OO MEYO ACHIMOOWIN ST MARK 10
10
PISKE̔TUSSINA̔HIKUN X.
1Ākose pussikoo ākota o̔che, mena pā itoo̔tāo Judeai̔k owusittā Jordani̔k o̔che: ākose mena ayiseyinewa natik; mena, ka ke̔ isse we̔ke totu̔k, kiskino̔humowāo mena.
2Ākose Phariseewa pā natik, mena kukwāchimik, Meywasin na napāo kitta wāpinat wee’wa? ā kootāyimatchik. 3Ākose nuskwāwusehāo mena omisse itāo, Tanse Moses ka̔ itussoowatikooyāk? 4Ākose omisse itwāwuk, Moses ke̔ eyinumakāo kitta mussina̔humoo̔t wāpinitoowe mussina̔hikun, ākose kitta wāpinimee̔t. 5Ākose Jesus nuskwāwusehāo mena omisse itāo, Āspee̔che muskowustāyik ke’ tā̔ewaw ke ke̔ mussina̔humakoowaw oma ooyussoowāwin. 6Maka mitchimach nistum ā uskeewu̔k o̔che Muneto ke̔ osehāo napāwa mena iskwāwa. 7Āwuko oma o̔che napāo kā o̔che nukutat oo̔’ taweya mena oo’ kaweya, ākose kitta wechāwat wee’wa; 8Ākose ā nesitchik kitta pāukwun meyas: ākose numoweya owusimā nesewuk maka pāukwun meyas. 9Unima maka Muneto ka ke̔ mamowenu̔k, ākaweya oweyuk kitta nunanischenum. 10Ākose pee̔che waskahikuni̔k oo kiskino̔humowakuna kukwāchimik mena āwukwāyew kāyapitch o̔che. 11Ākose omisse itāo, Piko oweyuk kā wāpinakwā wee’wa, mena kā ke̔che wekimakwā kotuka, totum pisikwatissewin. 12Mena keespin iskwāo wāpinatche oo napāma, mena ke̔che wekimatche kotuka totum pisikwatissewin.
13Ākose pātoowāwuk ooskowasisa, kitta saminat: ākose oo kiskino̔humowakuna kitootāyewa unehee ka pāsewayit. 14Maka ispe Jesus weäpu̔tu̔k, naspitch numma na̔āye̔tum, mena omisse itāo, Eyinuma̔kook upistowasisuk kitta pā nasitchik, mena ākaweya kittahuma̔kook: chikāma tu̔to ka nuspitakootchik Muneto oot otānowini̔k kitta ayawuk. 15Tapwā k’ ititinawaw, Piko oweyuk āka kā otinumookwā Muneto oot otānowewin tapiskooch upistowasis, numoweya kitta pee̔tokwāo ākota. 16Ākose otināo oo’ spitooni̔k, samināo oo’ cheecheeä o̔che, mena meywukimāo.
17Ākose ka̔ sipwā̔tāt māskuna̔k isse, pā itoo̔tāyewa pāuk ā pimepu̔tayit, mena oche̔che̔kwunuppestak, mena kukwāchimik omisse, Meyo Ookiskino̔humakāo, kākwan kā totuman kitta ke̔ ayayan kakekā pimatissewin? 18Ākose Jesus omisse itāo, Tanā̔kā meywatis wā̔che isseyun? numma oweyuk meywatissew piko pāuk, āwuko, Muneto. 19Ke kiskāye̔tān ooyussoowāwina, Ākaweya pisikwatisse, Ākaweyā nippa̔takā, Ākaweya kimoote, Ākaweya nuspach isse mise̔kāmoo, Ākaweya wuyāsehewā, Kistāyim, k’ o̔tawe mena ke’ kawe. 20Ākose nuskwāwusehik mena omisse itik, Ookiskino̔humakāo, ka̔keyow ohoo ne ke̔ nakutowāye̔tān ā owasiseweyan o̔che. 21Ākose Jesus ā kunowapumat sakehāo, mena omisse itāo, Pāuk kākwi ke noo̔tāpuyin: kewā, nutowe utawakā piko kākwi ka ayayun, mena meeyik ookitimakissewuk, ākose ke ga ayan wāyootissewin ke̔che kesikoo̔k: mena pā itoo̔tā, ākose otina ket ayimissewin, mena pimitissa̔hoon. 22Ākose numma ke̔ na̔āye̔tum āwuko itwāwin o̔che, mena sipwā̔tāo āka ā na̔heyowāsit: chikāma ā aya̔pun me̔chāt kākwia.
23Ākose Jesus waska itapew, mena omisse itā̀o oo kiskino̔humowakuna, Taneyekoo̔k ukawach unekee ka ayatchik wāyootissewina kā ke̔ pee̔tokwātchik Muneto oot otānowini̔k! 24Ākose kiskino̔humowakunuk mamuskatumwā̀wuk oot ayumewineyewa. Maka mena Jesus nuskwāwusehāo, mena omisse itāo, Owasisetik, taneyekoo̔k eyayimuneyik weyawaw o̔che unekee ka mumisseetotu̔kik wāyootissewina kitta pee̔tokwātchik Muneto oot otānowini̔k! 25Nowutch wā̔tuneyew pisiskew kitta sapooyu̔keet itta ā ooskesikoowuneyik sapoonikun, ispee̔ch ā wāyootissit napāo kitta pee̔tokwāt Muneto oot otānowini̔k. 26Ākose naspitch ke̔che mamuskatumwuk, omisse ā ititootchik, Owāna maka kā ke̔ pimatchehoot? 27Ākose Jesus ā kunowapumat omisse itwāo, Ayiseyinewuk weya numoweya ke̔ e̔kineyew, maka numoweya ākose Muneto: chikāma weya Muneto ka̔keyow kākwia ke̔ e̔kineyewa.
28Ākose Peter omisse mache itāo, Cheest, ne ke̔ nukutānan ka̔keyow, mena ke ke̔ pimitissa̔hootinan. 29Ākose Jesus nuskwāwusehāo, mena omisse itwāo, Tapwā k’ ititinawaw, Numma oweyuk e̔taw ka ke̔ nukutu̔k waskahikun, a̔po oo’ chewama, a̔po oot’ owāmawa, a̔po oo̔’ taweya, a̔po oo’ kaweya, a̔po wee’wa, a̔po oot owasimisa, a̔po oot uskeema, neya o̔che, mena meyo achimoowin o̔che, 30Maka kitta o̔tinum metatu̔too metunow owusimā eyekoo̔k unoo̔ch, waskahikuna, mena oo’ chewama, mena oot’ owāmawa, mena oo’ kaweya, mena oot owasimisa, mena oot uskeema, ayimissewina ussitche; mena kotuk uske kā oche̔chepuyik kakekā̀ pimatissewin. 31Maka me̔chāt nekan ka ayatchik, otana̔k kitta ayawuk; mena otana̔k ka ayatchik nekan kitta ayawuk.
32Mena māskuna̔k oot aya̔tawaw Jerusalemi̔k ā itoo̔tātchik; ākose Jesus nekanoo̔towāo: ākose mamuskatumwuk; mena mākwach ā pimitissa̔watchik, sākissewuk. Ākose mena otināo metatu̔t nesoosap, mena mache we̔tumowāo kāko kākwia kā otee̔tikoot, 33Omisse ā itwāt, Cheest, ket itoo̔tanow Jerusalemi̔k; ākose napāo oo’ Koosisan kitta pukitinumowawuk ke̔che ayumehāwekemawuk, mena oomussina̔hikāwuk; ākose kitta pukitussowatāwuk nippoowini̔k isse, mena kitta pukitinumowāwuk Ayu̔ch eyinewa: 34Ākose kitta mātowakatāwuk, mena kitta pusustā̔wāwuk, mena kitta see̔kwatāwuk, mena kitta nippa̔hāwuk: ākose nistoo kesikayikee kitta wuniskaw mena.
35Ākose James mena John, oo’ koosisa Zebedee, pā natik, omisse ā itwāyit, Ookiskino̔humakāo, net itāye̔tānan kitta totāstumoweya̔k piko ā isse nutowāye̔tuma̔k. 36Ākose omisse itāo, Kākwan ātāye̔tumāk kitta totāstumatukook? 37Ākose omisse itāwuk, Meeyinan kitta ke̔ uppeya̔k, pāuk ke ke̔cheniski̔k, ākose kotuk ke numu̔tiniski̔k, ke kistāye̔takoosewini̔k. 38Maka Jesus omisse itāo, Numoweya ke kiskāye̔tānawaw kākwan nātotumayāk: ke ga ke̔ na mini̔kwanawaw mini̔kwakuni̔k itta ka o̔che mini̔kwāyan? mena kitta seekaha̔takoweyāk unima seekaha̔takoowin ka o̔che seekaha̔takoweyan? 39Ākose omisse itāwuk, Ne ga ke̔ kuske̔tanan. Ākose Jesus omisse itāo, Tapwā ke ga mini̔kwanawaw mini̔kwakuni̔k itta ka o̔che mini̔kwāyan; mena unima seekaha̔takoowin ka o̔che seekaha̔takoweyan āwuko kā o̔che seekaha̔takoweyāk: 40Maka kitta uppee̔k ne ke̔cheniski̔k mena ne numu̔tiniski̔k nummayāo net ayan kitta mākeyan; maka kitta meeyawuk unekee ka kwyache̔twa̔tchik. 41Ākose ispe metatu̔t peā̔tu̔kik, naspitch mache numma na̔āye̔tumehikwuk Jamesa mena Johna. 42Maka Jesus nutoomāo, mena omisse itāo, Ke kiskāye̔tānawaw unekee ka itukimee̔tchik kitta tipāyimatchik Ayu̔ch eyinewa tipetotumwuk tipāye̔chekāwin ā tipāyimatchik; mena oo ke̔chayeemewawa tipāyimikwuk. 43Maka numoweya ākose ke ga isse ayanawaw keyawaw: maka una kā nutowāye̔tu̔k kitta ke̔chayewit keyawaw, āwuko kā oot utooskāyakunimeyāk: 44Mena piko oweyuk keyawaw o̔che kā nutowāye̔tu̔k kitta mawutche ke̔chayewit, kitta utooskāyakunewew mamowe. 45Chikāma a̔po napāo oo’ Koosisan numoweya kitta utooskāsta̔t ke̔ o̔che pā itoo̔tāo, maka kitta utooskāstakāt, mena kitta mākit oo pimatissewin kitta tipa̔hikāstumakāwuneyik me̔chāt o̔che.
46Ākose tukoosinwuk Jerichoi̔k: mena ā utte wuyoweet Jerichoi̔k o̔che ussitche oo kiskino̔humowakuna mena me̔chāt ayiseyinewa, āka ka wapit Bartimeus, oo’ Koosisa Timeus, uppew oo̔pimāskuna̔k ā pukoose̔twat. 47Ākose ispe peā̔tu̔k āwukwune Jesusa Nazarethi̔k ka o̔cheeyit, mache tāpwāo soo̔ke, mena omisse itwāo, Jesus, keya David oo’ koosisa, kissāwatotowin. 48Mena me̔chāt we̔tumak kitta kipi̔toowāt: maka tāpwāo owusimā naspitch soo̔ke, David oo’ koosisa, kissāwatotowin. 49Ākose Jesus kipi̔chekapowew, mena itussoowāo kitta nutoomimee̔t. Ākose nutoomāwuk unehee napāwa āka ka wapeyit, omisse ā itatchik, Meywāye̔ta, pussikoo; ke nutoomik. 50Ākose, ā wāpinu̔k oot ukoohoon, pussikoo, mena pā natāo Jesusa. 51Ākose Jesus peekiskwāo mena omisse itāo, Kākwan nātowāye̔tumun kitta totatan? Āka ka wapit napāo omisse itāo, Tāpāye̔chekāyun, kitta ke̔ o̔tinuman ne wapewin. 52Ākose Jesus omisse itāo, Neya kewā; ke tapwā̔tumoowin ke ke̔ pimachehikoon. Ākose sāmak ke̔ o̔tinum oo wapewin, mena pimitissa̔wāo Jesusa māskuna̔k.
Currently Selected:
OO MEYO ACHIMOOWIN ST MARK 10: CSW
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society 1876-1877.
