Génesis 25
25
Yoctyiꞌ ạvaꞌ muꞌ Abrahamtyiꞌ yocsiꞌĉantyimꞌ
1Abraham yocsiꞌcheꞌ p̂en vämeban, Cetura tịj mọꞌ. 2Mọꞌĉan qui ạvaꞌyi jäbän ạvamꞌ Ceturaty: Zimram, judyeyaꞌ Jocsán, Medán, Madián, Isbac, judyeyaꞌ Sua, meꞌ meꞌ tịj muꞌin. 3Muꞌ Jocsán ạvaꞌyi Seba judyeyaꞌ Dedán. Muꞌ Dedán vóshiꞌ muꞌin jiquej asureo in judyeyaꞌ letuseo in judyeyaꞌ leumeo in. 4Muꞌ Madián ạvaꞌyi muꞌ Efa judyeyaꞌ Efer, Hanoc, Abida judyeyaꞌ Elda, meꞌ meꞌ tịj muꞌin vóshiꞌ in mọꞌ Ceturaty. 5Abraham räj jämꞌ yụꞌtaqui jedyeꞌ muꞌ Isaacdyes. 6Tacaꞌ tsạꞌdyemꞌ jiquej ñịbeꞌjeyacsi jedyeꞌ in yoctyiꞌ ạvaꞌ muꞌ, yocsiꞌĉantyiꞌ p̂en muꞌ. Chat qui räj jutacsi paj qui moch bäꞌyi shupquive tsun jịjcaij in, paj qui jam Isaactum bäꞌyi in.
Sänꞌdyeꞌ muꞌ Abrahamsiꞌ
7Abraham aty yiriꞌ cien yävätidyeꞌ quiꞌtac ĉanamꞌ jiyiꞌ yómodyeꞌ tyiti muꞌ, 8chat q̂uinꞌdyemꞌ säñi, judyeyaꞌ vóshiꞌvunyaꞌ yụꞌtac, anic jämꞌ ishoij muꞌ. 9Isaac judyeyaꞌ Ismael, Abrahamtyiꞌ ạvaꞌ muꞌ, muꞌin nạ́te in, toꞌĉan yụꞌte in Macpelaĉansiꞌ, mọꞌ pamꞌve buꞌyis bäꞌyedyeꞌ Mamreve. Efrónsiꞌ jac jiquej Zohartyiꞌ ạvaꞌ muꞌ, muꞌin nash hitita in. 10Abraham yaꞌij jac jiquej, hitita jiꞌmincayete in. Chimuꞌĉandye nạc muꞌ Abraham p̂envuntum muꞌ, Saravun. 11Aty säñiyaꞌ muꞌ Abraham, chat qui muꞌ Jenꞌ jañutyiti Isaac. Muꞌ jiꞌyajcati bäꞌyity c̣hẹiꞌyaꞌ mọꞌ ojñiꞌ, tịj mọꞌ "Ojñiꞌ tsạꞌtyiꞌsiꞌ Jenꞌ muꞌ cavintyiꞌ yụ", jeꞌ ojñiꞌ in, muꞌyaꞌ muꞌ bäꞌyi Isaac.
Ismaeltyiꞌ vóshiꞌ muꞌ
12Uts nash vóshiꞌ muꞌ Ismaeltyiꞌ ạvaꞌ muꞌ Abrahamtyiꞌ, Agar tseꞌ muꞌ, mọꞌ nash Saras úñis mọꞌ, Egiptoĉansiꞌ mọꞌ. 13Muꞌ tashchety ạvaꞌ Ismaeltyiꞌ, Nebaiot tịj muꞌ, muꞌ qui naꞌi Cedar, judyeyaꞌ Adbeel, judyeyaꞌ Mibsam, 14Misma, Duma, Massa, 15Hadar, Tema, Jetur, Nafis, Cedema, 16meꞌ meꞌ tịj muꞌin yiriꞌtac päräꞌ jiyity ạvaꞌ muꞌ Ismaeltyiꞌ in. Räjdye muꞌin ayoꞌbuꞌyi in ĉụiꞌtyidyes muntyiꞌ muꞌin. Chimeꞌdye ĉụiꞌsisiꞌ jac muꞌin meꞌ meꞌdye yụꞌtyeyeyac tịj muꞌin.
17Ismael yiriꞌ cien chibin quiꞌtac yävätidyeꞌ jiyiꞌ yómodyeꞌ tyiti muꞌ, chat q̂uinꞌdyemꞌ säñi muꞌ penꞌdyetucseban vóshiꞌvun muꞌ. 18Vóshiꞌ muꞌ muꞌĉan bäꞌyi in dyeteꞌĉan mọꞌ jac Havila judyeyaꞌ mọꞌ jac Shur, pamꞌves Egipto, yóĉandyemꞌ jịjcaiꞌ majmi o Asiriave, muꞌyaꞌ bäꞌyi in. Jam jämꞌjiti in ĉụiꞌtyiꞌtum chätidyeꞌ in, yoctyiꞌ Abrahamtyiꞌ vóshiꞌ muꞌ.
Naꞌedyeꞌ Jacobsiꞌ judyeyaꞌ Esaúsiꞌ
19Ọij p̂eyacdyeꞌ p̂eijte muꞌ Isaac, Abrahamtyiꞌ ạvaꞌ muꞌ. 20Isaac aty vạjpedyeꞌ quiꞌtac yómodyeꞌ tyiti muꞌ chat q̂uinꞌdyemꞌ Rebecacheꞌ vämi, Betuelsiꞌcheꞌ ạvaꞌ, Labánsiꞌ vojiꞌ muꞌ. Muꞌin arameyo in, Padan-aranĉan bäꞌyi jiquej in. 21Men mọꞌ säräꞌ buꞌyiꞌ mọꞌ Rebeca, jam junꞌ ạvaꞌyiꞌ mọꞌ. Mọꞌdyes qui muꞌ Isaac cọdaqui Ayoꞌcheꞌ p̂endyesiꞌ muꞌ. Jenꞌ jụjjajibuti cọdacdyeꞌ muꞌ, chat q̂uinꞌdyemꞌ qui mọꞌ ạvaꞌyiꞌ. 22Epoj na jiquej ạvaꞌ mọꞌ, voꞌcoĉandyemꞌ jiquej aty taꞌchiti in. Mọꞌ jiꞌtareꞌ in mọꞌ Rebeca, yiꞌ mọꞌ: "¿Junꞌ buty meꞌ yụ?" Chat qui cọdaquiꞌ Ayoꞌcheꞌ, jéte:
—¿Jedyedyes buty chuti in?
23Ayoꞌ vorjeꞌ:
Voꞌcoĉan mi päräꞌ muntyiꞌ in,
muꞌintyiꞌ raꞌ daiꞌ vóshiꞌ muꞌin,
fer buꞌyi raꞌ in pạrej buꞌyi qui na ramꞌ in.
Vóshiꞌ muꞌ jäquitytyiꞌ ferdyeꞌ raꞌ cạiꞌ in,
muꞌtyiꞌ na vóshiꞌ tashchetytyiꞌ,
úñi raꞌ in jäquitycheꞌ vóshiꞌ in.
24Cạ̈tsiꞌ tupudyeꞌ mọꞌ chat qui basdyiꞌ mọꞌ Rebeca, epoj ạvaꞌ mọꞌ naꞌi in. 25Tashchety ạvaꞌ mọꞌ yedyej fin aꞌyamꞌ, shínaiꞌ fin muꞌ, mọꞌdyes yụꞌtyeyete tịj in "Esaú".#25:25 Hebreosĉan "Esaú" yiꞌ ca yiꞌ "fiñity". 26Cäꞌc̣häijdye naꞌi yoctyiꞌ, tap buꞌyi Esaútyiꞌve tribity jituti, meꞌ buꞌyi naꞌi in, mọꞌdyes yụꞌtyeyete tịj in Jacob.#25:26 Hebreosĉan "Jacob" yiꞌ ca yiꞌ "tribity" chimeꞌdye mọꞌyaꞌ jiquej muntyis p̂eyacdyeꞌ yiꞌ: "Muꞌ nash tapchute tribityve muꞌ", yiꞌ ca yiꞌ "muꞌ väñätute", meꞌ buꞌyiꞌ camꞌ p̂eyacdyeꞌ. Isaac aty jäbän quiꞌtac yómodyeꞌ tyiti yoquiꞌdyemꞌ basdyiꞌyaꞌ mọꞌ Rebeca o.
Esaú jiꞌmincaqui naꞌedyedyes tashchety ạvaꞌ muꞌ
27Muꞌyaꞌ p̂añi in. Esaú chịj däräijtyiꞌ anic maꞌjotyeꞌ därädyeꞌ. Vojity na muꞌ Jacob ĉụiꞌ acaꞌyaꞌ bäꞌyi jam jätäjyi. 28Isaac mujuꞌchaꞌ mạꞌjete Esaú ĉaĉaij na maꞌjotyeꞌ jebacdyeꞌ jebeiꞌ ijaiꞌsiꞌ muꞌ. Mọꞌ na Rebeca mujuꞌchaꞌ mạꞌjete mọꞌ Jacob.
29Yirisĉan mạyedyeꞌ acaꞌyaꞌ muꞌ jejmivaꞌti Jacob. Ĉụiꞌdye shupqueshan muꞌ Esaú, däräijtyiꞌ atsijban muꞌ anic yamjoquety shupqueshan muꞌ. 30Esaú jéyaqui vojity muꞌ:
—Patsjiyitiꞌ damꞌ mọꞌ jejmitidyeꞌ mi jäijnäs, atyuꞌ raꞌ roiꞌyi säñi dáqui yụ. Mọꞌdyes yụꞌtyeyete majmadyeꞌ Esaúdyes: "Edom"#25:30 Hebreosĉan Edom yiꞌ ca yiꞌ "jäijnäty". jéte in.
31Vorjete Jacob:
—Jụdyej, tashi raꞌ soꞌmitim naꞌedyedyes mi, yụ qui raꞌ jeñej buꞌyi tashcheꞌ naꞌity.
32Yi Esaú vorjete:
—Jụdyej, aty raꞌ roiꞌyi säñi dáqui yụ, jam junꞌ naꞌedyedyes otejjeꞌ yụ.
33Vorjete Jacob:
—Jụdyej yụꞌtyeꞌ ram tsäquiꞌyis p̂eyacdyeꞌ yụ́dyes, yiꞌ aty jiꞌmincayitim mísiꞌ naꞌedyedyes, a nash yụ́siꞌ q̂uinꞌ mọꞌ —yi Jacob.
Anicdye meꞌ, yụꞌtyeꞌ mọꞌ p̂eyacdyeꞌ tsäquiꞌyis meꞌdye soꞌmete Jacob naꞌedyedyes muꞌ. 34Chat q̂uinꞌdyemꞌ muꞌ Jacob soꞌmete jejmitidyeꞌ judyeyaꞌ pan. Aty meꞌsiꞌ c̣hụ́qui chat qui sacyeban jọban qui. Mijam méquiꞌ otejjeꞌ ĉụiꞌsiꞌ naꞌedyedyes muꞌ junꞌ chuc muꞌ tashchety ạvaꞌ.
Currently Selected:
Génesis 25: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
