale kósɔn nɛ́, 27A lée ko wɛɛ dhyáa Fá Ala gbú yɛ, kɛ mansɔɔ minnan ne wɛ́ɛ dhyáa a lée yɛ, yáanin a wɛ́ɛ la a lá kó ní bhɔ́ Ala lé fɛ́ yé. 28Née bhɔ́ Fa Ala fɛ́ yé kɛ́nan dínɲan ó lɔ́, sísan ní bhɔ́la dínɲan lɔ kɛ táa Fá o fɛ́ yé.»

Ɛnza ŋwɛ́ɛn sé sɔɔ dínɲan ka

29A yɛ́ kaamɔɔndhye ŋólu fɔ a yɛ́ kó: «Ɔɔn, sísan, íi kóman gbɛ́nin nvɔla án ɲɛn, i tɛ́ kómanla án ɲɛ́n saanan lɔ́ bhée. 30Sísan, án ni lɔ ŋóo ii kó ó bɛ́ lɔ kɛ́ bhá, kɛ mansɔɔ yáanin mɔɔn mán í mánɲaankɛ a kɔ́ɔnnɔnko o la, ii ó lɔ. O lé kósɔn án ní lá a lá kó ii bhɔ́ Ala le fɛ́ yé.» 31Ɛnza ŋé í yawi kó: «A wɛ́ɛ lá né lá sísan an? 32Sísan, wáati lɔ́ yáa sé, o wáati o yɛ́ɛ wɛ́ɛ wɛɛ séla, a yáa ɲɛ́nɲɛn, bɛ́ ni a táalaa, kɛ́ né kée ndó, wáa né mánfaa tó ngéenan kɛ mansɔɔ Fá ó ni né lé. 33Ní ó fɔ a yɛ́ ké áa tó ni né lé kɛ́ hɛ́lɛ sɔ́ɔ. Kɛ a tó dínɲan lɔ, nílafin née a ka, wáa áa í lɔ́ja, né wɛ́ɛ sé sɔ́ɔ dínɲan ka kɛ́ bhá.»

Currently Selected:

Yaya 16: MXX

Highlight

Copy