ဢွၵ်ႇၵႂႃႇ 39

ၶူဝ်းၼုင်ႈပုၼ်ႈယိတ်ႈပရေႃးႁဵၵ်ႈ

(တူၺ်း၊ ဢွၵ်ႇ 28:1-14)

1ၶဝ်ဢဝ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ႁဵတ်းၶူဝ်းၼုင်ႈၶူဝ်းမႆ ပုၼ်ႈဢၼ်တၵ်းၵိုတ်ႉႁၢပ်ႇဢမူႉၸဝ်ႈၵႃႈတီႈထႃႇၼႃႉ တီႈမူတ်းၸၢင်ႇ ဢိၵ်ႇတင်း ၶူဝ်းၼုင်ႈၶူဝ်းမႆဢၼ်မူတ်းၸၢင်ႇ ပုၼ်ႈဢႃႇရုၼ်ႇၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉ တီႈမူဝ်းသေႇၼၼ်ႉဢေႃႈ။- 2ၶဝ်ဢဝ်ၶမ်း၊ ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် တင်းပိၵ်ႈၶျေႃးႁဵတ်းသိူဝ်ႈသုပ်းဢေႃႈ။- 3ၶဝ်ၶဵၼ်ႇပျႃးၶမ်းလႄႈ ထႅၵ်ႇထိူဝ်ႁဵတ်းၸိူၵ်ႈၶမ်းသေယဝ်ႉ၊ တမ်ႇၵၢမ်းၵၼ်တေႃးႁဵတ်းၵႃႈၼႂ်း ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် ဢိၵ်ႇတင်းပိၵ်ႈၶျေႃးၼၼ်ႉဢေႃႈ။- 4ၶဝ်ႁဵတ်းသၢႆတွႆးသွင်သဵၼ်ႈ ဢၼ်ႁႂ်ႈမၼ်းႁွႆႈၸပ်းၵၼ်လႄႈ ၵႃႈတီႈႁိမ်းသုတ်းမၼ်းသွင်ၽၢႆႇၼၼ်ႉႁွႆႈၸပ်းၵၼ်ယူႇဢေႃႈ။- 5သၢႆႁတ်ႉဢႅဝ်ဢၼ်ႁၢင်ႈၶိူင်ႈဢၼ် ၸၢပ်ႈသႅင်ႇၵၼ်တင်း တၢင်းဢၼ်ၼုင်ႈသိူဝ်ႈသုပ်းဢၼ်မီးၵႃႈတီႈမၼ်းၼၼ်ႉ ပဵၼ်ၼိူဝ်ႉလဵဝ်ၵၼ်တင်းသိူဝ်ႈသုပ်းၼၼ်ႉလႄႈ ပဵၼ်မိူၼ်ၸိူဝ်ႉၼင်ႇ တူဝ်မၼ်းဢေႃႈ။ ဢဝ်ၶမ်းဢိၵ်ႇတင်းၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃးႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးၸီႇယၢင်ႇဝႆႉတီႈမူဝ်းသေႇၼၼ်ႉဢေႃႈ။

6ၶဝ်သူၺ်းသႅင်ၸၢႆးၶႃးယွတ်ႇသွင်လုၵ်ႈလႄႈ ဢဝ်ဢႅၵ်ႉၶရႃႇတူဝ်လိၵ်ႈၸွမ်းလူၺ်ႈၼႃႇမႃႉၸိုဝ်ႈသဵင်ၵူၼ်းမဵဝ်း ဢီႉသရေႇလႃႉတင်းလၢႆတၢင်ႇသႂ်ႇမိူၼ်ၸိူဝ်ႉၼင်ႇဢၼ်ဢဝ်တၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉသေယဝ်ႉ၊ ဢဝ်သႂ်ႇဝႆႉၵႃႈၼႂ်းႁိူၼ်းၶမ်းမၼ်းဢေႃႈ။- 7ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၵႃႈတီႈမူဝ်းသေႇၼၼ်ႉသေလႄႈ၊ မၼ်းဢဝ်သႅင်ၼၼ်ႉ သႂ်ႇဝႆႉၵႃႈၼိူဝ်သၢႆတွႆးသိူဝ်ႈသုပ်းၼၼ်ႉ ႁႂ်ႈပဵၼ်သႅင်ပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းၵူၼ်းမဵဝ်းဢီႉသရေႇလႃႉၸိူဝ်းၼၼ်ႉဢေႃႈ။

တၢင်းဢၼ်ႁဵတ်းၶိူင်ႈၶူဝ်းထၢပ်ႈၼႃႈဢူၵ်း

(တူၺ်း၊ ဢွၵ်ႇ 28:15-30)

8မၼ်းဢဝ်ၶမ်း တင်းၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ ပိၵ်ႈၶျေႃးတမ်ႇၵၢမ်းၵၼ် တေႃးႁၢင်ႈၶိူင်ႈႁဵတ်းၶိူင်ႈဝႆၼႃႈဢူၵ်း မိူၼ်ၸိူဝ်ႉၼင်ႇဢၼ်ႁဵတ်းသိူဝ်ႈသုပ်းၼၼ်ႉဢေႃႈ။- 9တူပ်ႉႁဵတ်းသွင်ထၢပ်ႈလႄႈ ၼႃႈယၢဝ်းမၼ်းၶိုပ်ႈၼိုင်ႈ၊ ၼႃႈပွတ်းမၼ်းၶိုပ်ႈၼိုင်ႈ၊ ပဵၼ်သီႇၸဵင်ႇၶိုင်ႈဝႆႉဢေႃႈ။- 10ၵႃႈတီႈၶိူင်ႈဝႆၼႃႈဢူၵ်းၼၼ်ႉ မၼ်းၸီႇသႅင်ဢၼ်မျၢတ်ႈသီႇထႅဝ်ဢေႃႈ။ ထႅဝ်ပထမႃႉၸမ်ႉ၊ ပဵၼ်သႅင်လႅင်၊ ဢူၵ်းသၽူရႃး တင်းမျႃႉဢေႃႈ။- 11ထႅဝ်တူႉတီႉယႃႉၸမ်ႉ၊ ပဵၼ်ပတမျႃး၊ ၼီႇလႃႇ တင်းၸိင်ႇဢေႃႈ။- 12ထႅဝ်တႃႉတီႉယႃႉၸမ်ႉ၊ ပဵၼ်ဝႃႇၵိၼ်ႇသူႉ၊ မႁူႇရႃႇ တင်းၵေႃႇမုၵ်ႉဢေႃႈ။- 13ထႅဝ်ၸတုၵ်ႉထႃႉၸမ်ႉ၊ ပဵၼ်သႅင်မျႅၵ်ႉရွႆး၊ ၸၢႆးၶႃးယွတ်ႇ တင်းၼၵႃးသွႆႈဢေႃႈ။ သႅင်ႁင်းၽႂ်ႁင်းမၼ်းၸိူဝ်းၼၼ်ႉ ဢဝ်ၸီႇသႂ်ႇ ၵႃႈၼႂ်းႁိူၼ်းၶမ်းမၼ်းဢေႃႈ။- 14သႅင်ၸိူဝ်းၼၼ်ႉ ၸွမ်းၵႃႈၼင်ႇၼႃႇမႃႉၸိုဝ်ႈသဵင် ၵူၼ်းမဵဝ်းဢီႉသရေႇလႃႉၼၼ်ႉသေလႄႈ မီးသိပ်းသွင်လုၵ်ႈ ၸွမ်းၵႃႈၼင်ႇၼႃႇမႃႉၸိုဝ်ႈသဵင်ၶဝ်မီးၼၼ်ႉဢေႃႈ။ ပဵၼ်မိူၼ်ၸိူဝ်ႉၼင်ႇဢၼ်ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉ ၵႃႈၼိူဝ်တၼ်းသိၵ်ႈၼၼ်ႉလႄႈ ပဵၼ်ပုၼ်ႈမဵဝ်းသိပ်းသွင်ပႃး ႁင်းၽႂ်ႁင်းမၼ်းၵႃႈၼင်ႇၼႃႇမႃႉၸိုဝ်ႈသဵင်ၶဝ်မီးၼၼ်ႉဢေႃႈ။- 15ၵႃႈတီႈၽၢႆႇၼိူဝ်ၶိူင်ႈဝႆၼႃႈဢူၵ်းၼၼ်ႉ ၶဝ်ဢဝ်ၶမ်းလွတ်ႈငၢၼ်ႇႁဵတ်းသၢႆလိမ်ႇၵဵဝ်ႈဢၼ်ၽၼ်ႈႁဵတ်းၼၼ်ႉသႂ်ႇဢေႃႈ။- 16ၶဝ်ႁဵတ်းၶူၺ်ႇၶမ်းသွင်ဢၼ်ဢိၵ်ႇတင်းလူင်ႇမွၵ်ႇၶမ်းသွင်လူင်ႇလႄႈ ဢဝ်ၶူၺ်ႇသွင်ဢၼ်ၼၼ်ႉ သႂ်ႇဝႆႉၵႃႈတီႈၸဵင်ႇၶိူင်ႈဝႆၼႃႈဢူၵ်းၼၼ်ႉ သွင်ၸဵင်ႇဢေႃႈ။- 17ၶဝ်ဢဝ်သၢႆၶမ်းဢၼ်ၽၼ်ႈဝႆႉသွင်သဵၼ်ႈၼၼ်ႉ သွတ်ႇသႂ်ႇၵႃႈၼႂ်းၶူၺ်ႇသွင်ၶူၺ်ႇ ဢၼ်မီးၵႃႈတီႈၸဵင်ႇၶိူင်ႈဝႆၼႃႈဢူၵ်းၼၼ်ႉဢေႃႈ။- 18ပၢႆသၢႆဢၼ်ၽၼ်ႈဝႆႉသွင်သဵၼ်ႈၼၼ်ႉ ၽၢႆႇၼိုင်ႈၸိုင်၊ ၶဝ်မတ်ႉၸပ်းၵႃႈတီႈလူင်ႇမွၵ်ႇၶမ်းသွင်ဢၼ်ၼၼ်ႉဝႆႉလႄႈ ဢဝ်သႂ်ႇဝႆႉၵႃႈၼိူဝ်သၢႆတွႆးသိူဝ်ႈသုပ်းၵႃႈတီႈၽၢႆႇၼႃႈမၼ်းဢေႃႈ။

19ၶဝ်သမ်ႉႁဵတ်းၶူၺ်ႇၶမ်းသွင်ဢၼ်လႄႈ ဢဝ်သႂ်ႇဝႆႉၵႃႈတီႈၸဵင်ႇၶိူင်ႈဝႆၼႃႈဢူၵ်းၼၼ်ႉသွင်ၸဵင်ႇ ၵႃႈတီႈႁိမ်းမၼ်း ဢၼ်မီးၽၢႆႇတၢမ်းၼႂ်းလႄႈ တေႃးၸပ်းၵၼ်တင်းၼႃႈသိူဝ်ႈသုပ်းၼၼ်ႉဢေႃႈ။- 20ၶူၺ်ႇၶမ်းတၢင်ႇဢၼ်ၵေႃႈ ၶဝ်ႁဵတ်းထႅင်ႈသွင်ဢၼ်လႄႈ ဢဝ်သႂ်ႇဝႆႉၵႃႈတီႈသၢႆတွႆးသိူဝ်ႈသုပ်းၵႃႈႁိမ်းတႂ်ႈမၼ်း ၵႃႈတီႈၼႃႈမၼ်းၼၼ်ႉ ၵႃႈၼိူဝ်တီႈဢၼ်သိူဝ်ႈသုပ်းတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈၼၼ်ႉသိုပ်ႇၵၢမ်းၵၼ်ၼၼ်ႉဢေႃႈ။- 21ၶဝ်ဢဝ်မႆဢၼ်သွမ်ႇမတ်ႉတွႆးၶူၺ်ႇၶမ်းၶိူင်ႈဝႆၼႃႈဢူၵ်းသွင်ဢၼ် ဢိၵ်ႇတင်းၶူၺ်ႇၶမ်းသိူဝ်ႈသုပ်းသွင်ဢၼ်ၼၼ်ႉၸပ်းၵၼ်ဝႆႉဢေႃႈ။ ၼင်ႇၼၼ်လႄႈ ၶိူင်ႈဝႆၼႃႈဢူၵ်းၼၼ်ႉ ႁွႆႈဝႆႉၵႃႈတီႈၽၢႆႇၼိူဝ်သၢႆႁတ်ႉဢႅဝ် ဢၼ်ႁၢင်ႈၶိူင်ႈၵႃႈတီႈသိူဝ်ႈသုပ်းၼၼ်ႉလႄႈ၊ ယင်းဢမ်ႇၽၢတ်ႇဢမ်ႇယၢၼ်ၵၼ် တင်းသိူဝ်ႈသုပ်းလႄႈ မီးယူႇသေႇသေႇ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။

ႁဵတ်းထႅင်ႈၶူဝ်းၼုင်ႈတၢင်ႇၽိုၼ်

(တူၺ်း၊ ဢွၵ်ႇ 28:31-43)

22မၼ်းဢဝ်ၶူဝ်းဢၼ်သွမ်ႇၵူၺ်းၵူၺ်း တေႃးႁဵတ်းသိူဝ်ႈယၢဝ်းဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်းၼၼ်ႉဢေႃႈ။- 23ၵႃႈတီႈသိူဝ်ႈယၢဝ်းၼၼ်ႉ မီးႁူၶေႃးသိူဝ်ႈၵႃႈၼႂ်းၶိုင်ႈၵၢင် ၽၢႆႇတၢင်းၼိူဝ်မၼ်းမိူၼ်ၸိူဝ်ႉၼင်ႇဢၼ်ပဵၼ် ၵႃႈတီႈႁူၶေႃးသိူဝ်ႈ ဢၼ်ဢဝ်လဵၵ်းႁဵတ်းၼၼ်ႉလႄႈ သႂ်ႇၵူပ်ႉၶေႃးမၼ်းၵႃႈတီႈႁူၶေႃးမၼ်းႁႂ်ႈဢမ်ႇလႆႈသိၵ်ႇလႆႈၶၢတ်ႇဢေႃႈ။

24ၵႃႈတီႈဢၼ်လဵပ်ႈႁွပ်ႈၸွမ်းႁိမ်းၽၢႆႇတႂ်ႈသိူဝ်ႈယၢဝ်းၼၼ်ႉ ၶဝ်ဢဝ်ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင် တင်းပိၵ်ႈၶျေႃးႁဵတ်းမၢၵ်ႇၸင်ႈသႂ်ႇဢေႃႈ။- 25ၶဝ်ဢဝ်ၶမ်းလွတ်ႈငၢၼ်ႇႁဵတ်းႁိင်ႇ ဢဝ်ႁိင်ႇၸိူဝ်းၼၼ်ႉ သႂ်ႇတီႈဝူင်ႈၵၢင် မၢၵ်ႇၸင်ႈႁူၺ်ႇၼိုင်ႈလႄႈႁူၺ်ႇၼိုင်ႈ ၵႃႈတီႈဢၼ် လဵပ်ႈႁွပ်ႈၸွမ်းႁိမ်းၽၢႆႇတႂ်ႈသိူဝ်ႈယၢဝ်းၼၼ်ႉဢေႃႈ။- 26မၢၵ်ႇၸင်ႈလုၵ်ႈၼိုင်ႈ၊ ႁိင်ႇလုၵ်ႈၼိုင်ႈ၊ မၢၵ်ႇၸင်ႈလုၵ်ႈၼိုင်ႈ၊ ႁိင်ႇလုၵ်ႈၼိုင်ႈ၊ ဢဝ်ၶၼ်ႈၵၼ်ၶႅၼ်ႈၵၼ်သေလႄႈ ၸွမ်းႁိမ်းမၼ်းလႄႈ ႁဵတ်းသိူဝ်ႈယၢဝ်း ၸိူဝ်ႉၼင်ႇၼၼ် ပုၼ်ႈဢၼ်တၵ်းဢဝ်ႁဵတ်းဢဝ်ပွင်ဢမူႉၸဝ်ႈ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။

27ၶဝ်တေႃးႁဵတ်းသိူဝ်ႈပုတ်းပိၵ်ႈၶျေႃးပုၼ်ႈဢႃႇရုၼ်ႇ၊တင်းလုၵ်ႈၸၢႆးမၼ်းၸိူဝ်းၼၼ်ႉ၊- 28ဢိၵ်ႇတင်းၶဵၼ်းႁူဝ်ပိၵ်ႈၶျေႃး တင်းမွၵ်ႇႁူဝ်ပိၵ်ႈၶျေႃး၊ ဢၼ်သၢင်ႇထုၵ်ႇ၊ တင်းၵူၼ်ပိၵ်ႈၶျေႃး၊- 29တင်းသၢႆႁတ်ႉဢႅဝ်ဢၼ်ဢဝ်ပိၵ်ႈၶျေႃး၊ ၶူဝ်းဢၼ်သွမ်ႇ၊ ၶူဝ်းဢၼ်ၵမ်ႇ၊ ၶူဝ်းဢၼ်လႅင်၊ တမ်ႇၵၢမ်းၵၼ်တေႃးႁဵတ်းၼၼ်ႉၸိူဝ်းၼၼ်ႉ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။- 30ၵမ်းၼၼ်ႉ ၶိူင်ႈပျႃးၶမ်းလွတ်ႈငၢၼ်ႇၵေႃႈ ၶဝ်ႁဵတ်းလႄႈ ဢဝ်ဢႅၵ်ႉၶရႃႇတူဝ်လိၵ်ႈဢၼ်ဝႃႈ၊ တၢင်းဢၼ်မူတ်းၸၢင်ႇတီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆၼၼ်ႉ တၢင်ႇသႂ်ႇဝႆႉမိူၼ်ၸိူဝ်ႉၼင်ႇဢၼ် တၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈ၊- 31ဢဝ်သၢႆဢၼ်သွမ်ႇမတ်ႉသႂ်ႇဝႆႉ ၵႃႈၼိူဝ်ၽၢႆႇၼႃႈၶဵၼ်းႁူဝ် ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။

တၢင်းဢၼ်ႁဵတ်းယဝ်ႉၸွတ်ႇတူဝ်ႈလီငၢမ်း

(တူၺ်း၊ ဢွၵ်ႇ 35:10-19)

32ၼင်ႇၼၼ်လႄႈ တၢင်းဢၼ်ႁဵတ်းဢၼ်သၢင်ႈသုမ်ႉထဵင်ၸဝ်ႈဢၼ်ဝႃႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၵႃႈမီးတင်းသဵင်ႈတင်းလူင် ယဝ်ႉၸွတ်ႇတူဝ်ႈဢေႃႈ။ ၵူၼ်းမဵဝ်းဢီႉသရေႇလႃႉတင်းလၢႆႁဵတ်းၸိူဝ်ႉၼင်ႇၼၼ်ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။

33မိူဝ်ႈၼၼ်ႉ ၶဝ်ၼၼ်ႉ ဢွၼ်ၵၼ်ဢဝ်သုမ်ႉထဵင်ၸဝ်ႈဢၼ်ဝႃႈ ၸႃႉၸဵမ်မူဝ်းၵႃႇမၼ်း၊ ၶိူင်ႈပိူင်မၼ်းတင်းသဵင်ႈတင်းလူင် ဢၼ်ဝႃႈၶေႃၶမ်းမၼ်း၊ ပႅၼ်ႈမၼ်း၊ သႄႈမၼ်း၊ သဝ်မၼ်း၊ တီႈသုပ်းတိၼ်မၼ်းလႄႈ၊- 34ၼင်သူဝ်းဢၼ်ယွမ်ႉလႅင်ပုၼ်ႈဢၼ်တၵ်းမုင်းႁူမ်ႇ၊ ၼင်တႁႃႇသႃႉ ပုၼ်ႈဢၼ်တၵ်းမုင်းၽႃႈၵင်ႈဢၼ်ၵင်ႈတၢင်းၼႂ်းမၼ်း၊- 35ဢိၵ်ႇတင်းတိူၵ်ႈတႃႇၶိူင်ႈဢၼ်ၶၢမ်ႇသၢၵ်ႈသေႇ တင်းၵၢၼ်းႁၢပ်ႇမၼ်း တင်းပလၢင်ႇတီႈၽေႇဢပႅတ်ႈ၊- 36ဢိၵ်ႇတင်းၶူင်ႇတီႈၵိၼ်မၼ်းတင်းၶိူင်ႈမၼ်း တင်းၶဝ်ႈမုၼ်းၽၢႆႇၼႃႈၸဝ်ႈ၊- 37ဢိၵ်ႇတင်းၶူင်ႇတီႈတႆႈၽႆး ဢၼ်ၶဝ်သႂ် တင်းဝၢၼ်ႇတႆႈၽႆးဢၼ်လႆႈမႄးႁႅၼ်းဝႆႉ၊ တင်းၶိူင်ႈဝၢၼ်ႇတႆႈၽႆး ၵႃႈမီးတင်းသဵင်ႈတင်းလူင် တင်းၼမ်ႉမၼ်းပုၼ်ႈဢၼ်တၵ်းတႆႈၽႆး၊- 38ဢိၵ်ႇတင်း ယိတ်ႈပလၢင်ႇၶမ်းတင်းၼမ်ႉမၼ်းပုၼ်ႈဢၼ်တၵ်းတႃးတင်းၼၢမ်ႇသႃႇဢၼ်ႁွမ်ဢၼ်ႁူၺ်း၊ ပုၼ်ႈဢၼ်တၵ်းတုတ်ႇၽႆး၊ တင်းၽႃႈၵင်ႈဢၼ်တၵ်းၵင်ႈၽၵ်းတူမူဝ်းၵႃႇၸဝ်ႈ၊- 39ယိတ်ႈပလၢင်ႇတွင်းလိူင် တင်းတႃၶႃႇတွင်းလိူင်ၵႃႈတီႈမၼ်း၊ တင်းၵၢၼ်းႁၢပ်ႇမၼ်း၊ တင်းၶိူင်ႈမၼ်းၵႃႈမီးတင်းသဵင်ႈတင်းလူင်၊ ၵွၵ်းလူင်တင်းတိၼ်မၼ်း၊- 40ၽႃႈၵင်ႈႁူဝ်ႉဝၢင်းတင်းသဝ်မၼ်း၊ သုပ်းတိၼ်မၼ်း၊ ၽႃႈၵင်ႈပုၼ်ႈဢၼ်တၵ်းၵင်ႈၽၵ်းတူႁူဝ်ႉဝၢင်း တင်းၸိူၵ်ႈမၼ်းတင်းလၵ်းမၼ်း တင်းၶိူင်ႈပုၼ်ႈဢၼ်တၵ်းပွင်ႁဵတ်းဢမူႉၸဝ်ႈ ၵႃႈၼႂ်းသုမ်ႉထဵင်ၸဝ်ႈ၊ ၶိူင်ႈမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ၵႃႈမီးတင်းသဵင်ႈတင်းလူင်၊- 41ၶူဝ်းၼုင်ႈၶူဝ်းမႆဢၼ်တၵ်းလႆႈၼုင်ႈလႆႈမႆ ၼႂ်းမိူဝ်ႈဢၼ်ပွင်ႁဵတ်းဢမူႉၸဝ်ႈ ၵႃႈၼႂ်းထႃႇၼႃႉတီႈမူတ်းၸၢင်ႇ၊ ၶူဝ်းၼုင်ႈၶူဝ်းမႆဢၼ်မူတ်းၸၢင်ႇပုၼ်ႈဢၼ်ယိတ်ႈပရေႃးႁဵၵ်ႈဢႃႇရုၼ်ႇ တၵ်းလႆႈၼုင်ႈလႆႈမႆ၊ ၶူဝ်းၼုင်ႈၶူဝ်းမႆပုၼ်ႈဢၼ်လုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈၼုင်ႈလႆႈမႆ ႁႂ်ႈလႆႈပွင်ႁဵတ်းဢမူႉယိတ်ႈပရေႃးႁဵၵ်ႈၼၼ်ႉၸိူဝ်းၼၼ်ႉ မႃးၵႃႈတီႈမူဝ်းသေႇဢေႃႈ။- 42ၼင်ႇၼၼ်လႄႈ ၵူၼ်းမဵဝ်းဢီႉသရေႇလႃႉတင်းလၢႆ ႁဵတ်းႁႂ်ႈတင်းသဵင်ႈတင်းလူင် ယဝ်ႉတူဝ်ႈၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇ တင်းသဵင်ႈတင်းလူင်ၼၼ်ႉဢေႃႈ။- 43မူဝ်းသေႇ လူတူၺ်းၵႃႈဢၼ်ၶဝ်ႁဵတ်းတင်းသဵင်ႈတင်းလူင်ၼၼ်ႉလႄႈ ႁူႉႁၼ်လွင်ႈဢၼ် ၶဝ်ႁဵတ်းႁႂ်ႈယဝ်ႉႁႂ်ႈတူဝ်ႈၼၼ်ႉ ဢိၵ်ႇတင်းလွင်ႈဢၼ်ၶဝ်ႁဵတ်းၸိူဝ်ႉၼင်ႇၼၼ် ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉၼၼ်ႉသေယဝ်ႉ၊ ပၼ်တၢင်းလီမင်ႇၵလႃႇတီႈၶဝ်ဢေႃႈ။

Currently Selected:

ဢွၵ်ႇၵႂႃႇ 39: CBMS

Highlight

Copy

Compare