ဢွၵ်ႇၵႂႃႇ 40
40
ပူၵ်းတင်ႈသုမ်ႉထဵင်ၸဝ်ႈလႄႈသၢၵ်ႈၵၢပ်ႈထႃႇဝရႃႉၽြႃး
1ၵမ်းၼၼ်ႉ ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2ၼႂ်းလိူၼ်ပထမႃႉ ဝၼ်းပထမႃႉၼၼ်ႉ မႂ်းတၵ်းလႆႈတႄႇႁဵတ်းသုမ်ႉထဵင်ၸဝ်ႈမူဝ်းၵႃႇတီႈၸူႉတီႈတုမ်ပရဵၵ်ႈသၢတ်ႈဢေႃႈ။- 3မႂ်းတၵ်းလႆႈဢဝ်တိူၵ်ႈတႃႇ ၶိူင်ႈဢၼ်ၶၢမ်ႇသၢၵ်ႈသေႇသႂ်ႇဝႆႉၵႃႈၼႂ်းမၼ်းလႄႈ ဢဝ်တင်းၽႃႈၵင်ႈတၢင်းၼႂ်း ၵင်ႈလပ်ႉတိူၵ်ႈတႃႇၼၼ်ႉဝႆႉဢေႃႈ။- 4ၶူင်ႇတီႈၵိၼ်ၵေႃႈ မႂ်းတၵ်းလႆႈဢဝ်သႂ်ႇဝႆႉလႄႈ မႄးႁႅၼ်းဝႆႉၵႃႈၼင်ႇဢၼ်တၵ်းလႆႈမႄးႁႅၼ်းဝႆႉၼၼ်ႉ ၵႃႈၼိူဝ်မၼ်းဢေႃႈ။ ၶူင်ႇတီႈတႆႈၽႆးၵေႃႈ မႂ်းတၵ်းလႆႈဢဝ်သႂ်ႇဝႆႉလႄႈတႆႈၽႆး ဝၢၼ်ႇတႆႈၽႆးမၼ်းၸိူဝ်းၼၼ်ႉဢေႃႈ။- 5ယိတ်ႈပလၢင်ႇၶမ်း တီႈဢၼ်တုတ်ႇၽႆးၼၢမ်ႇသႃႇၼၼ်ႉၵေႃႈ မႂ်းတၵ်းလႆႈဢဝ်ဝႆႉ ၵႃႈတီႈၽၢႆႇၼႃႈတိူၵ်ႈတႃႇၶိူင်ႈဢၼ်ၶၢမ်ႇသၢၵ်ႈသေႇၼၼ်ႉလႄႈ ႁွႆႈၵင်ႈၽႃႈၵင်ႈဢၼ်ၵင်ႈၽၵ်းတူသုမ်ႉထဵင်ၸဝ်ႈၼၼ်ႉသေဢေႃႈ။
6ယိတ်ႈပလၢင်ႇ တီႈဢၼ်တုတ်ႇၽႆးတူဝ်ယိတ်ႈၼၼ်ႉၵေႃႈ မႂ်းတၵ်းလႆႈဢဝ်ဝႆႉၵႃႈတီႈၽၢႆႇၼႃႈ ၽၵ်းတူသုမ်ႉထဵင်ၸဝ်ႈမူဝ်းၵႃႇတီႈၸူႉတီႈတုမ်ပရဵၵ်ႈသၢတ်ႈဢေႃႈ။- 7ၵွၵ်းလူင်ၵေႃႈ မႂ်းတၵ်းလႆႈဢဝ်ဝႆႉ ၵႃႈၼႂ်းၵႄႈဝူင်ႈၵၢင်မူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ တင်းယိတ်ႈပလၢင်ႇလႄႈ ဢဝ်ၼမ်ႉသႂ်ႇၼႂ်းမၼ်းဝႆႉဢေႃႈ။- 8မႂ်းတၵ်းလႆႈဢဝ်ႁူဝ်ႉဝၢင်း ဢၼ်လွမ်ႉႁွပ်ႈႁိမ်းသုမ်ႉထဵင်ၸဝ်ႈၼၼ်ႉ ပူၵ်းလႄႈဢဝ်ၽႃႈၵင်ႈဢၼ်ၵင်ႈၽၵ်းတူႁူဝ်ႉဝၢင်းၼၼ်ႉ ႁွႆႈၵင်ႈဝႆႉဢေႃႈ။- 9မႂ်းတၵ်းလႆႈဢဝ်ၼမ်ႉမၼ်း ပုၼ်ႈဢၼ်တၵ်းတႃးၼၼ်ႉ တႃးသုမ်ႉထဵင်ၸဝ်ႈ ဢိၵ်ႇတင်းၵႃႈဢၼ်မီးၵႃႈၼႂ်းမၼ်းလႄႈ ႁႂ်ႈသုမ်ႉထဵင်ၸဝ်ႈ ဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင် မူတ်းၸၢင်ႇဢေႃႈ။ ၼင်ႇၼၼ်လႄႈ မၼ်းတၵ်းလႆႈမူတ်းၸၢင်ႇဢေႃႈ။- 10မႂ်းတၵ်းလႆႈတႃးယိတ်ႈပလၢင်ႇတီႈဢၼ်တုတ်ႇၽႆး တူဝ်ယိတ်ႈဢိၵ်ႇတင်းၶိူင်ႈမၼ်း ၵႃႈမီးတင်းသဵင်ႈတင်းလူင်ၼၼ်ႉလႄႈ ႁႂ်ႈယိတ်ႈပလၢင်ႇၼၼ်ႉ မူတ်းၸၢင်ႇဢေႃႈ။ ယိတ်ႈပလၢင်ႇၼၼ်ႉ တၵ်းလႆႈပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။- 11ၵွၵ်းလူင် ဢိၵ်ႇတင်းတိၼ်မၼ်းၵေႃႈ မႂ်းတၵ်းလႆႈတႃးလႄႈႁႂ်ႈမူတ်းၸၢင်ႇဢေႃႈ။- 12မႂ်းတၵ်းလႆႈႁွင်ႉဢဝ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ မႃးၵႃႈတီႈႁိမ်းၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ ဢဝ်ၼမ်ႉဢၢပ်ႇပၼ်ၶဝ်သေဢေႃႈ။- 13မႂ်းတၵ်းလႆႈဢဝ်ၶူဝ်းၼုင်ႈၶူဝ်းမႆ ဢၼ်မူတ်းၸၢင်ႇၼၼ်ႉ ၼုင်ႈပၼ်ဢႃႇရုၼ်ႇလႄႈ ဢဝ်ၼမ်ႉမၼ်းတႃး ႁႂ်ႈမၼ်းမူတ်းၸၢင်ႇ လွင်ႈၼင်ႇႁိုဝ် မၼ်းတၵ်းလႆႈပွင်ႁဵတ်းဢမူႉယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ဢေႃႈ။- 14လုၵ်ႈၸၢႆးမၼ်းၸိူဝ်းၼၼ်ႉၵေႃႈ မႂ်းတၵ်းလႆႈႁွင်ႉဢဝ်မႃးလႄႈ ဢဝ်သိူဝ်ႈယၢဝ်းၼုင်ႈပၼ်ၶဝ်လႄႈ 15ဢဝ်ၼမ်ႉမၼ်းတႃးၶဝ် မိူၼ်ၸိူဝ်ႉၼင်ႇဢၼ် ဢဝ်ၼမ်ႉမၼ်းတႃးပေႃႈၶဝ်ၼၼ်ႉ လွင်ႈၼင်ႇႁိုဝ်ၶဝ်တၵ်းလႆႈပွင်ႁဵတ်းဢမူႉယိတ်ႈပရေႃးႁဵၵ်ႈ ၵႃႈတီႈၽၢႆႇၼႃႈၵဝ်ဢေႃႈ။ ၽိၵ်ႈသိၵ်ႈတၢင်းဢၼ်ဢဝ်ၼမ်ႉမၼ်းတႃးၶဝ်ၼၼ်ႉ တၵ်းလႆႈပဵၼ်ပုၼ်ႈဢရႃႇယိတ်ႈပရေႃးႁဵၵ်ႈထႃႇဝရႃႉ ၸူဝ်ႈလုၵ်ႈပၢၼ်လၢၼ်ၵႂႃႇမိူဝ်းၼႃႈဢေႃႈ၊ ဝႃႈၼင်ႇၼႆဢေႃႈ။- 16ၼင်ႇၼၼ်လႄႈ မူဝ်းသေႇႁဵတ်းၸိူဝ်ႉၼင်ႇၼၼ်ဢေႃႈ။ မၼ်းႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉတင်းသဵင်ႈတင်းလူင်ၼၼ်ႉဢေႃႈ။
17ၼႂ်းပီႊတူႉတီႉယႃႉ၊ လိူၼ်ပထမႃႉ၊ ဝၼ်းပထမႃႉၼၼ်ႉ၊ လႆႈတႄႇႁဵတ်းသုမ်ႉထဵင်ၸဝ်ႈဢေႃႈ။- 18မိူဝ်ႈဢၼ်တႄႇႁဵတ်းသုမ်ႉထဵင်ၸဝ်ႈၼၼ်ႉ မူဝ်းသေႇ ဢဝ်တီႈသုပ်းတိၼ်မၼ်းၶျႃးသေလႄႈ ပူၵ်းပႅၼ်ႈမၼ်းသေယဝ်ႉ၊ သွတ်ႇသႄႈမၼ်းလႄႈ ပူၵ်းသဝ်မၼ်းဢေႃႈ။- 19မၼ်းဢဝ်မူဝ်းၵႃႇ ၵီႈမုင်းၵႃႈၼိူဝ်သုမ်ႉထဵင်ၸဝ်ႈၼၼ်ႉသေလႄႈ၊ သမ်ႉဢဝ်ဢၼ်ႁူမ်ႇမူဝ်းၵႃႇ မုင်းသွၼ်ႉသႂ်ႇၵႃႈၼိူဝ်မၼ်းထႅင်ႈ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။
20မၼ်းဢဝ်ၶိူင်ႈဢၼ်ၶၢမ်ႇသၢၵ်ႈသေႇ သႂၢင်းသႂ်ႇၵႃႈၼႂ်းတိူၵ်ႈတႃႇၸဝ်ႈလႄႈ ဢဝ်ၵၢၼ်းႁၢပ်ႇတိူၵ်ႈတႃႇၸဝ်ႈသွတ်ႇဝႆႉသေလႄႈ ဢဝ်ပလၢင်ႇတီႈၽေႇဢပႅတ်ႈ တၢင်ႇသႂ်ႇၵႃႈၼိူဝ်တိူၵ်ႈတႃႇၸဝ်ႈၼၼ်ႉသေယဝ်ႉ၊- 21ဢဝ်တိူၵ်ႈတႃႇၸဝ်ႈ သႂ်ႇဝႆႉၵႃႈၼႂ်းသုမ်ႉထဵင်ၸဝ်ႈလႄႈ ဢဝ်ၽႃႈၵင်ႈတၢင်းၼႂ်းဢၼ်ၵင်ႈလပ်ႉၼၼ်ႉၵင်ႈဝႆႉသေလႄႈ ၵင်ႈလပ်ႉတိူၵ်ႈတႃႇၶိူင်ႈဢၼ်ၶၢမ်ႇသၢၵ်ႈသေႇၼၼ်ႉဝႆႉ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။
22မၼ်းဢဝ်ၶူင်ႇတီႈၵိၼ် ဝႆႉၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ် ပရဵၵ်ႈသၢတ်ႈ ၵႃႈတီႈႁိမ်းၽၢႆႇတၢင်းႁွင်ႇသုမ်ႉထဵင်ၸဝ်ႈ ၽၢႆႇၼွၵ်ႈၽႃႈၵင်ႈၼၼ်ႉလႄႈ၊- 23မႄးႁႅၼ်းၶဝ်ႈမုၼ်းၽၢႆႇၼႃႈၸဝ်ႈဝႆႉ ၵႃႈၼိူဝ်မၼ်းၼၼ်ႉ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇၼၼ်ႉဢေႃႈ။
24မၼ်းဢဝ်ၶူင်ႇတီႈတႆႈၽႆးဝႆႉ ၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ၵႃႈတီႈႁိမ်းၽၢႆႇတၢင်းၸၢၼ်း ႁႂ်ႈတေႃႇသိုဝ်ႈၵၼ် တင်းၶူင်ႇတီႈၵိၼ်လႄႈ 25တႆႈဝၢၼ်ႇတႆႈၽႆးၸိူဝ်းၼၼ်ႉ ဝႆႉၵႃႈတီႈၽၢႆႇၼႃႈထႃႇဝရႃႉၽြႃး ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။
26မၼ်းဢဝ်ယိတ်ႈပလၢင်ႇၶမ်းဝႆႉၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ႇ ပရဵၵ်ႈသၢတ်ႈ ၵႃႈတီႈၽၢႆႇၼွၵ်ႈၽႃႈၵင်ႈလႄႈ၊- 27ဢဝ်ၼၢမ်ႇသႃႇ ဢၼ်ႁွမ်ဢၼ်ႁူၺ်း တုတ်ႇၽႆးၵႃႈၼိူဝ်ယိတ်ႈပလၢင်ႇၼၼ်ႉ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇၼၼ်ႉဢေႃႈ။
28မၼ်းဢဝ်ၽႃႈၵင်ႈ ဢၼ်ၵင်ႈၽၵ်းတူသုမ်ႉထဵင်ၸဝ်ႈၼၼ်ႉ ႁွႆႈၵင်ႈဝႆႉဢေႃႈ။
29မၼ်းဢဝ်ယိတ်ႈပလၢင်ႇတီႈဢၼ်တုတ်ႇၽႆးတူဝ်ယိတ်ႈၼၼ်ႉ ဝႆႉၵႃႈတီႈၽၢႆႇၼႃႈၽၵ်းတူသုမ်ႉထဵင်မူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈလႄႈ ဢဝ်တူဝ်ယိတ်ႈ ဢၼ်တုတ်ႇၽႆး ဢိၵ်ႇတင်းတၢင်းပုၵ်ႈၸေႃႇၽေႃးၸဵၼ်ႇ ပုၵ်ႈၸေႃႇၵႃႈၼိူဝ် ယိတ်ႈပလၢင်ႇၼၼ်ႉ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇၼၼ်ႉဢေႃႈ။
30မၼ်းဢဝ်ၵွၵ်းလူင်ၼၼ်ႉ ဝႆႉၵႃႈၼႂ်းၵႄႈဝူင်ႈၵၢင်မူဝ်းၵႃႇ တီႈၸူႉတီႈတုမ်ပရဵၵ်ႈသၢတ်ႈ တင်းယိတ်ႈပလၢင်ႇလႄႈ ဢဝ်ၼမ်ႉပုၼ်ႈဢၼ် တၵ်းသုၵ်ႈသႂ်ႇဝႆႉဢေႃႈ။- 31မူဝ်းသေႇဢိၵ်ႇတင်းဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ လႆႈသုၵ်ႈတိၼ်သုၵ်ႈမိုဝ်းၶဝ် ၵႃႈၼႂ်းမၼ်းဢေႃႈ၊- 32လႆႈသုၵ်ႈတိၼ်သုၵ်ႈမိုဝ်း မိူဝ်ႈဢၼ်ၶဝ်ၶဝ်ႈၵႃႈၼႂ်း မူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉ ဢိၵ်ႇတင်း မိူဝ်ႈဢၼ်ၶဝ် သုတ်ႉၸပ်းသုတ်ႉၸူး ၵႃႈတီႈယိတ်ႈပလၢင်ႇၼၼ်ႉ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉတီႈမူဝ်းသေႇၼၼ်ႉဢေႃႈ။- 33မၼ်းဢဝ်ႁူဝ်ႉဝၢင်း ဢၼ်လွမ်ႉႁွပ်ႈႁိမ်းသုမ်ႉထဵင်ၸဝ်ႈ ဢိၵ်ႇတင်း ယိတ်ႈပလၢင်ႇၼၼ်ႉ ပူၵ်းလႄႈ ဢဝ်ၽႃႈၵင်ႈဢၼ်ၵင်ႈၽၵ်းတူႁူဝ်ႉဝၢင်းၼၼ်ႉ ႁွႆႈၵင်ႈဝႆႉဢေႃႈ။ ၼင်ႇၼၼ်လႄႈ မူဝ်းသေႇ ႁႂ်ႈတၢင်းႁဵတ်းယဝ်ႉတူဝ်ႈဢေႃႈ။
မွၵ်ႇၵုမ်ႈမုင်းၵႃႈၼိူဝ်သုမ်ႉထဵင်ၸဝ်ႈ
(တူၺ်း၊ ထိူၼ်ႇ 9:15-23)
34မိူဝ်ႈၼၼ်ႉ မွၵ်ႇၵုမ်ႈမုင်းႁူမ်ႇမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ မုၼ်ၽုင်းထႃႇဝရႃႉၽြႃးတဵမ်ဝႆႉၼႂ်းသုမ်ႉထဵင်ၸဝ်ႈၼၼ်ႉဢေႃႈ။- 35မူဝ်းသေႇဢမ်ႇၶဝ်ႈၵႃႈၼႂ်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈ ၼၼ်ႉလႆႈ ၵွပ်ႈပိူဝ်ႈဢၼ် မွၵ်ႇၵုမ်ႈ ၵုမ်ႈယူႇၵႃႈၼိူဝ်မၼ်းလႄႈ မုၼ်ၽုင်းထႃႇဝရႃႉၽြႃး တဵမ်ဝႆႉၼႂ်းသုမ်ႉထဵင်ၸဝ်ႈၼၼ်ႉ။- 36ယၢမ်းမိူဝ်ႈဢၼ် မွၵ်ႇၵုမ်ႈ ယုၵ်ႉၽၢတ်ႇသေၵႃႈတီႈၼိူဝ်သုမ်ႉထဵင်ၸဝ်ႈၶိုၼ်ႈၼၼ်ႉၸိုင်၊ ၵူၼ်းမဵဝ်းဢီႉသရေႇလႃႉတင်းလၢႆၼၼ်ႉ ဢွၼ်ၵၼ်ၶၢႆႉတီႈၵႂႃႇတၢင်းပႆတၢင်းၼႂ်းၵႃႈဢၼ်ၶဝ်ၵႂႃႇၶဝ်ပႆၼၼ်ႉဢေႃႈ။- 37ပေႃးမွၵ်ႇၵုမ်ႈ ဢမ်ႇယုၵ်ႉၽၢတ်ႇၶိုၼ်ႈၸိုင်၊ ယင်းဢမ်ႇၵႂႃႇတၢင်းပႆတၢင်းလႄႈ ယူႇတေႃႇထိုင်ႁွတ်ႈဝၼ်းဢၼ်ယုၵ်ႉၽၢတ်ႇၶိုၼ်ႈ ၼၼ်ႉဢေႃႈ။- 38မွၵ်ႇၵုမ်ႈထႃႇဝရႃႉၽြႃးၼၼ်ႉ တႄႇယူႇၵႃႈၼိူဝ်သုမ်ႉထဵင်ၸဝ်ႈ ၶိင်ႇၵၢင်ဝၼ်းလႄႈ ၶိင်ႇၵၢင်ၶိုၼ်းၸမ်ႉ၊ ပဵၼ်ပဵဝ်ၽႆးလႄႈ တႄႇယူႇသိုဝ်ႈၼႃႈတႂ်ႈတႃ ၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင် ၼႂ်းၵႃႈဢၼ်ၶဝ်ၵႂႃႇၶဝ်ပႆၼၼ်ႉဢေႃႈ။
ၵျၢမ်းဢၼ်ဢွၵ်ႇၵႂႃႇယဝ်ႉယဝ်ႉဢေႃႈ။
Currently Selected:
ဢွၵ်ႇၵႂႃႇ 40: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
