ဢွၵ်ႇၵႂႃႇ 38

1ၼႄးၼိုင်ႈၸမ်ႉ၊ မၼ်းဢဝ်မႆႉဢၵႃႇသႃႉႁဵတ်းယိတ်ႈပလၢင်ႇတီႈဢၼ်တၵ်းတုတ်ႇၽႆး ဢၼ်ၼႃႈယၢဝ်းမၼ်းမီးႁႃႈသွၵ်ႇ၊ ၼႃႈပွတ်းမၼ်းႁႃႈသွၵ်ႇလႄႈပဵၼ်သီႇၸဵင်ႇၶိုင်ႈဝႆႉၼၼ်ႉဢေႃႈ။ ဢၼ်သုင်မၼ်းၵေႃႈမီးသၢမ်သွၵ်ႇဢေႃႈ။- 2မၼ်းႁဵတ်းၶဝ်လႅမ်သီႇလႅမ်ႈသႂ်ႇၵႃႈၼိူဝ်သီႇၸဵင်ႇမၼ်းဢေႃႈ။ ၶဝ်လႅမ်ၸိူဝ်းၼၼ်ႉပဵၼ်ၼိူဝ်ႉလဵဝ်ၵၼ်တင်းမၼ်းလႄႈ မၼ်းဢဝ်တွင်းလိူင်ဢုမ်ႇႁေႃႇသေဢေႃႈ။- 3မၼ်းဢဝ်တွင်းလိူင် ႁဵတ်းၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းယိတ်ႈပလၢင်ႇ တင်းသဵင်ႈတင်းလူင် ဢၼ်ဝႃႈမေႃႈမၼ်း၊ ၸေႃႉၽႅပ်ႉမၼ်း၊ ဝၢၼ်ႇမၼ်း၊ ၶေႃဢၼ်ၵွင်ႉၼိူဝ်ႉမၼ်းလႂ်၊ လၢင်ႇပၢၼ်းမၼ်းလႂ် ၼၼ်ႉဢေႃႈ။- 4မၼ်းႁဵတ်းတႃၶႃႇတွင်းလိူင်ပုၼ်ႈယိတ်ႈပလၢင်ႇၼၼ်ႉလႄႈ ဝႆႉၵႃႈတႂ်ႈၶႃႇပၢၼ်းမၼ်းႁႂ်ႈၶိုတ်းထိုင် ၵႃႈတီႈၶိုင်ႈၵၢင်မၼ်းလႄႈ၊- 5မၼ်းဢဝ်တင်းတွင်းလိူင်လေႃႇႁဵတ်းၶူၺ်ႇသီႇၶူၺ်ႇသႂ်ႇၵႃႈတီႈသီႇၸဵင်ႇတႃၶႃႇၼၼ်ႉဝႆႉပုၼ်ႈတီႈဢၼ်တၵ်းသွတ်ႇၵၢၼ်းဢေႃႈ။- 6မၼ်းဢဝ်မႆႉဢၵႃႇသႃႉ ႁဵတ်းၵၢၼ်းႁၢပ်ႇလႄႈဢဝ်တွင်းလိူင်ဢုမ်ႇႁေႃႇသေယဝ်ႉ၊- 7ဢဝ်ၵၢၼ်းႁၢပ်ႇၸိူဝ်းၼၼ်ႉသွတ်ႇသႂ်ႇဝႆႉ ၵႃႈၼႂ်းၶူၺ်ႇၵႃႈတီႈသွင်ၽၢၵ်ႇယိတ်ႈပလၢင်ႇလႄႈ ပဵၼ်ပုၼ်ႈဢၼ်တၵ်းႁၢပ်ႇမၼ်းဢေႃႈ။ မၼ်းဢဝ်ပႅၼ်ႈႁဵတ်းမၼ်းႁႂ်ႈၵႃႈၼႂ်းမၼ်းပွင်ႇပဵၼ်ပဵဝ်ဝႆႉဢေႃႈ။

တၢင်းဢၼ်ႁဵတ်းၵွၵ်းတွင်းလိူင်

(တူၺ်း၊ ဢွၵ်ႇ 30:18)

8မၼ်းဢဝ်ၸမ်ႈတွင်းလိူင်မႄႈယိင်းၶဝ် ဢၼ်ၸၢင်ႈမႃးၸူႉၵၼ်တုမ်ၵၼ်ၵႃႈတီႈၽၢႆႇၼႃႈၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၸိူဝ်းၼၼ်ႉလႄႈ ႁဵတ်းၵွၵ်းတွင်းလိူင်လူင်း တင်းတိၼ်တွင်းလိူင်မၼ်းဢေႃႈ။

တၢင်းဢၼ်ႁဵတ်းႁူဝ်ႉဝၢင်းသုမ်ႉထဵင်ၸဝ်ႈ

(တူၺ်း၊ ဢွၵ်ႇ 27:9-19)

9ဢၼ်တၵ်းၵင်ႈႁဵတ်းႁူဝ်ႉဝၢင်းသုမ်ႉထဵင်ၸဝ်ႈၸမ်ႉ၊ မၼ်းဢဝ်ပိၵ်ႈၶျေႃးဢၼ်ၼႃႈယၢဝ်းမၼ်း မီးပၢၵ်ႇသွၵ်ႇၼၼ်ႉ၊ ႁဵတ်းၽႃႈၵင်ႈ ပုၼ်ႈၼႃႈတၢင်းၸၢၼ်းဢေႃႈ။- 10ပုၼ်ႈၽႃႈၵင်ႈၼၼ်ႉ မၼ်းႁဵတ်းသဝ်သၢဝ်းၼိုင်ႈတင်းတီႈသုပ်းတိၼ်တွင်းလိူင်သၢဝ်းၼိုင်ႈဢေႃႈ၊ တႅမ်တီႈသဝ်ဢိၵ်ႇတင်းႁၢဝ်းၸိူဝ်းၼၼ်ႉ ပဵၼ်ငိုၼ်းဢေႃႈ။- 11ပုၼ်ႈၼႃႈတၢင်းႁွင်ႇၵေႃႈ မီးၽႃႈၵင်ႈဢၼ်ၼႃႈယၢဝ်းမၼ်း မီးပၢၵ်ႇသွၵ်ႇဢိၵ်ႇတင်း သဝ်သၢဝ်းၼိုင်ႈ၊ တီႈသုပ်းတိၼ် တွင်းလိူင်သၢဝ်းၼိုင်ႈ၊ တႅမ်ငိုၼ်းတီႈသဝ်ဢိၵ်ႇတင်းႁၢဝ်းငိုၼ်းၸိူဝ်းၼၼ်ႉဢေႃႈ။

12ပုၼ်ႈၼႃႈပွတ်းၽၢႆႇတၢင်းဝၼ်းတူၵ်းမီးၽႃႈၵင်ႈဢၼ်ၼႃႈယၢဝ်းမၼ်းမီးႁႃႈသိပ်းသွၵ်ႇ ဢိၵ်ႇတင်းသဝ်သိပ်းၼိုင်ႈ၊ တီႈသုပ်းတိၼ်သိပ်းၼိုင်ႈ၊ တႅမ်ငိုၼ်းတီႈသဝ်ဢိၵ်ႇတင်းႁၢဝ်းငိုၼ်းၸိူဝ်းၼၼ်ႉဢေႃႈ။- 13ပုၼ်ႈၼႃႈၽၢႆႇတၢင်းဝၼ်းဢွၵ်ႇၵေႃႈ ၼႃႈပွတ်းမၼ်း မီးႁႃႈသိပ်းသွၵ်ႇဢေႃႈ။- 14ပုၼ်ႈဢၼ်တၵ်းၵင်ႈႁိမ်းၽၵ်းတူၽၢႆႇၼိုင်ႈၼၼ်ႉ မီးၽႃႈၵင်ႈဢၼ်ၼႃႈယၢဝ်းမၼ်းမီးသိပ်းႁႃႈသွၵ်ႇ ဢိၵ်ႇတင်းသဝ်သၢမ်လႅမ်ႈတင်းတီႈသုပ်းတိၼ်သၢမ်ဢၼ်ဢေႃႈ။- 15ပုၼ်ႈႁိမ်းၽၵ်းတူၽၢႆႇၼိုင်ႈၵေႃႈ မီးၽႃႈၵင်ႈဢၼ်ၼႃႈယၢဝ်းမၼ်းမီးသိပ်းႁႃႈသွၵ်ႇ ဢိၵ်ႇတင်းသဝ်သၢမ်လႅမ်ႈ တင်းတီႈသုပ်းတိၼ် သၢမ်ဢၼ်ဢေႃႈ။- 16ၽႃႈၵင်ႈဢၼ်ၵင်ႈႁဵတ်းႁူဝ်ႉဝၢင်းၼၼ်ႉ ၵႃႈမီးတင်းသဵင်ႈတင်းလူင် ပဵၼ်ပိၵ်ႈၶျေႃးဢေႃႈ။- 17သဝ်ၸိူဝ်းၼၼ်ႉပျေႉၸုမ်ႇဝႆႉ တင်းတီႈသုပ်းတိၼ်တွင်းလိူင်လႂ်၊ တႅမ်ငိုၼ်းလႂ် တင်းႁၢဝ်းငိုၼ်းလႂ်လႄႈ ဝၢၼ်ႇဢၼ်ၶၢမ်ႇႁူဝ်သဝ်ၸိူဝ်းၼၼ်ႉၵေႃႈ ဢဝ်တင်းငိုၼ်းဢုမ်ႇႁေႃႇသေဢေႃႈ။ ႁၢဝ်းသဝ်ဝၢင်းၵႃႈမီးတင်းသဵင်ႈတင်းလူင်ၼၼ်ႉ ပဵၼ်ႁၢဝ်းငိုၼ်းဢေႃႈ။

18ၽႃႈၵင်ႈပုၼ်ႈဢၼ်တၵ်းၵင်ႈၽၵ်းတူႁူဝ်ႉဝၢင်းၼၼ်ႉ ပဵၼ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်တင်းပိၵ်ႈၶျေႃးဢၼ်တမ်ႇၵၢမ်းၵၼ်ႁၢင်ႈၶိူင်ႈတေႃးႁဵတ်းၼၼ်ႉလႄႈ၊ ၼႃႈယၢဝ်းမၼ်းမီးသၢဝ်းသွၵ်ႇ၊ ဢၼ်သုင်ၼႂ်းၼႃႈပွတ်းမၼ်းႁႃႈသွၵ်ႇလႄႈ ပဵၼ်ၼႄးလဵဝ်ၵၼ်တင်းၽႃႈၵင်ႈဢၼ်ၵင်ႈႁူဝ်ႉဝၢင်းၼၼ်ႉဢေႃႈ။- 19သဝ်ၽၵ်းတူႁူဝ်ႉဝၢင်းမီးသီႇလႅမ်ႈလႄႈ ပျေႉၸုမ်ႇဝႆႉတင်းတီႈသုပ်းတိၼ်တွင်းလိူင်သီႇဢၼ် တင်းတႅမ်ငိုၼ်းမၼ်း တင်းႁၢဝ်းမၼ်း တင်းဝၢၼ်ႇဢၼ်ၶၢမ်ႇႁူဝ်သဝ်မၼ်းဢၼ်ဢဝ်တင်းငိုၼ်းဢုမ်ႇႁေႃႇၼၼ်ႉဢေႃႈ။- 20လၵ်းသုမ်ႉထဵင်ၸဝ်ႈၵႃႈမီးတင်းသဵင်ႈတင်းလူင် ဢိၵ်ႇတင်းလၵ်းဢၼ်ပၵ်းၸွမ်းႁိမ်းႁူဝ်ႉဝၢင်းမၼ်းၵႃႈမီးတင်းသဵင်ႈတင်းလူင်ပဵၼ်တွင်းလိူင်ဢေႃႈ။

ၶိူင်ႈပိူင်ဢၼ်သုင်းတီႈသုမ်ႉထဵင်ၸဝ်ႈ

21ဢၼ်ၼပ်ႉဢၼ်ဢၢၼ်ႇၼႆႉၸမ်ႉ၊ ပဵၼ်ၸရၢင်းသုမ်ႉထဵင်ၸဝ်ႈဢၼ်ဝႃႈသုမ်ႉထဵင်ၸဝ်ႈၶိူင်ႈဢၼ်ၶၢမ်ႇသၢၵ်ႈသေႇဢၼ်မႅၼ်ႈၸွမ်းၼင်ႇဢၼ်ဢီႉသမႃႇလုၵ်ႈၸၢႆးယိတ်ႈပရေႃးႁဵၵ်ႈဢႃႇရုၼ်ႇဢဝ်ၶိူင်ႈပိူင်ပုၼ်ႈဢၼ်ၵူၼ်းမဵဝ်းလေႇဝီႉၶဝ်တၵ်းပွင်ႁဵတ်းဢမူႉၸဝ်ႈၸိူဝ်းၼၼ်ႉ ၼပ်ႉဢၢၼ်ႇၸွမ်းၵႃႈၼင်ႇဢၼ်မူဝ်းသေႇၸီႇယၢင်ႇဝႆႉၼၼ်ႉဢေႃႈ။- 22ၵႃႈဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉၸိုင်၊ပေႇၸလေႇလႃႉလုၵ်ႈၸၢႆးဢူႉရီႉဢၼ်ပဵၼ်လုၵ်ႈၸၢႆးႁူႉရႃႉၵႃႈၼႂ်းၸိူဝ်ႉၶိူဝ်းယူႉတႃႉၼၼ်ႉႁဵတ်းဢေႃႈ။- 23လိူဝ်သေၼၼ်ႉ ဢႁေႃႇလျႃႇၽႃႉလုၵ်ႈၸၢႆးဢႁီႉသမၵ်ႉၵႃႈၼႂ်းၸိူဝ်ႉၶိူဝ်းတၢၼ်ႇဢၼ်ၸၢင်ႈႁဵတ်းတၢင်းႁဵတ်းဢၼ်မေႃတွင်ႈမေႃၶၵ်း၊ တၢင်းႁဵတ်းဢၼ်ၸၢင်ႈၵျၢမ်ႇႁဵတ်းဢၼ်လၢၵ်ႇလၢၵ်ႇလၢႆးလၢႆး၊ တၢင်းႁဵတ်းဢၼ်ၸၢင်ႈဢဝ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃးတမ်ႇၵၢမ်းၵၼ်ႁၢင်ႈၶိူင်ႈတေႃးႁဵတ်းၸိူဝ်းၼၼ်ၼၼ်ႉၵေႃႈ မီးလူၺ်ႈၵၼ်တင်းမၼ်းဢေႃႈ။- 24ၶၼ်ၸင်ႈၶမ်းဢၼ်ဢဝ်ႁႂ်ႈလႆႈႁဵတ်းထႃႇၼႃႉတီႈမူတ်းၸၢင်ႇႁႂ်ႈယဝ်ႉတူဝ်ၼၼ်ႉဢၼ်ဝႃႈၶမ်းဢၼ်ဢဝ်လူႇဢဝ်တၢၼ်းၼၼ်ႉၸမ်ႉ၊ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေးလႃႉၼၼ်ႉ မီးသၢဝ်းပၢႆၵဝ်ႈတလၢၼ်ႇတၢၼ်ႇတင်းၵျၢပ်ႈသၶေးလႃႉၸဵတ်းပၢၵ်ႇပၢႆသၢမ်သိပ်းၵျၢပ်ႈဢေႃႈ။- 25ငိုၼ်းဢၼ်ပရဵၵ်ႈသၢတ်ႈၶဝ်ၸိူဝ်းဢၼ် ၶဝ်ႈပႃးၼႂ်းၸရၢင်းၸိူဝ်းၼၼ်ႉပၼ်ၼၼ်ႉ ပဵၼ်ပၢၵ်ႇတလၢၼ်ႇတၢၼ်ႇတင်းၵျၢပ်ႈသၶေးလႃႉႁဵင်ၼိုင်ႈပၢႆၸဵတ်းပၢၵ်ႇၸဵတ်းသိပ်းပၢႆႁႃႈၵျၢပ်ႈဢေႃႈ။- 26ၶဝ်ၸိူဝ်းဢၼ်ၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၼႂ်းၸရၢင်းၵူႈၵေႃႉ ဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇၵႃႈမီးတင်းသဵင်ႈတင်းလူင် ဢၼ်မီးၵူၼ်းႁူၵ်းသႅၼ်သၢမ်ႁဵင်ႁႃႈပၢၵ်ႇပၢႆႁႃႈသိပ်းၸိူဝ်းၼၼ်ႉ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေးလႃႉၼၼ်ႉလႄႈ ဢွၼ်ၵၼ်ပၼ်ယေႈၵေႃႉယေႈၽႄၵႃႈ ဢၼ်ဝႃႈၶိူင်ႈၵျၢပ်ႈၼိုင်ႈဢေႃႈ။- 27ငိုၼ်းပၢၵ်ႇတလၢၼ်ႇတၢၼ်ႇၼၼ်ႉ ပဵၼ်ပုၼ်ႈဢၼ်တၵ်းလေႃႇႁဵတ်းတီႈသုပ်းတိၼ်ထႃႇၼႃႉတီႈမူတ်းၸၢင်ႇဢိၵ်ႇတင်းတီႈသုပ်းတိၼ်ၽႃႈၵင်ႈၵႃႈၼႂ်းဢၼ်ဝႃႈ ဢဝ်ငိုၼ်းပၢၵ်ႇတလၢၼ်ႇတၢၼ်ႇ ႁဵတ်းတီႈသုပ်းတိၼ်ပၢၵ်ႇၼိုင်ႈၼၼ်ႉ ယေႈဢၼ်ယေႈတလၢၼ်ႇတၢၼ်ႇဢေႃႈ။- 28မၼ်းဢဝ်ငိုၼ်းဢၼ်ၵိုတ်းဢၼ်ၵျၢၼ်ႇႁဵင်ၼိုင်ႈၸဵတ်းပၢၵ်ႇပၢႆၸဵတ်းသိပ်းႁႃႈၵျၢပ်ႈၼၼ်ႉ ႁဵတ်းတႅမ်သဝ်လႂ် တင်းႁၢဝ်းသဝ်လႂ်လႄႈ ဢုမ်ႇႁေႃႇဝၢၼ်ႇဢၼ်ၶၢမ်ႇႁူဝ်သဝ်လႂ်ဢေႃႈ။- 29ၶၼ်ၸင်ႈတွင်းလိူင်ဢၼ်လူႇဢၼ်တၢၼ်းၼၼ်ႉၸမ်ႉ၊ ပဵၼ်ၸဵတ်းသိပ်းတလၢၼ်ႇတၢၼ်ႇ တင်းၵျၢပ်ႈသၶေးလႃႉ သွင်ႁဵင်ပၢႆသီႇပၢၵ်ႇၵျၢပ်ႈဢေႃႈ။- 30မၼ်းဢဝ်တွင်းလိူင်ၼၼ်ႉ ႁဵတ်းတီႈသုပ်းတိၼ်ၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ၊ ယိတ်ႈပလၢင်ႇတွင်းလိူင်၊ တႃၶႃႇတွင်းလိူင်ပုၼ်ႈမၼ်း၊ ၶိူင်ႈပိူင်ယိတ်ႈပလၢင်ႇၼၼ်ႉ ၵႃႈမီးတင်းသဵင်ႈတင်းလူင်၊- 31ဢိၵ်ႇတင်းတီႈသုပ်းတိၼ်ႁူဝ်ႉဝၢင်းဢၼ်ၵင်ႈလႂ်၊ တီႈသုပ်းတိၼ်ၽၵ်းတူႁူဝ်ႉဝၢင်းလႂ်၊ လၵ်းသုမ်ႉထဵင်ၸဝ်ႈလႂ်၊ လၵ်းဢၼ်ပၵ်းလွမ်ႉႁွပ်ႈႁူဝ်ႉဝၢင်းလႂ် ၵႃႈမီးတင်းသဵင်ႈတင်းလူင်ဢေႃႈ။

Currently Selected:

ဢွၵ်ႇၵႂႃႇ 38: CBMS

Highlight

Copy

Compare