Jone 16

1Mae Jisas ne cheke eghu, “Iara chekedi glepo igre ka ghotilo mala thosei blogho ghotilo nomi fatutuani na. 2Naiknore ginauna faꞌau kosi ghami ghotilo ka nodi suga tharai are. Uve, narane na mei, mare ginauna falehe ghami ghotilo. Eghuteuna mare gaoghathodire ne enihi unha te magnahagheni God na eghu. 3Mare ginauna edi glepo igre ka ghotilo naugna mare theome lase ghami ghepa mae Mama. 4Uve, iara gognarona kulu chekedi glepo igre ka ghotilo mala ne funu edi mare glepo igre ka ghotilo, ghotilo nake ghatho fapulodi unha teke chekedi iara igre eghu.

Nogna gloku mae Tharunga te Blahi

“Iara neke theome chekedi ka ghotilo glepo igre tifa na, naugna iara neke au nekeu balumi ghotilo. 5Nu iara gognarona namo ke pulo ka mae Mama mae ihei teke kuru mei ghau na. Nu na theo kaisei ka ghotilo nate ghusna ghau iara aheva nate tei iara na. 6Ghotilo diꞌanagnafami fara naugna eidi unha te chekedi iara ka ghotilo igre. 7Nu tutuani fara te chekeni iara ka ghotilo na. Te mala kelimi ghotilo na iara ginauna tei koko ghami ghotilo, naugna jame te theome tei iara na, mae mala totogho, mae Tharunga te Blahi na theome mei ka ghotilo. Nu jame te tei iara na, iara ginauna kuru meini mana ka ghotilo. 8Eghuteuna, kate mei mae mala totogho na, mana ginauna falalase fakeli ka naiknogna nauthoglu igne eigna nakhibo, eigna ihei te doglo ke ulugna God na, nei eigna ihei God nate fateni na. 9Mare ghaoghatho fadiꞌa eigna ihei te jafra ka nakhibo na, naugna mare ne tirodi fatutuani ghau iara. 10Mare au ghaoghatho fadiꞌa eigu iara mae ihei te doglo ke ulugna God, naugna iara ginauna tei ka mae Mama. Eghuteuna ghotilo ginauna theome filo ghau iara. 11Mare au ghaoghatho fadiꞌa eigna mae ihei God nate fateni, naugna God la fatenihi mae Satan, mae funei gna u nauthoglu igne.

12 “Iara au kmana glepo te mala chekedi ka ghotilo re, nu gognarona kmana glepo fara te mala ghathodi ghotilo re. 13Nu kate mei mae Tharunga te Blahi na, mana ginauna batu ghami ghotilo ka tutuani fateoteo eigna God. Mana ginauna theome cheke leghudi nogna gaoghatho thegna re. Mana ginauna chekedi kolho ka ghotilo unha teke nomhini mana na nei toutonuni ka ghotilo eigna unha nate thoke mei nathuꞌu nauriha. 14Mae Tharunga te Blahi ginauna fafnakno ghau iara. Naugna mana ginauna atha unha teke chekedi iara gre mala ke toutonu ka ghotilo. 15Gobigna lepo te khotodi mae Mama re nogu iara. Naugna igne te chekeni iara na, mae Tharunga te Blahi na nomhidi unha nate chekedi iara re mala ke toutonu ka ghotilo.”

Ke pulo meigna mae Jisas

16Mae Jisas ne cheke eghu ka mare, “Katha vido ikoi ghotilo ginauna na theome filo ghau iara. Nu katha vido ikoi ke leghugna tuana, ghotilo ginauna nake filo ghau iara.”

17Keha nogna mae fanomho mana re ne cheke eghu fari thedi, “Unha eghu si gaoghathogna na te cheke eghu mana ka tahati ignea? ‘Katha vido ikoi ghotilo ginauna theome filo ghau iara. Katha vido ikoi ke leghugna tuana ghotilo ginau nake filo ghau iara.’ Mana neke cheke eghula ngau, ‘Naugna igre iara ginauna tei ka mae Mama.’ ” 18Aonu mare ne cheke eghu, “Unha eghu si mana gaoghathogna te cheke eghu mana, ‘Katha vido ikoi’ teu ignea? Tahati theome laseni unha te chekeni mana igne.”

19Mae Jisas lasenihi te magnahaghei ghusnani mae fanomhore eigna igne. Eghuteuna mana ne cheke eghu ka mare, “Tore! ‘Katha vido ikoi ghotilo ginauna theome filo ghau iara. Katha vido ikoi ghotilo ginauna nake filo ghau iara’ teu iara igne ngala site romi ghusna ghotilo ka iara gnea? 20Tutuani fara te chekeni iara ka ghotilo na. Naiknogna nauthoglu igne ginauna keli tadi fara ka unha nate eni mare ka iara na. Eghuteuna ghotilo ginauna tanhi nei diꞌanagnafa eghu, nu nomi diꞌanagnafa ghotilo na nake figri kau gleale'a. 21Ghathoni igne. Kate namo karha sua na, gaꞌase na ginauna diꞌanagnafa naugna la thokenihi u narane te mala kabru naꞌa na. Nu kate karha thugna na, naꞌa ginauna nake ghatho ihoni narane teke khabru na, naugna naꞌa ne gleꞌani thugna te karha majaghani. 22Na jateula tuana eghu ka ghotilo. Eghume gognarona ghotilo diꞌanagnafa. Eghuteuna kate filo ghau iara na ghotilo ginauna keli tami nei gleale'a eghu. Nafnata gleale'a te theome tangomana kaisei naikno nate atha fadelei ka ghotilo. 23Kate filo ghau iara ka narane tuana, ghotilo ginauna theome toreni kaisei glepo ka iara. Tutuani fara te chekeni iara ka ghotilo na. Mae Mama ginauna tusu ari ka ghotilo unha te toreni ghotilo ka nanghagu iara na. 24Funu tifa te ghilei thoke kau narane gognaro gne ghotilo neke theome toreni kaisei glepo kau nanghagu iara na. Eghume ghotilo tore ka mae Mama, eghuteuna ghotilo ginauna hata ka mana. Eghuteuna ghotilo ginauna thono gleale'a fara.”

25Aonu, mana ne cheke eghu ka mare, “Glepo te chekedi iara ka ghotilo igre, iara toutonu kau cheke naba. Nu narane na ginauna mei nate theome cheke naba iara ka ghotilo na. Nu iara ginauna cheke fadoglo eigna mae Mama ka ghotilo. 26Kau narane tuana iara ginauna theome toreni mae Mama mala togho ghami ghotilo, nu ghotilo ginauna toreni mae Mama unha te magnahagheni ka nanghagu iara na. 27Naugna mae Mama namha ghami ghotilo. Mana namha ghami ghotilo naugna ghotilo ne namha ghau iara nei ghotilo fatutuani ghau iara teke mei funu ka God. 28Uve, iara neke mei funu ka mae Mama kau nauthoglu igne. Eghuteuna gognarona iara nake jifla kokoni nauthoglu igne mala ke pulo ka mae Mama.”

29Aonu nogna mae fanomho mana re ne cheke eghu ka mana, “Tutuani fara, gognaro na iagho la cheke thaklenihi ka ghehati, la theome toutonuhi ka cheke naba. 30Gognarona ghehati lase nigho iagho thofno lasedi gobi lepore. Neuba kaisei naikno ne theome ghusna nigho iagho, iagho la kulu lasenihi unha te ghathoni mana na. Ka igne te fatutuani nigho ghehati neke mei iagho funumu ka God teuna.”

31Nu mae Jisas ne cheke eghu ka mare, “Ghotilo la fatutuani gognaro ba theo? 32Fanomho ghotilo ia. Narane te mala sopa thei ghotilo na la namohi. Ka narane tuana ghotilo ginauna kafe tei koko ghau iara nake pulo ka nomi namono themi re. Narane tuana agne hi gognarona. Nu iara ginauna theome au thegu eghu, naugna mae Kmagu iara na au balugu iara.

33 “Iara chekedi glepo igre ka ghotilo mala au ghotilo ka pharikeli balugu iara. Tutuani fara, kate au teu ghotilo ka nauthoglu igne naiknore ginauna para ghami fara ghotilo. Nu thosei mhaghu ghotilo eghu, naugna iara la tapla sorunihi mae funei te batu fadiꞌadi naiknore te edi fabrahu puhi te diꞌa igre.”

Currently Selected:

Jone 16: mrn

Highlight

Copy